LOUTAO 105
105
Ramai ae Puhvei Maitao
(1 Puo 16.8-22)
1 Mapao ye kalo paopeio,
ae puhvei aduso nasü shapao peio;
tyahrü hrülai hi puhnou soupeikhai touyu vah haso khesü pokhaio.
2 Mapao ye lou sousho khaio;
puhnou khupayu vah soukhai touyu khesü paopeio.
3Etao hai puhvei mai souyu donou lesalo;
puhye thoyu mai hrülaiye sü panou asalo.
4Soukha ngaoloure donou Mapao hi tavelo;
ae puhye tobai soumoa tho-a bulo.
5-6Puhvei kilai Abraham vei tyaosholea maitao,
puhnou dolouyu Jakob vei tyaosholea maitao:
Ramai nou khupayu vah haso soupeikhai touyu khesü licholo,
ae puhnou chidei peikhai touyu khesü licholo.
7 Mapao hai Etao vei Ramai;
puhvei chikhatao hai deiphao teitei donoue.
8Puhye koa vo soukhai touyu nasü puhnou teisa khaipeilai,
ae puhnou paohkhai touyu nasü khaphao thethe koute hai khaipeilai.
9Puhnou Abraham hi chaachou soukhai touyu ae Isaak hi ae-ao tea soukhai touyu nasü puhnou souvete peilai.
10Puhnou Jakob hi vo soukhai touyu nasü teisa donou soupei khaitoue.
11Puhnou paoe, “Enou Kanaan maivei teidei sü neletao hi neletao vei kikaa panou soure donou peilai.”
12Ramai vei maitao hai daoti baie,
ae Kanaan maivei teidei hinou shetumai soua bue.
13Puletao hai teidei ali hinou teidei ali hi ae vedei ali hinou ali hi sühao poa nou ta-e.
14Ana Ramai nou puletaoye sü panou mai linoua souvea souchoro peimoe,
ae puletaoye vupa peire donou puhnou veo maitao hisü haibüa paopi peie.
15“Enou dopa louyu avei kilai maitaoye deiso;
avei rachipaola-apei maitao hi vah ashi souso.”
16 Mapao nou puletao vei teidei hisü tokaa seive peie,
ae puletao vei touso khesü potakhai toupeie.
17Ana puletao jünou rai-a puhnou mai ali hai vakou seita peie,
puh hai Josef toue, ae puhye sü qila mai ali soua zholai peie.
18Puh phi hai hurai nou khipfüe,
ae puh te hi hu nou thou khapfüe;
19puhnou paoyu chipao khesü vepamo koute,
Mapao vei chipao nou puhye sü kabü laisa tea zhuwe.
20Süthaisü Ejipt hi veo nou puhye pophapeie,
tyahrütao hi kho-apeio maitao nou puhye lahdo soupeie.
21Puhnou puhye sü panou puh kihikha hi paopu nasü soupeie,
ae puhvei na veishi pei hi panou khopu soupeie.
22Veo vei khe hinou buyu peikho maitaoye paodou peire khouko sü puh hi bue.
23Süthaisü Jakob nou Ejipt hisü vere,
ae sühinou puhnou füsho-a buloure.
24 Mapao nou puhvei maitao hi tyoudzü alao soumoa hapeie,
ae puletaoye sü panou ngaobayu maitao jünou khouko ngaopuloue.
25Puhnou Ejipt maiye panou puhvei maitaoye ngaorare donou soupeie,
ae puhvei kilai maitaoye panou souvea souchoro peie.
26Süthaisü puhnou dopalouyu puhvei kilai Moses
ae Aaron ye sü seive peie.
27Puhai nou Ejipt teidei hinou Ramai vei vah haso ae khupayu vah khesü soungao peie.
28Ramai nou teizhiyu sü teidei sühi seive peie,
ana Ejipt mai hai puhvei kharochi khesü zübare.
29Puhnou puletao vei reidzü khesü zhe hi souda thoupeie,
ae kha veishi sü southakhai peie.
30Puletao vei teidei veishi hi
ae vebuh hi koute-a vao nou pa phoutao-a bupeie.
31Ramai nou kharochi peia panou khaomai ae seihei nou teidei teitei hisü phoutsü peie.
32Puhnou teirü seiveyu thaosü reithou ae teipeiyu sünou teidei hisü seive peie.
33Puhnou puletao vei darkhabe ae doushibe khesü soushi khaipeie,
ae süübe veishi sü soucha khaipeie.
34Puhnou kharochi peikhaie, khazü khesü phouhao louho soua
teidei veishi hisü ve phoutao loure,
35ae puletao nou teidei hi buyu pounghou ae shinamara veishi hai toukhai loure.
36Puhnou Ejipt teidei hi hrüa buyu nah narai mai hrülai hai southakhai toupeie.
37Süthaisü puhnou Israel maiye süthaisa-a tapa peie,
puletao nou shahu ae sana khesü poa tare,
alia puletao mai hrülai hai pfüphao veishoe ae khouchi khaitoue.
38Ejipt maitao hai puletaoye ngaopire
ae puletao nou tapa peikhai puletao hai lesa shore.
39Ramai nou puletaoye sü teihao nou züpoa tapeie,
ae khei teile hi mei nou vapeie.
40Puletao nou kho khaie, puhnou puletao hi raohou khesü seive peie,
raki vanou puletaoye sü touso alao seikou peie.
41Puhnou chuhdu ali hinou pa dzü küpa peie,
sünasü radeiki hinou rei ali büa panou dzü küta-e.
42Puhnou puhvei kilai Abraham hi chaachou soukhai touyu nasü licho peie.
43Südonou puhnou dopa louyu maitaoye sü puhnou süthaisa-a papeie,
ae puletao hai sasho-a nou shusoua lou soue.
44Puhnou puletao hi mai kukhe maivei teidei sü peie
ae puletao nou puletao vei kilu khesü poloue.
45Sübüa soupeiyu hai puhvei maitaoye panou puhvei chikhatao ae kharochi khesü züloure donoue.
Mapao ye paosholo!
Currently Selected:
LOUTAO 105: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
