LOUTAO 104
104
Soupeiyu Mapao ye Paoshoyu
1Oh Arako, Mapao ye paosholo!
Oh Mapaowo, avei Ramai, ne hai daizhou koute due!
Ne maizü khouko ae aduso sünou banou poa nou bue;
2ae ava sünou züpoa nou bue.
Nenou raki sü sahpao haoyu büa haokhai peie,
3ae nevei ki hai dzü pei hinou soukhaitoue.
Teihao nou nevei rheiluki soua pfütawe,
ae teikhai vei shouh nou pfüa zhaotawe.
4Nenou teikhai sü nevei kopomai souwe,
ae teipeivavayu nasü nevei kilai souwe.
5Nenou teideiphao hai nasü panou lümore donou soutaosoua beikhei sü soutou toukhai peiwure.
6Nenou zaidu nasü deiphao hi sabanü banouyu büa khaipeie,
ae dzü khesü panou deichi hopeie.
7Nenou dzütaoye züpeiyu phaki, puletao hai tuta-a baiwe;
shusoua nenou kharochi peiyu pai sü choulou khaie,
puletao hai tuta-a baiwe.
8Puletao nou deichi phao hisü küpawe ae deikho hisü küvewe,
sübüa puletao hai puletao nou bure buh hisü küve tawe.
9Nenou teideiphao sü dzü panou hopulou more donou puletaoye sü panou hai hi koute bua bailai touyu vei raih sü thoupeie.
10Nenou deikho hi panou küre donou dzüla sü soupeie,
ae deichi kohi panou küre donou rei khesü soupeie.
11Sütao nou rekhaona khesü dzü peie,
ae rei-a rekou nou buyu rheisüh khesü panou reikha louwe.
12Süpehao hinou buyu süübetao hinou raohou khenou phe souloua lou soua bue.
13Ratei hinou nenou teirü sü deiphaova rükou peie,
ae deiphao sü nevei shiha khenou kou phoupeie.
14Nenou kikhaorü taoye panou toure donou poudai khesü paopa peie,
ae maikhe maiye donou tea shinamara khesü soupeie,
15maikhe maiye souva peire donou darkhadzü soupeie,
maikhe maiye lesousa peire donou oliv theadzü sü soupeie
ae puletaoye pfüchi peire donou raokhao sü soupeie.
16 Mapao nou shokhai touyu süübetao,
Lebanon hi sedar süübetao hai dzü veishoa nou ngaoloue.
17Sütao hinou raohou khenou phe soua bue;
ae dzü raohoutao-a sütao hinou phe souwe.
18Renghitu khenou deichi kuyu kinou buwe,
ae chuhlya qulu kinou rekhaona taonou tutsüa bue.
19Khouh teile süloure donou nenou khouh sü soupeie,
ae teinghei sü panou lah loutare teile süa soupeie.
20Nenou khei teimai teizhi nasü rekhaona metaoye panou ngaohao-a to phoutoure donou soupeie.
21Ramai nou souda peikhai touyu touso khesü khaosouveo khenou rapoa phoutouwe.
22Tei thepakhaie, puletao hai lah buyu phe hisü dakhailou dazü ta-a baiwe.
23Süthaisü deiphao mainou lahlah nou soupfüre vah khesü teizhi loumo koute soupfüwe.
24 Mapao, nenou soupeikhai touyu na khesü daizhou koute pousa!
Ne hai daizhou koute tsüdo vei-a nou haitao veishi sü soupeisa!
Deiphao hai nevei bashana khenou phoutao-a bure.
25Nenou kasho-a ae duso shoa nou zaidu sü soupeie,
sühisü phouhao louho hrikhaona khesü tai-du sümoa nou bue.
26Sühinou dzüluki khesü tawe,
ae Leviathan khaona-a koa nou bue.
27Haitao hrülai hai puletao nou touso-a hria buloure donou
ne hinou vuzhia nou bue.
28Nenou puletaoye sü touso sü peie,
ae puletao nou tousoloua rukha loue.
29Nenou thaowua tayu nasü puletao nou ngaopi-e,
nevei ssü nasü puletao hinou pota peiyu phaki,
puletao hai thai-a baiwe, ae nai data-a baiwe.
30Ana nenou puletao hi ssü houthou peikhaie,
puletao sü soulou baie.
Sübüa deiphao hisü hrü ashu nasü peie.
31 Mapao vei kathe sü panou teisa nou buyu sü soulo!
Puhnou soupeikhai touyu bashatao donou puhye sü panou lesa-a bulo!
32Puhnou deiphao zhu peiyu phaki, deiphao hai lüngua baiwe,
puhnou deichi khesü deipei khaie, sütao hai meikhao pa-a baiwe.
33Enou hrüa bubusa sü Mapao ye lou sousholai,
ahi hrirai buki sasü Ramai ye lou nou sousholai.
34Enou lou souyu nasü puhye panou jüpayu sü soupeio,
daiolouzü Enou sava-a buyu haisü puh hinou ve baie.
35Mahmo souyu maiye sü deiphao hinou souha laiwo;
mai ashi maiye sü panou bupu khaiso.
Arako, Mapao ye paosholo!
Mapao ye paosholo!
Currently Selected:
LOUTAO 104: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
