LOUTAO 103
103
Ramai vei Lesha
1 Mapao ye paosholo, arako!
Avei hrümai hrülai, puhvei sheeyu zhih sü paosholo.
2Arako, Mapao ye paosholo,
ae puh hai daizhou koute zhuvea süwe touyu nasü ngaiso.
3Puhnou avei mah veishi khaipeie,
ae avei sounou teitei sü souvei paie.
4Puhnou Eye khüh hi loure hinou popa peie,
ae puhvei leshi zhuvea sünou Eye ha peie.
5Puhnou avei hrümamai hi haveihli soupeie,
südonou E hai nahle-a nou lüche büa khouchi sho-a nou bue.
6 Mapao nou kaozü hinou chiku peiwe,
ae veahoyu maivei zü nasü zhupeiwe.
7Puhvei tsüchoda khesü puhnou Moses hi pongao peie,
ae Israel maiye panou puhvei khupayu vah haso khesü ngaoloue.
8 Mapao hai zhuvea peisü sho-a ae leshi süe,
rarou lekha haha moe ae tobai soumoa leshi peiyu sü bukoute peiwe.
9Puhnou maiye zükoute-a bumoe,
ae teisa nou rarou koute-a bumoe.
10Etao nou ngaozü na thaifüa puhnou Etaoye tudee moe,
moa Etao nou soumah pfümah khaitouyu thaifüa paoh khapei moe.
11Daiolouzü ratei hai deiphao jünou kua buyu bütoua puhye tsükhoua buyu maitao hisü puhvei lesha hai dushoa bue.
12Teinghei palova nou teinghei loulova koute hai doushoa buyu bütoua süzhou koute du-a nou Etao vei mahmo khesü puhnou polai peiwure.
13Puonou nahye zhuvea leshiyu büa puhye tsükhoua buyu maiye sü Mapao nou zhuvea leshi peie.
14Puhnou Etaoye dainou poa soukhai toue touyu sü süwe;
Etao hai nai baie touyu sü puhnou licho peiwe.
15Emai hrütou hai pounghou ali büa baie.
Etao hai rekou nou paopayu poupah ali büa baie;
16sünasü teikhai nou hüsho peikhaie, raita hata-a baiwe—
mai linoua sünasü daikinou busa touyu sü sümoe.
17Ana Mapao ye tsükhoua buyu maiye sü puhnou leshi peiyu hai akhai ha-e,
ae puhnou chilee checheyu nahai puletao vei tyaosholea koute hi bupeie.
18Puhnou vo soukhai touyu nasü züa buyu maitao,
ae puhvei chikha khesü züa buyu maitao hi puhnou zhuvea leshi peiwe.
19 Mapao nou puhvei vebuh hai raki hi khaikhai toue,
ae puhnou ha veishi pei hinou veo sü soua bue.
20Khouko pfüshoa buyu rakiva maitaore, Mapao ye paosholo,
puhvei kharochi züa buyu maitao, Mapao ye paosholo!
21Raki vanou khouko pfüa buyu hrülai, puhvei kilai maitao,
ae puhvei leli soua laiyu maitao, Mapao ye paosholo!
22Puhnou soupeiyu bashana hrülai,
puhnou khasa-a buyu buh teitei, Mapao ye paosholo!
Arako Mapao ye paosholo!
Currently Selected:
LOUTAO 103: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
