LOUTAO 102
102
Veahoa buyu Nahle Maivei Veachi
1Oh Mapaowo, Enou veachi paoyu sü keipeio,
Enou kra-a soukha khoyu nasü nou peio!
2Enou veahoyu phaki, ahinou tavai tapeiso!
Nevei noubei sü ahi pfürei peio!
Ae Enou neye kuyu phaki Eye thashoa nou chila peio!
3Avei hrü hai meikhao büa hata-a bure;
avei pfüphao sü mei taoyu büa tao-a bure.
4Eye sü poube ali büa phailaiwure, ae kivü tare;
E hai haliro tounüyu hare.
5Ewo shusoua le-a bubaire,
avei pfüphao hai hee ae rao likhei bua baire.
6Ewo radeiki hinou raohou ali bütoua bubaire,
ae mainou thaokhai touyu buh ali hinou tuturou bütoua bua baire.
7Ewo zhiholou hore;
lah likhei kipeitaoh hinou buyu raohou ali büre.
8Teithetsü Eye ngaobayu maitao nou Eye sü haongu soupeia bure,
ae Eye konüa buyu maitao nou avei zhih nou poa chaawe.
9-10Nenou lekha rarouyu donou,
vounai nou avei touso sou baire,
ae avei nghidzü sünou Esü ke-a bubaire.
Nenou Eye sü polaloua shilai peiwure.
11Avei hrütou hai-o koukhe teikhu büa baire,
kitayu pounghou ali büa baire.
12Ana Mapao, newo louzü teisa nou veo sü soulai,
vere khaphao teitei nou neye sü licholai.
13Ne tashuloua Zion ye zhuvea peio,
puhye zhuvea leshi peire teile sü vere,
chu hai kaotouyu teilere.
14Nevei kilai maitao nou puhye sü leshiwe,
puh hai soushi khaitouyuma;
puhye sü soushiwua thaokhai-a tayuma puletao nou honapaiye sü zhuveawe.
15Tyahrü veishi nou Mapao ye sü ngaopi-e,
deiphao hi veo mai hrülai nou puhvei khouko nasü ngaopiwe.
16 Mapao nou Zion ye soushu dakhai peiyu phaki,
puhnou puhvei aduso nasü pongao peilai.
17Puhnou thaolai khaiyu puhvei maitao vei veachi paoyu sü puhnou keinou peilai.
18 Mapao nou soupei khaitouyu vah haso khesü vere bonakhaye donou rüdai khaipeio,
sükulouzü chuchu nakou moa buyu maitao-a puhye sü paosholai.
19 Mapao nou puhvei sheeyu buh hinou zhukouwe,
puhnou raki vanou deiphao hisü zhukoua nou bue.
20Hukhaki hinou lüa buyu maitao pai sü puhnou chouwe,
ae southalaio tya chikude khaitouyu maitaoye sü puhnou lahdo soupeie.
21Südonou puhvei zhih sü Zion hinou shapaolai,
ae puhye sü Jerusalem hinou paosholai,
22ae tyahrütao ae vedei khenou koa tave Mapao ye thoyu phaki, puhye sü paosholai.
23E nahle-a bukinou Mapao nou Eye sü southou lülou hoa khaipeiwure,
puhnou avei hrümamai sü soujü peire.
24Oh Ramai, E tsülou mojüo Eye pota peiso.
Oh Mapaowo, newo louzü teisa nou bukou telai;
25Nenou teideiphao sü daohdao nou soupeiwure,
ae ne bah vuzünou raki sü soupeie.
26Sütao veishi nou hata-a bailai,
ana newo louzü teisa nou bulai;
sütao teitei hai sabanü büa shita-a bailai,
ae sütao hai hata-a bailai.
27Ana newo louzü teisa nou raibüa bubaie,
ae akhai ha-a nou ne louzü hrülai.
28Etao vei nahmaitao hai kaozhou veia hrülai,
ae nevei khopeiyu khe hinou puhtao vei tyaosholea
maitao hai zhoukao ashi daomoa hrülai.
Currently Selected:
LOUTAO 102: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
