TSÜCHITAO 8
8
Ratsü ye Paoshoyu
1Keikhaio! Ratsü sünou maiye kua bure.
Tsüsüyu nanou pai pa-a bure.
2Kuyu bukinou, ludu pe kinou,
ae maibo kinou honapai nou lah-a bue;
3nuhdu vei rokhubomü pe hinou,
rokhubomü kinou shusou sha-a bure:
4“Oh maitaore, neye Enou kua bue,
Enou shusou-a rayu hai deiphao mai hrülai donoue.
5Oh memeh soutaore, kaozü souyu nasü doulo;
Oh voyu maitaore, leikeia keilo.
6Mutei shoyu avei chipao khesü keilo;
Enou paoyu veishi sü veikhai-a baie.
7Enou paoyu sü cheche-e;
madayu hai Enou ngaora-e.
8Amü nou paopayu chipao veishi sü cheche-a baie;
dayu moa khiyu lia sühisü hae.
9Tsüsüyu maiye donou sütaosü züsha tea baie
alia tsüdo ngaolouyu maiye donou sütao hai kaotou tea baie.
10Shahu jüwo louzü Enou paodou peiyu nou poloua baio;
alia sana jüwo louzü tsüdo nanou dolou baio.
11“Daiolouzü tsüvei hai muteichu jünou veipu hie;
nenou jüpa-a buyu na teitei-a puhye paokhalou hoe.
12E hai ratsü nasüe, ae ahi tsünghei sü bue;
ahi tsüdo ae kaozü hinou chidei peilou süyu sü bue.
13 Mapao ye piyu touyu hai hashi naye ngaorayu na-e;
Khaophu souyu ae zhaipou shiyu ae ashi vei ludu
alia kaozümoyu chipao khesü Enou ngaorae.
14Ahi douzüapei alia veiyu ratsüa bue,
Ahi tsünghei-a bue, ae khouchia bue.
15Avanou vemaitao nou veo souwe,
alia teidei khoyu maitao nou veiyu chikha sü soulouwe.
16Avanou veo nahmaitao nou teidei kholouwe,
alia aduso maitao nou deiphao tukha louwe.
17Eye leshiyu maitaoye sü Enou leshie;
alia Eye toutei-a phouyu maitao nou Eye ngaoloulai.
18Hangiyu alia tsükhouyu hai ahi bue,
dulousü chingi alia sava payu haia ahi bue.
19Avei rashithou hai sana jünou veipu hie, sana veikayu tya jünoua veihie,
alia Enou peiyu hai veikayu shahu jünoua veipu hie.
20Enou acheche ludu hinou tawe,
kaozü vei bo hinou tawe,
21Eye leshiyu maitao hisü Enou nangi peie,
alia puhmai vei kini khaiyu buh hisü lathou phoupeie.
22“Mapao nou puhvei vah soushurai hinou Eye soupeie,
puhnou souyu puhvei vah araina soua Eye soupeie.
23Shurai nou Eye soushu la peiwure,
deiphao soushumo jünou rai-a Eye soupeiwure.
24Zai thou soumo jünou Eye soupeiwure,
dzünghou ha-a bukinou Eye soupeire.
25Deichi zhai souloumo jünou,
deitaoh zhai southou loumo jünou rai-a Eye souwure,
26Puhnou deiphao ae doutao soumo jünou,
moa naihü toulia soumo jünou raia Eye soupeiwure.
27Puhnou raki soushuyu phaki,
puhnou zai pei hi teihao souveyu phaki, E sühinou bure.
28Puhnou ratei hi teihao soukhai peiyu phaki,
zaidu vei dzüla soushuyu phaki,
29ae puhnou zaidzü hi kharochi peia
hai hi koute bailai tea paopeiyu phaki,
sühisü E bure.
Puhnou deiphao vei beikhei soutayu phaki E sühi bure.
30Süteile hinou Esü puh pe hinou sa-a vah souyu paopu#8.30 sa-a vah souyu paopu; moyuma puhvei nahtou. soua bure;
alia teithechü puhvei jüpa nasü soua bure,
Puhvei nghingao hinou teisa sü lesa-a nou bure—
31mainou hrülou veiyu deiphao vanou lesa-a
ae deiphao mai donou vasa-a bure.
32“Südonou chuo, anah maitaore, achi keilo:
Lesayu maitao sü aludu thaifü tayu maitaoe.
33Paodou peiyu khesü keiloua tsüveilo,
alia sünasü ngaophou moyu souso.
34Achi kei louyu maisü savayu maitao-e,
teithechü avei rokhubomü hinou buyu maitao,
avei kikhu bomü hinou khopoa buyu maitao sü vayu maitao-e.
35Daiolouzü Eye ngaolouyu maina sü ahri ngaoloure,
alia Mapao vei jüpa nasü ngaoloude;
36ana Eye polou moyu mai sü lahye zhiloua baie;
Eye ngaorayu maisü athai naye leshia baie.”
Currently Selected:
TSÜCHITAO 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
