TSÜCHITAO 7
7
1Anahna, achipao khesü zülo, alia avei kharochi khesü ngaikhai tiso. 2Avei kharochi khesü zülo alia hrilouo, Enou doupeitao hai ne nghithou hinou mara ali büa khailo; 3sütao hai ne bah hi zükhailo, alia nevei lüthou pei hinou rüthou khailo. 4Tsüvei hi paolo, “Ne hai atupai-e”, ae tsüsü naye chavei shoyu nevei samai soua kulo. 5Sünanou neye chilee moyu naotupai bah hinou povai peilai, züa thaoyu naotupai vei müvei müthea hinou vupa peilai.
Chilee moyu Naotumai
6Vuli Enou aki vabomü hinou vakou zhupae, 7alia Enou chaomeh souyu nahlemai taoli zhingaoe, sütao hrohinou Enou voyu nahlemai ali ngaoe. 8-9Puhsü honapai vei ki kainghou hinou buyu ludu hinou takoue. Puhnou teimai roro louyu teile hinou honapai vei ki hisü takoue, 10Alia zhukhaio, khakhamai na tupoa ae soushi shoyu naotumai linou puhye sü daoloure. 11Honapai hai dukhya-a ladodo souyu naotumai alie, puh phei sü ki hi bumoa sashi shoe; 12chachakio lududo kinou kho-a bue, akia hupobu kinou buwe, ae buh likinou honapai nou dazüa khowe. 13Honapai nou puhye sü kholoua mümure, alia hraoha puchia puh hi paoe: 14“Enou zhou teithe posheela peiwure, alia posheelayu sou hai-a ahi bue. 15Südonou chuo Enou neye daore donou tapawe, neye jüpa shoa phou-e, ae Enou neye ngaoloure. 16Enou avei züphao sü sahnou khuvü tea khaitue, Ejipt maivei züzüyu sahnou zühsou khaitoue. 17Enou azüphao sü poukai nüvei myrrh, aloes alia cinnamon nou kaida khaitoue. 18Khe, ahai koa teithemo koute leshiyu vei vah soulaikhe; ahai koa khusou poshu savasho laikhe. 19Daiolouzü akhapu sü ki hi hae; puh hai doushoyu veidou veitare. 20Puh sü pousha taoli pfüa tare; puh sü khouhdubvü teile hinou ki hi dakhai velai hie.” 21Honapai nou reshi shoyu chipao sünou puhye taih loure; hounapai vei müvei mütheayu sünou puhye seiloure. 22Chode ali hai dathayu buh hi süthaipoa tayu büa puhsü honapai thaifü poa tare, ae puhsü rüh hinou mukhai touyu kho-shu ali büre;#7.22 Hebrew hi sheesha timoe. 23loushu linou lüthou hi lou phyawure. Puh sü raohou linou rüh hi zhaolou mulouyu büre — puh hai kaozhou shilaire touyu sülou mode.
24Südonou chuo, O anah maitaore, achi keilo. Enou paoyu khesü soutaosoua keilo. 25Sübüyu naotumai hinou tavai tareilo; honapai vei ludu hisü taso. 26Honapai nou mai alao soushi peiwure, ae khekai veili phousha louhoa southawure. 27Honapai vei ki hai rabedushao hi louyu vei ludue, athai maivei teidei hi hotayu ludu nasüe. Thasho-a thaire vei bo nasüe.
Currently Selected:
TSÜCHITAO 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
