TSÜCHITAO 6
6
1Anahna, nenou kinapa maili vei müpfü louzü, shetumai li hi chaachou souwu louzü; 2ne lah nevei münou paopayu chipao hinou muloure toulouzü; ne lah nevei chipao hinou phumu loure louzü; 3süthaisü haibüa soulo, anahna, alia neye lah vupalo, daiolouzü ne sü nevei kinapamai vei khouko khe hinou bure: thalasou taho nasha-a nevei kinapa hinou ra-a neye phapeio tea kholo. 4Sünasü ne souloumo koute zhitawuso, moyuma sochaoso. 5Kho-shu ali nou souhuyu mai nghoujü hinou tavai louyu büa moyuma rüh southou khaitouyu hinou raohou ali nou tupa louyu büa ne tupalo.
6Heakayu maitaore, taho chasei hinou douloua tsüveilo. 7Puletao hai süthai-apeio, peikhowo, ae veo tiyu lia ha-e, 8ana puletao hai teilü kinou touso hai teisaiki toure donou souda khailouwe. 9Oh shakawo, teile kaso ne züphao hinou dazüa bulaige? Ne zhi-a buyu sü teile kapha hinou kaishu laige? 10Dazü kholoulai hie, zhikho touloulai hie, bah khyapoa sokho touloulai hie tea bulouzü, 11touha sohayu nou haolai mai ali büa ne hisü ve-a bailai, alia nevei jüpa nou reihmai ali büa velai.
12Muh hayu maili, mai ashi maili nou dadouyu chipao paopoa tawe. 13Nghei nou maichouwe, phinou puuwe, batou nou tewe, 14kaozümo tsüle pfüa shodo ashi tsüchodawe, thaokhai timoa sha southou peiwe. 15Südonou veahoyu sü puh hisü süngaokhai moa velai; nghimaisü lihinou puhsü souveilou hoyu hi koute soushi khaiwulai.
16-19 Mapao nou ngaorayu alia healou hoyu na anai bue:
khaosouyu nghithou,
dayu mali,
mah lia hayu mai zhe soupayu bah,
do ashi phouyu lüthou,
ashi hi thashoa tuhoyu phi,
dahrührüa dashakhi soumai,
alia thaihou-jürai mai hrohi sha southou apeimai.
Khulou Souyu vanou Paopi Peiyu
20Anahna, ne puo vei kharochi sü zütoulo, alia ne pfü vei paodou-apei sü ngaiso. 21Chipao sütao sü ne lüthou hi khaikou telo, ne ngarao hi phupa khailo. 22Nenou tapayu phaki, sütaonou neye süthaita peilai; nenou dazüa buyu phaki, sütaonou neye khopeilai; alia nenou kaishuyu phaki, sütaonou neye chaku peilai. 23Daiolouzü paodou-apei sütao hai meivabvü alie, alia tudee peiyu sütao hai ahri vei ludue. 24Sütao nou neye naotu shiyu maitao hinou povailai peilai, maiye züa thaoyu naotu maitao vei müvei müthea hinou vupa peilai. 25Houmaitao vei hüveiyu nasünou pa neye seilouso, alia puletao vei nghi pheiyu sünou neye panou nülouso. 26Daiolouzü khakha maipfü liwo raokhao alinou poa ngalou süe, ana chilee moa khulou souyu haina nou puhvei buyu na veishi sü pota-a bailai.
27Mai alinou mei hai taopa khaimoa puhvei sabanü hinou hopoa bulou süwu? 28Mokhaia mailinou meithou peinou puh phi deimoa talou süvu? 29Sübütoua baie, kinapa maivei chapfü hi talouyu mai nasü; honapaiye deiyu mai sü souvea peimoa panou talai moe. 30Mai linou houzüyu vanou maivei vaotou louzü, mai nou puhye ngaora moe. 31Anou puhye mainou nüloure touyu thaisü, puhsü deida anai hai zholai; puhvei ki hi buyu na veishi peilai-a bailai. 32Ana maiye sapayu mai nasü tsülia hare; puhsü lahye soushi lou-a baie. 33Puhsü zhizhu louyu alia tsükhou hayu ngaoa bailai, alia puhsü teisa nou hraongu pfüa bailai. 34Daiolouzü ngaoraiyu hai nanou mai livei lekha daipa-a baiwe, alia puhnou khüngu phouyu phaki, halia phapei laimoe. 35Puhnou seihla peia aetoulai moe, alia deida alao peiyuma rukhalai moe.
Currently Selected:
TSÜCHITAO 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
