TSÜCHITAO 5
5
Sheemoyu alia Chilee moyu hi Aetimoyu
1Anahna, avei tsüveiyu hi leloulo, avei tsüsüyu hi nevei nou pfüreilo. 2Sütou louzü nenou kabüa zhaidou veiyu hinou hrüloulai touyu hai süloulai, alia ne hai tsüveiwe touyu sü nevei chipao hinou ngaoloulai. 3Chilee moyu naotumai livei mütai hai laivoudzü büa zümou malae, alia honapai vei mümu peiyu hai oliv theadzü büa bumalae, 4ana akhai hiwo puh sü khasü büa bailai, ae hovai haivai heipfüyu khoche büa bailai. 5Honapai nou neye sü sapoa thaimai vei teidei hi hota bailai; honapai nou tayu ludu hai thaimai vei ludu baie. 6Hanapai hai hriyu maivei ludu hi tawu moe; ana chaochao soua holo hailo haota-a baiwe, ae daidai vepawe touyu hai sücha moe.
7Oh anahmaitaore, achi keilo, alia avei chipaotao sü ngaikhaiso. 8Ne ludu sü honapai hinou doushoa khailo, alia honapai vei ki hisü tanghi kouso! 9Nenou sükua soure toulouzü nevei khekai hai mai hi peia bailai, alia ne sü zhuvea hayu mai bah hinou nahle sho-a thai bailai. 10Shikho moyu maiye panou nevei nangi khesü pota more donou, ae nenou teroua soukhai touyu khesü mai kukhe livei soumore donou; 11alia ne hrü akhai hi kou nevei souke ae vasou sü hatayu thainou levea dongai pfülai, 12alia nenou haibüa paolai, “E daisounou tukha peiyu sü ngaora baidesa? Alia Eye deipeiyu nasü daisounou ngaophou moa bairesa? 13Eye dou-apei mai pai Enou keilo more. Eye paodou peiyu mai hi anou pfürei loumoa baire. 14Esü chuo maisou hrohinou haongu ngao-a bure.”
15Ne lah nevei dzübvü hinou dzü ke-a baio, lahvei dzükhao hinou pa dzü küa baio. 16Nevei dzüla sü panou vakou kürata-a bailaivu, süsü panou duva kinou külaiwu? 17Sütaosü panou lah nevei souloua baio, panou neye shikhomo maivei souwuso. 18Nevei dzünghou sü shiha ngaolouyu sü soulo, alia nahle-a buki nevei chapfü hinou asayu sü souloua baio— 19zhainga veiyu ae hüvei shoyu kho-shu lou ali bülo. Panou puhvei lesha nou neye phabusa jüpa nou phoulo, honapai vei lesha naye teisa nou hralo. 20Anahna, ne daisounou chilee moyu naotu kukhe liye hralai? Ne daisounou kukhe mai livei maipfüye sü thainü laige? 21Daiolouzü mai livei ludutao sü Mapao nou ngaokhai touwe. Nenou tayu ludu teitei sü puhnou zhu-a bue. 22Maishiyu mai nou lahvi mah hinou muloua bailai, alia lah nou soukhai touyu mahtao hinou beloua bailai. 23Puletao sü lahye tukha hayu vanou thai-a baiwe. Puletao sü voyu vanou hakata-a baiwe.
Currently Selected:
TSÜCHITAO 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
