TSÜCHITAO 31
31
Vemaiye Paodou Peiyu
1Chipao haitao hai Veo Lemuel vei pfünou puhye paodou peiyu chitaoe:
2“Ne hai Enou leshi shoyu anahpoutue, Enou veachi paoyu chila nasüe. Enou ne hisü dai-e paopeilai? 3Nevei khouko sü naotumai hi peisouo, vemaiye souhare ludu hilao tasouo. 4Sükhesü vemai donou moe, O Lemuel, vemai hai zhaoh soyu kao moe, zhaoh sü vemai linou thainüyu kaomoe. 5Puhmaitao nou zhaoh sore touyu thaisü, chikhatao hai ngai-a bailai, alia maikhe maitao hi souzü vahtao hai souche peimoa poreilai-a bailai. 6Zhaoh hai thailaiyu maitao hi peio, alia le pepoa buyu mai hi peio; 7puletaoye panou soloua puletao vei touhayu ae veahoyu nasü ngaiwuo.
8“Chi paolou sümoa buyu maitao donou chi paopeio. Veahoa laiyu maitao vei zü sü vupeio. 9Puletao thaosoua chi paopeio ae checheyu hinou chiku peio. Touha sohayu maitao vei zü vupeio.”
Lamo Shoyu Maipfü
10Maipfü veili hai thaonou ngaolou süe? Puhsü mutei chuh jünou mutei puhie.
11Puhvei khapuo nou honapai ye louchewe, alia puhsü touha sohalai moe.
12Hopainou puh hisü vah veih soupeiwe, hopai vei hrüsasü hashi soukhai toulai moe.
13Honapai nou kounou shopoa nou soumaisah alia züzüyu sabanü sü souloua banouwe.
14Honapai nou huha souyu maivei dzüluki ali büa ki hisü touso hai pove peiwe.
15Honapai nou teithemo-a buki nou kushu loue, ae puh kikhamaiye touso soupeiwe, alia kilai mai hi vah lüpeiwe.
16Honapai nou ki-lu khesü zhuloua hülouwe, lahnou kuluyu sana nou darkha kipei soulouwe.
17Honapai nou khya sü khochü touloua puh baokao sü soukhou louwe.
18Honapai nou puhvei na sü huhpa bue touyu rai-a sülouwe, honapai vei meivabvü sü khei teile hi-a ngheitu moe.
19Honapai bah sü louhmü hi khaiwe, alia lah vei sabanü sü daoloua baiwe.
20Honapai hai touha sohayu mai hi lülah veihshoe.
21Honapai nou puh kikhamai donou vürah ye ngaopi moe, daiolouzü puhnou lah kikhamaiye donou banoure sabanü rai-a tuda khaiwure.
22Honapai hai lahvei züsah rülouwe, ae kikha maiye sabanü veisho-a tupeiwe.
23Honapai vei maipuo hai mainou shiha loua baiwe, ae puh sü nuh hi matsüyu maitao hrohi loulouwe.
24Honapai nou veishoyu sabanü ae khyakho khesü souloua huha souyu mai hi zolouwe.
25Honapai sü khouko bue ae mainou tsükhou peiwe, alia honapai nou vere teithe donou ngaopiyu hae.
26Honapai hai chipao lako aveih ae ratsü loua chi pao-a baiwe.
27Honapai nou puh kikhamai vei ludu sü zhutou louwe, alia sato touwu moe.
28Puhvei nahmaitao nou puhye hra ngaolouyu pai tea kuwe, honapai vei khapuo nou puhye sü paoshowe.
29“Veishoyu naotumai alao bue, ana puletao mai hrülai jünou ne-a veihkae,” tea puhnou paoe.
30Mainü nanou souvo peiwe, alia hüveiyu hai hako baie, ana Mapao ye piyu naotu maiye paosho züo.
31Honapai nou soupfüyu vah teitei sü puh hi buu peikhaio, alia mai hrülai nou puhye sü paosho züe.
Currently Selected:
TSÜCHITAO 31: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
