TSÜCHITAO 30
30
Agur vei Chipaotao
1Chipao haitao hai Jakeh nahpoutu Agur vei chipaotao-e:
“Ramai sü Eye koa bumoe, Ramai sü ahi ha-e,
ae E sü souloure khouko lia hare.#30.1 Hebrew hi sheesha moe.
2Cheche vuzünou Ewo maili soure donou chemoe,
Ahio mai linou pfüyu tsü-a ha-e.
3Enou tsüvei doulou more,
ae Enou Ramai vanou haliro sülou more.
4Thaonou raki hi khewu-a khaikou louyu bue?
Thaonou teikhaiye puh bah hinou pojü louyu bue?
Thaonou sah hinou dzü beh louyu buge?
Thaonou deiphao kainghou veishi soushu loue?
Nenou sülouzü, puh zhih sü thaotoue? Puh nahpoutu sü thaoge?
5“Ramai vei chipao veishi nou cheche-a baie! Puhvei vuapei phouyu mai sü puh hai rü büa bue. 6Puhnou paomoyu chipao lihai puhnou paowe tea paolouzü, Puhnou neye souvea peia bailai alia neye dayu maili soua poloua bailai.”
Tsüchi Kukhetao
7Oh Ramai, ne hinou E na ahai kholai; sühaisü E thaimo jünou pa ngaolouyu sü soupeio: 8Ahinou dayu nasü doushoa polai peio; alia Eye touha shoyua moa toungi shoyua peiso; Eye rukhalou süyu touso sü peio. 9Hakinou E hai toungi sholou louzü, neye malaiwua “Mapao sü thaoe?” tea paoshulai. Mokhaia E hai touha sholouzü, maivei vaota-a avei Ramai zhih sü soushi shulai.
10Kilai mai aliye puhvei paopu nghoujü hinou paoshiso, paolouzü puhnou neye chaa peishulai, ae ne sü mahyu hi loushulai.
11Lah puo ye chaayu alia lah pfüye paosho moyu mai-a bue.
12Lah nghithou hinou sheesha touyu mai-a bue, ana puh sü lah vei houshi hinou khüshee loumoe.
13Lahye veisho-a choyu mai bue, alia puhnou lahye daizhou koute veisa tea cho-e!
14Kamai-o puhmai huh hai khoche büa buyu mai bue, kamai huh-o kaiti büa puletao nou deiphao hi touha-sohayu maitaoye souhalai tea bue.
15Vaa hai nahnaotu ahai bue, ae puhai zhih sü “Eye peio,” tea sapei khaitoue.
Rukha khaimoyu na adai bue:
16Rabedushao,
nahapfü vei nahbvü,
teirü jüpa-a buyu dei the,
alia nulouhoyu meikei.
17Puo maiye ngaoheiyu maitao alia tsükhaivu payu thai pfü maiye ngaophou moyu maitaoye sü lüche panou toulouyu kaobaie, moyuma rashopeiki panou puletao vei nghithou sü daola pa-a kaobaie.
18Na asü hai Eye donou khupa shore; adai nasü Enou sülou hore:
19Lüche nou tei hinou zhaoyu,
nghou nou chuhlya hinou tayu,
dzüluki nou zai pei hinou ludu phouloua tayu,
alia naotu maili ae poutu maili leshi louyu haitaoe.
20Chilih moyu maipfü linou haibüa hrüwe: honapai nou khulou vah soulouyu thai, dzü khüloua haibüa paoe, “Enou vah mahlia soumoe!”
21Na asü khehinou deiphao sü nguwe; ae adai na puhnou healou hore:
22qila mai linou pa vekou louyu,
vomai linou tounüyu veishi toulouyu,
23lesha hayu naotumai linou maipuo ngaolouyu,
alia kilaipai nou paopai buh pa thaolouyu haitaoe.
24Deiphao hi taishoyu hrikhaona adai bue, ana sütao hai tsüdo veishowe:
25Chasei: puletao hai lülouhoyu khaona touli baie, ana puhtao nou teilü kinou touso pojü louwe.
26Chukhaotu: puhtao-a lülouhoyu khaonatou baie, ana puhmai nou chuhlya hinou ki soubuwe.
27Khazü: puhtao hisü veo hae, ana puhtao nou me souloua zhaotawe.
28Harakiki: nenou puhye sü bah nou nülou süe, ana puhtao hai veo vei ki hinou ve bu-a baiwe.
29Na adai hai puletao nou tayu zhai ngaoloua ngaovei showe:
30Kipeikhaodu hai soukhaonatao hinou khoukayu khaona alie ae halia ngaopi chamoe;
31Nghitsü,
Dulapo-a tayu houdzü,
alia veo nou puhvei maitao nghoujü nou phika kayu.#30.31 Phoure 31 nahai Hebrew hi sheesha moe.
32Hakinou ne hai avomai lisoua lahnou lahye kushoa tsücho-a bulouzü, moyuma hashi soure donou roh-a bulouzü, ne bah sünou ne mü hi thoulo. 33Daiolouzü chonaodzü hai vapei khaige, chonaodzüke popalouwe. Nenou maili vei nghou dapeiyu phaki zhe pawe, alia lekha daipa peikhaie, züveiyu pawe.
Currently Selected:
TSÜCHITAO 30: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
