KOPAODOUWO 1
1
Emai Hrü hai Hamako baie
1Kopaodouwo, David nahpoutu, Jerusalem hi veo vei chipao sü haitaoe.
2Hamako vei hamako tea Kodouwo nou paoe. Hamako vei hamako! Hali hala hai hamako baie. 3Maili nou teinghi khenou vah terou-a souyu hai dai patouyu bue? 4Khaphao ali tawe, alia khaphao ali vewe, ana deiphao louzü teisa nou bubaie. 5Teinghi pawe alia teinghi louwe, alia puhnou payu buh hi thashoa tabaiwe. 6Teikhai nou kheko hükouwe, alia reikou haopoa khewe; haokhai khai-a teikhai nou tawe, alia puh vei bolu hisü dakhai louta baiwe. 7Reitou teitei nou zaidu hi külouwe, ana zaidu sü phoutu moe; reitou nou küyu buh hisü, puhtao nou küpu dakhaiwe. 8Hali hala hai veayu nou phouwe; mai ali nou süsü paohao louhoe; nghithou nou ngaoyu taonou khawumoe, nyou-a chouyu taonou phouwu moe. 9Daoh nou daibüa bue sünasü haithai-a sübüa bua bailai, alia haithai soulaina-a daie souwure sünasü baie, teinghi kheh hinou halia ashu hae. 10“Zhukhaio haihai ashu-e” tea paolou veiyu na aliro buhae? Sünasü maiphaophao jünou bure, Etao hrüvemo jünou rai-a bure. 11Daorai maitaoye lichoyu hae, na-a vere maitao-a puletao jünou na-a nou vere maitao nou lichoyu hai bulai moe.
Kopaodouwo nou Puh Hrü hinou Vedaoyu
12Kopaodouwo, E hai Jerusalem hinou Israel mai pei hi veo soure. 13Alia raki kheh hinou souyu vahtao hai tsü-avei nou poa phoupa loure donou atsüle hai-a peie; maiye pa zohashoa buyu hai, puhtaoye Ramai nou peiyu lesa moyu vah li-e. 14Teinghi khehnou souyu vah lilihai Enou ngaowure; alia zhukhaio, hai teitei hai hamako baie, ae teikhaiye huhyu ali baie. 15Khiyu nasü souzü louhoe, alia hayu nasü cholou shie.
16E lah ahi paoe, “E hai tsüvei shore, ajünou rai-a Jerusalem hi buyu mai hrülai jünou la-a tsüveipuhie; alia tsüveihyu ae tsüsüyu hai daie touyu Enou süloue.” 17Alia voyu ae vavayu süloure donou atsü peie. Enou süloue süolouzü, hai hai-a teikhaiye ngouyu baie. 18Daiolouzü, tsüvei alao buyu hisü rarou hai-a alao bue, alia tsüsü pupayu puh hisü leveayu hai-a pupa baiwe.
Currently Selected:
KOPAODOUWO 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
