TSÜCHITAO 29
29
1Mainou züpei khaie, nou khoulailai payu mai nasü souveilou hoyu hi soushikou khaipeia bailai.
2Acheche mainou nuh teidei khasa-a bukhai-e, maikhe mai hai lesawe; ana mai ashimai nou tukha soukhaie, maikhe mai hai chorosoua bubaiwe.
3Tsüvei jüpayu mai nanou puoye sousava peiwe.
Ana khakhapfü taoye koa tayu hinou nangi soura hayu hai voyu vah baie.
4Vemai linou kaozü vanou tsüchoa bulouzü puhvei teidei hai duso palai, ana puhnou thoudzü likhei donou tsücho-a bailouzü puhvei teidei hai pepota-a baiwe.
5Mai linou puh kinapaye chechemoa paosho peiyu hai lah phi hi rüh southouyu büa baie.
6Maishiyu mai lisü lah vei mahtao vei rüh hinou muloua baiwe, ana achechemai liwo lado soua vasa-a nou bue.
7Achechemai linou touhamai livei zü süwe, ana maiashi mai linou süpaitea tsü hai sümoe.
8Maiye ngaoheiyu mailinou nuhdu sü mei shyao peiwe, ana tsüvei maiwo rarou nasü hulai peiwe.
9Tsüvei mai linou vomai liye veiva louzü, avona sü teisa nou rarou-a nüh-a baiwe; kaonayu sü lia bulai moe.
10Mai zhe teinüyu mainou tsüle sheeyu maiye ngaorawe, ana checheyu mainou puhvei hrirai vupa peiwe.#29.10 Hai nanou kaoyu phae vupa peiwe; Hebrew phouwe.
11Avomai linou puhvei lekha veishi nou paopa khaiwe, ana tsüveiyu mai liwo shamealoua lekha nasü khaloua baiwe.
12Teidei khoyu mai linou mahyuna chi kei peilouzü, puh khenou vahsoumai hrülai nou mai ashi soukhai ta-a bailai.
13Touhayu maina-a alia souvea peiyupua raibüyu ali bue; Mapao nou puhai mai ahai khihinou ava panou ngaoloure donou nghithou peikhei khaitoue.
14Vemai linou touhayu mai vei kaozü thaifüa chiku peilouzü, puhsü teile sho-a nuh teidei khasa-a hrükou loulai.
15Sühda ae tudei peiyu nah linou tsüvei peilai, ana lahdo souyu nah sünou puh pfüye hraongu pfüve peiwe.
16Mai ashimai nou khouko pfüyu phaki, mah souyu mai poupawe; ana puletao nou kaodu tayu sü acheche mainou ngaolai.
17Ne nahye tukha toulo, sükulouzü puhnou neye soyu peilai; puhnou neye sousava peilai.
18Ramai chipao hayu buh hisü, maikhe mainou shameayu ha-e, ana Ramai vei chikha züyu mai sü vasayu maitao-e!
19Chipao nou paodou peiyu likhei nou kilai mailiye souzü peilou hoe, daiolouzü puhnou süyuma popeilai moe.
20Tsücho moa chi paohahayu mailia ne ngaoho moe? Sükuyu mai sü vomai nou areih bupu hie.
21Kilai mai liye taibu kinou puhnou jüpayu khaikho soupei louzü, akhai hio puh vei kikaa thaolou bailai.
22Rarouyu mai linou souzüvei peiwe, alia lekha shimai lisü mah alao souloua baiwe.
23Mai livei khaophu nanou puhye ponakou bailai, ana tainouti souyu mai nanou khuhaoyu sü ngaoloulai.
24Vaomai liye koa pasouyu pusü puhye ngaoba kayu maina-e. Puhnou chikuyu buh hinou checheyu chi paopei louzü neye tudeelai, alia paomo louzü Ramai nou chaa peilai.
25Maiye piyu haio rüh hi lou-a baiwe, ana Mapao ye louche-a bulouzü zhouvei-a bailai.
26Mai hrülai nou aduso maivei jüpa sounüe, ana Mapao hinou mai linou kaozü nasü ngaolouwe.
27Mai ashi maiye sü acheche mainou ngaora-e, ae acheche maiye mai ashimai nou ngaora-e.
Currently Selected:
TSÜCHITAO 29: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
