TSÜCHITAO 28
28
1Mai nou thaihu moyuma mai ashi maiwo tuta-a baiwe, ana achechemai louzü kipeikhaoduo büa khuveie.
2Teidei linou kaozü moyu mah soukhaie, süthai-apeimai alao pa-a baiwe; ana teidei sühi süthai-apei maitao hai tsüsüyu ae tsüdo buyu thaio, teile sosho-a kaona-a buloulai.
3Khouko buyu mai linou touhamai liye souveayu haiwo teikhai teirü ashi nou routhou hüraiyu büa baie.
4Chikha ye ngaophou moyu mai nasü mai ashi maiye paosho-a baie; ana chikha züyu maitao louzü puletaoye duwe.
5Maishi mainou kaozü nasü sülou moe, ana Mapao ye thoyu mainou sünasü sütou toulouwe.
6Tsüle sheesha teanou touhayu mai nanou kaozümo soua toungiyu maina jünou veipu hie.
7Chikha züyu nahlemai nasü tsüvei-e, ana thoulou moyu maiye samai souyu nah linou puoye hrao soupeiwe.
8Pousha vea souloua toungi louyu mai vei nangi khesü, touhayu maiye zhuvea peilaiyu maina donou pojü khaipeia baie.
9Chikha zümoyu mai linou veachi paoyu hai, Ramai nou puhvei veachi sü keira sho-a bailai.
10Maicheyu maiye süthai poa ashi hi thoupeiyu puhsü lah vei kaobvü hi deloua bailai.
Mah hayu mainawo louzü veishoyu buu peilai.
11Toungi maiwo lahnou lahye tsüveiwe tea cho-a baiwe, ana tsüsüyu touhamai nanou puh jünou süpu hie.
12Acheche mailinou reih veilou khaie, sühisü dushoa savayu bue; ana mai ashi nanou dusopa khaie, maikhemai sü tutsüta-a baiwe.
13Lah vei mahtao pokuyu puh sü duso palai moe, ana mah lawu-a vah ashi khesü thaokhaiyu mai sü zhuvea ngaoloulai.
14Teisa nou Mapao ye piyu mai nasü sava-a hrüloulai, ana le khouyu puh sü veahoyu hi deloua bailai.
15Mai ashi mai linou nuh teidei khoyu phaki, touhayu maiye donou kipeikhaodu nou rayu moa khushoyu vuhkü ali büa baie.
16Tsüsü hayu tukha soumai lisü zhaipou shisho-a souveayu sü baie; ana cheche moyu naye ngaorayu puh sü puh hrü souso louwe.
17Mah zhe vei kou pfü maisü panou athai koute veatheo, mai lia panou puhye soukha peiso.
18Chilih cheche-a tayu puh sü kaozhou veia taloulai, ana kaozümo ludu hinou tayu puhsü kaobvü hi deloulai.
19Kounou shopoa vah souyu mai sü toure alao bulai, ana komoyu liye thaihua buyu puh sü touha bailai.
20Louchelou veiyu mai nasü vasa-a nou puhvei hrü hai hrüche loulai, ana thasho-a nou toungi nüyu maisü souvea peimoa panou talai moe.
21Mai zhai zhu-a soukuyu hai veimoe, ana chiku peiyu mai kamai louzü seihla titouli hinoua mah ta-a baiwe.
22Toteiyu mai linou toungire donou tu-a laiwe, anou touhayu nou puh pei hi velaire touyu hai puhnou sümoe.
23Maiye züa nou souzü peiyu nanou, haithai hi, maiye paovei paosho peiyu najünou maivei jüpa hai ngaopu loulai.
24Pfüpuo maivei vaolou-a “Hai louzü mah moe,” tea paoyu puhsü avomai kukhe jünou veipu moe.
25Tounü kayu mai linou züveiyu sü soupa peiwe, ana Mapao ye lülouche louyu maiye sü soungi peilai.
26Lahnou tsüchoyu naye loucheyu puhsü vomai li baie. Tsüvei puyu maili vei paodou peiyu sü züloua kaozhou vei-a bulou baio.
27Touhayu maiye peiyu puh sü chelou jülai moe, ana nghithou pfüvaiyu puhsü chaa alao ngaolai.
28Mai ashi nanou khouko bukhe khaie, maikhe maisü tuchü ta-a baiwe, ana puletao nou hata khaie, achechemai nou poupalai.
Currently Selected:
TSÜCHITAO 28: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
