TSÜCHITAO 26
26
1Teilüki vüra kouyu alia chachiyu phaki teirüyu büa tsükhou peiyu hai vomai li donou thaomoe.
2Ngaozü moyu chaa hai taohbu ha-a yaolaiyu raohoutao büa baie.
3Süü hai rhei donoue, mükha hai rheisühye donoue alia süüda hai vomai donoue.
4Nenou vomai liye puhnou nouyu thaifüa chila peilouzü, ne-a voyu süna bütoua baie.
5Vomai liye puhvei kaozümo thaifüa chila peikhaio, sükulouzü puhnou lahye tsüveiwe tea choyu nasü kaomore touyu hai süloulai.
6Vomai li bah hinou ko seitayu mai nasü lah puh phi jüdeloua baie, ae lah nou veahoyu sü poveloua baie.
7Vomai livei tsüchi haio shovaiyu maivei phibah büa bubaie.
8Vomai liye tsükhou peiyu mai nasü louka hi louthou khipa khaiyu büa baie.
9Vomai linou tsüchi paoyu hai zhaoh sozhiyu mai linou shuh hai bah hinou polaiyu bütoua baie.
10Mai linou ludu hinou tayu vomai moa zhaoh sozhiyu mai liye ngapoa vah souyu hai voulou kayu mai linou mai hrülaiye zhi peiyu büa baie.#26.10 Phoure 10 nahai Hebrew hi sheesha moe.
11Vomai linou kaozümo vah soukhai khaiyu hai sei linou rühpa khaitou hi khailou touyu büa baie.
12Mai lia lah nou lahye tsüveiwe tea choyu ngaoho moe? Sübüyu mai hai vomai li hi-a areih bupu hie.
13Heakayu mai nanou paoe, “Duva hisü chipeikhaodu bue! Ludu hisü chipeikhaodu bue!”
14Kikhu ali hai vanü (kabacha) hi khizhu khaitouyu büa heakayu mai liwo züphao hinou dakou dakhe-a bubaiwe.
15Heakamai nasü puh bah hai likhao hinou thaithou khaitua puh mü hi pokhe thoure donou hikei-a baiwe.
16Heakayu mai linou lahye veishoa chila peitou toulou süyu tsüvei mai anai jünoua tsüveipu hie tea choe.
17Mainou züvayu li hi louzhoyu hai hao-a laiyu sei ali nou daoyu büa baie.
18-19Mai ali nou mai aliye süthaimah peiyu thainou, süsü Enou müzha baie tea paoyu mai nasü vomai linou thailou veiyu basei poa koyu büa baie.
20Süü chüthou moyu thaio, mei sü heita-a bailai; alia maichi paoshiyu hayu buh hisü züveiyu ha-a bailai.
21Meivi nou meibvü hi souyu büa ae süü nou mei deikeiyu büa mai shimai nou sha southou peiwe.
22Maichi paoshiyu hai vashore! Etao nou sünasü jüpa shopoa nou zhaothouwe!
23Müvei müthea nou ashi tsüle pfüyu mai hai naili aliye peivavayu dzünou nahokhai touyu büa baie.
24Veikhokho souyu mai ali hai puhnou ngaora-a buyu nasü puhvei chipao lako aveih sünou pokuloua baiwe. 25Puhnou chi lako veishoa paoyuma, puhye loucheso, daiolouzü puhvei lekhe hisü ngaorayu tya anai bue. 26Puhnou ngaorayu nasü do dusho-a nou poku louyuma, puhvei ashi nasü maisou vejüyu buh hinou pophao papeia bailai.
27Deibvü raoyu mai nasü sühi deloua bailai, alia chuh khaodu tayu maina hisü ludakhai poa ve-a bailai.
28Dayu chi paoposhu daishi peikhai touyu naye ngaorawe, alia sei-jüyu mü sünou pa hakare vah souwe.
Currently Selected:
TSÜCHITAO 26: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
