TSÜCHITAO 25
25
Solomon vei Tsüchi Kukhetao
1Haitao-a Solomon vei tsüchitaoe, Judah hi Veo Hezekiah vei larü rüyu maitao nou rükhai toue.
2Pokukhai touyu nasü Ramai vei khouko ava nasüe, ana vemai kathe louzü popa ngaopeiyu nasü noue.
3Tei nou kuyu büa ae zaidzü nou thouyu büa vemai vei tsüle hai phoupa louhoe.
4Shahu hinou komoyu hubatao polaiwuo, sütaosü hukupu donou likhao soululai. 5Mai ashimai hai vemai nghoujü hinou hulaiwo, sütoulouzü puhvei vebuh sü acheche hinou soushu loulai.
6Ne lah vemai nghoujü hi talou lasouo, moa adumai buh hi pa lasouo. 7Daiolouzü nevei buh nasü ne jünou veipuyu mai ali hi peio tea paoyu jünou neye buh haina tapa polo tea paoyu nanou veipu hie.
8Nenou ngaoyu nasü thalasou chikubu hi popaha tisouo; daiolouzü akhai hi ne kinapa mainou neye hrao soupeiyu phaki ne daisoulai?
9Kinapa maiye vamoyu bulouzü, ne hai lah vamoyu nasü phaloua baio, maivei kheichi sü vakou paopa phaoso. 10Sükumo louzü mai hrülai nou neye kheichi pokulou sümoyu mai ali baie tea paoshulai, alia ne sü hraongu pfüa ne zhih shiyu sü akhai halai.
11Thaohsho-a chipao li paoyu hai sana nou souyu phoshi ali shahu khao hi thoukhai touyu büe.
12Tsüvei shoyu mai linou paopiyu hai kei louyu mai lisü veikayu sana nou soukhai touyu bahkha moa zhusana jünou veipu hie.
13Louchelou veiyu kopomai ali hai puhye seita peiyu maitao donou chachiyu phaki, kaoshoyu vürah dzü büa souhrivaa peiwe.
14Peilai tea paohkhai toua peimoyu mai nasü, teirü pfümoyu teihao moa teikhei büa baie.
15Shamea süyu poa vemai liye taih lousüe, alia chilako aveih linou sourao koutea souphe peilou süe.
16Nenou laivoudzü ngaolouzü, ne lah tou thao toulou-a baio; toupoule louzü ne sü rüpa-a bailai. 17Ne kinapa mai ki hi talaiho buba leso, molouzü puhnou neye sa-a choshulai ae neye ngaorata shulai.
18Lah kinapa hi da-a lah-apei mai lisü thailou veiyu reih basei, süübou moa khoche, moa vouloushuh büa baie.
19Lühayu mai liye veahoyu teile hi loucheyu hai hu shiyu moa shovaiyu mai li büa baie.
20Leveayu maili hi lou sou peiyu hai tei kaoyu teile hi na phapeiyu büa baie, alia vazhimü hi tai napeiyu büa baie.
21Neye ngaobayu mai nanou hroua bulouzü, puhye khaoto patoulo; alia puhnou rei louzü, puh ye dzü pei-a pa kelouo. 22Sükulouzü puh pei hi meithou khaipeiyu büa bailai, alia Mapao nou neye buu peilai.
23Reilova vei teikhai nou teirü pfüve peiyu büa mai thailo nou maichi paoshiyu mai sü lekha rarou pfüve peiwe.
24Züvei süyu naotu liye koa ki ali hinou bure jüwo ki shatouli hinou hrüyu nou veipu hie.
25Kadou kounou ko aveih chouyu haisü, rei shoyu phaki dzükao paili keyu bütoue.
26Acheche mai linou mai ashimai liye lou zho-a bo phou peiyu hai kühyu dzünghou moa sheemoyu dzüla li büa baie.
27Laivoudzü alao touyu hai veimoe, südonou shohpeiyu chipao hai lailo.#25.27 Hebrew hi sheesha toumoe.
28Lahnou lahye tukhalou hoyu mai lisü pepotayu alia kaoro lia ha-a buyu nuhdu büa baie.
Currently Selected:
TSÜCHITAO 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
