TSÜCHITAO 24
24
Tsüchi Kiakü
1Mai ashi maiye thainüso, moa puletao ye koa bunüso. 2Daiolouzü puletao vei tsüle hio shodo ashi phou-a baiwe, alia puletao nou mü hepayu chüsü maiye soushi peia baiwe.
Tsüchi Kai
3Ratsü nou ki sü soulouwe, alia tsüsüyu nou süsü soushu palouwe. 4Tsüdo nou muteihyu alia veishoyu chingi taonou poh-a kide taosü phoulouwe.
Tsüchi Kaili
5Tsüveiyu mai li hai khouko bumaili jünou veipu hie, alia tsüdo buyu maili hai pfüchi bumai jünou kopu hie. 6Daiolouzü tsüveiyu süthaiapei vanou ne reih soulou süe, alia paodou-apei mai alao bulouzü reih sü veilouyu bue.
Tsüchi Kaihai
7Ratsü hai vomai donou süloure hai tateih sho-e. Puletao nou tateiyu chi phayu phaki, chi lia paolou hoe.
Tsüchi Kaisü
8Hashi soure donou tsüchoda-a bukou teyu mai nasü vahshi soupuna tea kulai. 9Kaozümo do phouyu hai mah-e, alia maiye ngaoheiyu nasü mainou ngaora-a bailai.
Tsüchi Kaidai
10Rako shiyu teithe zhou ne zhai shitayu thaio, nevei pfüchi tousü titya baie.
Tsüchi Kaingou
11Southalai tea satayu maiye sü taho vupa peio; dathayu buh hinou hralou-a delou laiyu mai sü nükhai papeio. 12Nenou haisü nevei vah moe tea pao-a mala-e, ana Ramai nou nevei tsüle sü süwe ae neye chikulai. Puhnou neye süwe ae neye zhua nou bue. Alia puhnou neye nenou soupfü khaitouyu vah thaifüa buu peilai.
Tsüchi Kairou
13Anahna, laivoudzü toukhaio, daiolouzü haisü veie, alia laivoudzü pho hinou zaokouyu hai touvei shoe. 14Ratsü hai nevei hrü donou sübütoue; nenou süsü ngaolouyu thaisü haithai donou ne hi areih sü bue, ae nevei areih sünasü soudewu laimoe.
Tsüchi Kainai
15Acheche maivei kibu soushire donou mai ashimai büa dazüa kho-a busouo, puh ki hisü zhaipou shitya souso. 16Daiolouzü acheche mai liwo bakha anai koute kaodu tayuma lashu loua baiwe; ana mai ashimai louzü veahoyu veyu phaki hakata-a bailai.
Tsüchi Kaicha
17Neye ngaobayu mainou kaodu tayu phaki asah souso, alia puhnou phi hralouyu phaki ne lesaso; 18molouzü Mapao nou ngaoloua ne hi vamoyu soushulai, alia puh hinou puhvei lekha nasü pfürei tashulai.
Tsüchi Kaikü
19Hashi soumai donou ne pikhai tisouo, alia mai ashi maiye thainüso; 20daiolouzü mai ashi maisü thaikhai hi halia hae, mai ashimai vei meivabvü sü souhei bailai.
Tsüchi Shirou
21Anahna, Mapao ye alia vemaiye tsükhoulo. Puhaiye khaityayu maiye sü koa vah souzhoso; 22sükuyu maiye hisü hakatayu hai thashoa velu veie. Ramai nou moa vemai nou kabüa soushi peishulai touyu sü ne sülou süvu?
Tsüchi Kukhetao
23Haitao-a tsüvei mainou paoyu chipaoe:
Chikuyu hi soukuyu hai veimoe. 24Mai ashimai na hi “Ne mah hae” tea paoyu nasü, maikhe mainou chaalai, alia tyahrütao nou ngaoralai; 25ana mai ashi maiye züpeiyu maisü savayu ngaolai, alia hra aveih khesü puletao hi bulai.
26Tsüle sheesha tea nou chila peiyu hai cheche-a sapokha souwe touyu vei shee alie.
27Nenou dou sü souda loumojü ae kabüa ne hriloulai touyu khesü souda loumojü, ne ki sü souso.
28Kaomoa nou ne kinapa maiye dashaki soupeiso, alia maiye süthaimah peire chipao sü paoso. 29Haibüa paoso, “Puhnou ahi soupeiyu büa E-a puh hi soupeilai; puhnou ahi souyu na thaifüa Enou puh pao khapeilai.”
30Enou shakawo vei doupe hi tachokoue, tsühayu maili vei darkha kipei pe hi tapoa koue; 31alia zhukhaio, sühisü rai-shuh nou chüpa bouchü loure; alia dei sü ngubetao nou pa phouloure, alia sünavei chuh nou kivo khokhai touyu khesü pesasa tare. 32Süthaisü Enou ngaoloua tsüchoe; Enou zhuloua paodou peiyu khesü süloue. 33Dazü kholoulai hie, zhikho touloulai hie, bah khyapoa sokho touloulai hie tea bulouzü, 34touha sohayu nou haolai mai ali büa ne hisü ve-a bailai, alia nevei jüpa nou reihmai ali büa velai.
Currently Selected:
TSÜCHITAO 24: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
