TSÜCHITAO 23
23
Tsüchi Arouna
1Nenou aduso mailiye koa toulai tea buyuki, ne nghoujü hi dai bue touyu zhutou louo. 2Ne hai tonghou shiyu mai alie toulouzü soutaosoua lah neye tukhalo. 3Nenou puhvei touveiyu touso nasü jüpa shosouo, daiolouzü sünanou neye soushi peilou veie.
Tsüchi Anaina
4Chingi ngaoloure donou teroua vah soula lesouo; phibah khailoure donou tsüvei cholo. 5Nevei nangi khesü mei keipha touyu ali hinou hatalou veie, süna hai sükhaimoa shouh pfülou-a lüche büa tei hi zhaokhe ta-a bailai.
Tsüchi Acha
6Toteiyu mai livei raokhao tousouo; puhvei touveiyu natao sü jüpaso. 7“Talou toupulo” tea puhnou ne hisü paowe, ana puh lekhe hisü sübümoe. Puh sü puhnou tsücho-a buyu nasü baie. 8Nenou touthou khaitouyu khesü rüpawu bailai, alia nevei chipao lako aveih khesü hamako bailai.
Tsüchi Akü
9Vomai ali hi chipao aveih paore donou tesouo; daiolouzü puhnou nevei tsüchitao sü ngaophoulai moe.
Tsüchi Kirou
10Puopao maivei deirai chuh polaiso, moa pfüpuo hayu maivei deirai taisouo. 11Daiolouzü puletaoye Vupa-apeio nasü khoushoe; Puhnou puletao donou neletaoye dulai.
Tsüchi Kiali
12Paodou-apeio vei chipao khesü soutaosoua keilo, alia nenou tsüdo chipao khesü doulou süyu koute doulo.
Tsüchi Kiahai
13Nahmai aliye tukha nümoyu sü sousouo; nenou puhye süra nou dayuma puhsü thailai moe. 14Nenou puhye süra nou dapei louzü, nenou puhye rabedushao hinou puhvei hrü hai vupaloulai.
Tsüchi Kiasü
15Anahna, nenou tsüvei louzü, Esü savalai. 16Nenou tsüsü chipao paolouzü, Esü lesa sholai.
Tsüchi Kiadai
17Mah souyu maiye thainü souo; ana newo Mapao ye piyu hinou teithetsü lichopoa hrülo. 18Cheche vuzünou sühisü thaikhai veilai, alia nevei areih nasü soude laihwulai moe.
Tsüchi Kiangou
19Keilo, anahna, alia tsüveilo, alia nevei tsüle hai nenou hrüpfüa tayu ludu nasü soutaosoua cholouo. 20Zhaoh sozhiyu mai hrohi moa tohou shiyu maitao hrohi busouo; 21Daiolouzü sozhiyu mai alia tohou shiyu mai sü touha-a bailai, alia pfünüyu nanou mai liye sahhea nou banou peia bailai.
Tsüchi Kiarou
22Neye napeiyu ne puo pai keilo, alia ne pfü tsüpayu phaki, puhye ngaophou moyu souso.
23Acheche nasü hülo, ae sünasü zolaiso; tsüvei, paodou-apei, alia tsüsü taosü hülouo.
24Acheche mai livei puo sü lesa sholai, nah tsüvei ali nalou nasü puh hinou sayu soulai.
25Ne pfüpuoye panou ne vanou khaophu soulo, alia ne pfüye panou lesalo.
Tsüchi Kianai
26Anahna, nevei tsüle sü Eye peio, ae nevei nghithou sü avei ludu sü zhulo. 27Khakhapfü ae chilee moyu naotumai hai thailou veiyu rüh baie. 28Honapai nou maivei shaomai büa dazüa khowe alia mai taoliye sü soumah peiwure.
Tsüchi Kiacha
29Thaomai nou dopfüwe? Thaomai nou leveage? Thaomai nou pepo-a bue? Thaomai nou nolealea-a chi pao-a buwe? Thaomai nou nghithou homara-a buge? 30Teile poulao zhaoh sozhi-a laiyu maitao, zhaoh lathou hrüloua solai tea buyu maitao-e. 31Zhaoh hai homara-a buyu phaki, pai hinou reipha phayu ki alia lavü kouyu phaki zhaoh sü zhuso. 32Akhai hisü sünanou nghou büa daolai, alia laih büa keipei-a bailai. 33Ne nghithou sü sheemoyu na ngaopalai, alia ne sü kaomoyu chi paopalai. 34Ne sü zai touchü hinou soubu soua dazüyu mai li büa bailai, dzüluki vei haosah deka peinou pa züyu mai li büa bailai. 35“Puletao nou Eye da-a phare,” tea nenou paolai, “Eye mainou da-a phare, ana Enou sülou more. Daisounou E hai kushulou hodesa? E zhaoh pai kukhe li phoutalai.”
Currently Selected:
TSÜCHITAO 23: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
