TSÜCHITAO 22
22
1Zhih aveih nou laiho toungiyu noulai dolo tea paolouzü, zhih aveih nanou doloua baio.
2Toungi na-a ae touha na-a koa dao bailai; Mapao nou puletao mai hrülaiye sü soupeia baie.
3Souzü süyu nawo kaozhoushi vere ngaolou-a tuchü louwe; ana chaome souwo louzü süna hi tapokou süna veayu dao-a baiwe.
4Tainou souyu alia Mapao ye piyu vei buu louzü tourai ngiyu, khuhaohyu alia hriyu nasüe.
5Rai-shuh alia rüh southou khaitouyu nasü kaozümo maivei ludu hisü bue; lahnou lahye kholouyu maisü sütao hinou tavai talouwe.
6Nahtou liye puhnou tazü douyu ludu hinou douzüpa peio, sütoulouzü puhnou tsüpayu phaki-a sütao hinou tarei talai moe.
7Toungi nanou touhana peinou tukha souwe, alia maivei poupaoh louyu mai nasü pouapei navei kilai baie.
8Kaozümo thou vuhthouyu mai nasü veahoyu chachi bailai, alia puhvei lekhayu süüra nasü shita-a bailai.
9Lela veiyu maiye sü hra peilai, daiolouzü puhnou puhvei touso hai touhayu maiye koa zhitouwe.
10Maiye ngaoheiyu maitaoye sü hulaiwuo, sütoulouzü züveiyu-a ta-a bailai, alia züvayu ae chi ashi paoyua ha-a bailai.
11Tsüle sheesha touyu ae chipao lako aveih paoyu mai nasü, veo vei samai sou-a bulai.
12 Mapao nou tsüdoye sü zhu-a nou khopeiwe, ana puhnou lühayu navei chipao sü popa laihwu baiwe.
13Heakayu mainou paoe, “Kipah hi chipeikhaodu bue! Eye lududo hinou southawu bailai.”
14Cheche moyu naotu livei mü sü thoushoyu kaobvü alie; Mapao nou rarouyu mai nasü sühi delou bailai.
15Kaozü moyu sü nahmai vei tsüle hi bue, ana tukha souyu sünou sükhesü puh hinou hulailoua baiwe.
16Lah chingi ngaopu loure donou touha maiye souveayu, moa toungi maiye peiyu nasü, lah touhata-a bailai.
17Keilo, Enou tsüvei mainou paoyu chipao khesü ne hi doupeilai. Puletao vei dou-apei khesü ne le hi pothou khailo, 18nenou sütao hai licholoua poa vah souta louzü, savayu nasü nenou ngaoloulai. 19Enou nevei lüloucheyu nasü Mapao hi panou bulou nüwe; südonou chu Enou sütao hai ne hi paongao peilai. 20Enou neye donou chipao shirou hai rüpei khaitoue. Sütao hisü paodou-apei alia tsüdo aveih khesü louwe, 21ae neye kaoyu ae checheyu sü doupeilai. Süthaisü neye seitayu maitao hisü nenou checheyu chila sü peiloulai.
Tsüchi Araina
22Touha maivei shaosouo, daiolouzü puhsü halia hae, moyuma vea-a bumaiye robomü hinou pahshi soupeisouo.
23Daiolouzü Mapao nou puhmaiye sü phaobo peilai alia puletaoye soupira peiyu maiye sü puhnou sübüa soupeilai.
Tsüchi Ahaina
24Lekha shiyu moa zhaipou shiyu maiye samai sousouo, moa lekha-a laiyu maiye koa tasouo.
25Molouzü ne-a puhvei zhaidou doulou shulai alia rüh hinou ne-a lah lou muhlou bailai.
Tsüchi Asüna
26Mai paoh pfüyu maili vei müpfü khaiso, molouzü ne-a mai pao pfüyu mai souta shulai.
27Nenou paohkhai touyu nasü khalou hoyu thaisü, puletao nou nevei züphao sü pota-a bailai.
Tsüchi Adaina
28Paipaoh maivei deirai chuh sü poda laisouo.
Tsüchi Angouna
29Ne vah soulousü shoyu mai lia ngaoho moe? Puhsü vemai nghoujü hinou la-a bubailai; puhsü züdou moyu mai nghoujü hinou la-a bulai moe.
Currently Selected:
TSÜCHITAO 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
