TSÜCHITAO 1
1
Tsüdo vei Muh
1Tsüchi haitao hai David nahpoutu, Israel mai hi veo Solomon vei tsüchitao-e.
2Tsüchi haitao hai neye panou ratsü ae paodou peiyu, alia tsünghei chipaotao sü panou soutaosou süloure donoue. 3Soulou süyu, acheche, zü alia kaoluyu haitao vei paodou peiyu poloure donou; 4chaomeh soumaiye kaozü soupeire donou, nahlemai hi tsüdo alia doro soupeire donou, 5tsüveina-a keilou-a süpu loure donou, tsüsümai-a sou-kai ngaoloure donou, 6tsüchilee alia zhuzhaili süloure donou, tsüvei mai chipao alia dokai chi süloure donou 7Mapao ye piyu hai tsüdo vei beih-e; Avomai nou tsüvei alia paodou peiyu sü ngaophou moe.
Nahlemai hi Paodou Peiyu
8Keilo, anahna, ne puo nou paodou peiyu, alia ne pfü nou doupeiyu sü loubasouo. 9Daiolouzü sütaonou neye donou hüveiyu poupa raizao lie, alia ne ngu donou touh-e.
10Anahna, mahmainou neye jülouzü, aetou souo. 11Puletao nou haibüa paolouzü, “Khe, Etao koa maiye southare donou chaolai! Etao koa mah hayu mai-a kheia soushi peire donou dahlai khe! 12Rabedushao büa Etao koa puletaoye hria zhaolou laikhe, alia puletaoye lia shomoa teitei nou belou laikhe. 13Mutei na veishi Etao nou ngaoloulai; Etao ki hi shaolou-a pove phoutao loulai. 14Nevei na buyu veishi Etao hrohi laithouwuo, Etao shabvü ali soua bailai.”
15Anahna, puletao ye koa ludu tazhoso. Puletao hinou ne tarei tavai talo. 16Daiolouzü puletao phi hai ashi hi tuho baie, alia puletao nou maiye southayu hi thashoe. 17Daiolouzü nüloulai tea buyu raohou ngheingao hinou besah laiyu hai hako baie; 18sükuyuma, mai haitaowo lah puletaoye muloure donou rüh southouwe, lah puletaoye southa loure rüh southoua baie. 19Zhaipou shia nou ngaolouyu vei ludu sü haibüa baie, sünanou puletao vei hrü sü pota-a baiwe.
Tsü-aveio nou Kuyu
20Keilo! Tsüveio nou kijüdu hinou shusoua shawe, hupobu kinou pai chia shapoa kuwe; 21ludu hinou puhnou shawe, nuhdu vei rokhubomü hinou puhnou paowe;
22“Oh voyu maitaore! Neletao daisounou chaomeh souzhouzhou-a bulaige? Teile kashoa neletao nou tsüveiye sü konüa bulai? Alia hrüpeyu taonou tsüdoye ngaora-a bulaige? 23Enou tudee peiyu chi keitoulo; Enou avei tsütao sü ne hi lapa peilai; Enou avei chipaotao sü neye pa süloulai. 24Daiolouzü Enou neye kue, ana nenou kei peiba-a baire, abah-a thaipa peie, anou mailia poba zhuba-a baire. 25Enou paodou peiyu khesü nenou sümo khokhosoua baire, alia Enou tudee peiyu chitao sü nenou lia popei bare. 26Südonou ne hi veahoyu veyu phaki, alia ne hi teikhai teiro ashi veyu phaki E-a neye konülai; 27ngaopiyu nou ne hi rüraipao büa veyuki, ae tsühayu alia veahoyu nou ne hi teikhai teirü ashi büa veyu phaki Enou neye sü konü peilai. 28Süphaki nenou Eye kulai, sükuyuma Enou chila peilai moe. Lenousou-a nenou Eye phoutalai, sükuyuma nenou Eye ngaolou laimoe. 29Daiolouzü nenou tsüdoye ngaorawude, alia Mapao ye piyu hai dolou more. 30Enou paodou peiyu hai nenou lia ponü more, alia Enou tudee peiyu chi veishi sü nenou ngaophou more. 31Südonou nenou lah nevei shithou sü toulai, alia lah nevei jüpa vahtao soukhai touyu hinou veahoyu sü ngaolai. 32Daiolouzü chaomeh souyu nasü lah puhnou tsüvei nasü laiyu donou thai-a baie, alia hrüpeyu nasü chaochao souyu donou hakata-a baie. 33Ana achi keiyu maisü kaozhou veia hrülai, alia kaozhou ashi naye piyu ha-a zokei-a hrülai.”
Currently Selected:
TSÜCHITAO 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
