TSÜCHITAO 19
19
1Kaozü moyu chipao-a ae vo-a laiyu maina jüwo louzü chilee chechea touhayu mai lia veipu hie.
2Mai linou tsüdo ha-a buyu hai veimoe, alia tharara-a tayu mai nanou ludu tamah baiwe.
3Mai linou züdou moyu soupfüa haka tayu phaki, puhnou rapa-a Mapao pei hi paodu-a bubaiwe.
4Nangi sünou samai ashu taoli save peiwe, ana touhayu mai liye samai khamai nou thaowua baiwe.
5Chikuyu buh hi da-a lah-apei mai nasü souvea peimoa pa talai moe, alia da-a chi paoyu mai nasü turei palou hoe.
6Mai hrülai nou lelah veiyu maina jüpa phouwe, alia mai hrülai nou maiye sapeina peisüyu naye samai sounüe.
7Touhayu mai naye thaihou jüraimai hrülai nou puhye ngaora-a baiwe; daizhou koute puhvei samaitao nou puh hinou hrotalai! Puhnou chipao lako aveih nou jüa thaihuyuma, puletaoye seilou moe.#19.7 Hebrew hi sheesha moe.
8Tsüvei ngaolouyu mai nasü lahye leshiwe; tsüsü khailouyu mai nasü duso palai.
9Da-a la-apei nasü souvea peimoa panou talai moe, alia dachi paoyu maisü hakata-a bailai.
10Vomai linou vasho-a hrüyu hai thao moe, alia kilai mai linou adusomai pei hi pa tukha souyu hai zhai moe.
11Tsüveiyu maili-o sososoua lekha baiwe. Mai linou puh hi soumah peiyu phaki, sünaye khaipeiyu hai veikayu nasüe.
12Vemai livei lekha hai chipeikhaoduo nou rayu büe, ana puhvei jüpa louzü pounghou pei hi vidzü koupeiyu büe.
13Voyu nahli hai pfüpuo donou soukanghi peiyu baie, alia chapfü shiyu-o ki zhaoyu büa baie.
14Ki alia chingi hai pfüpuo hinou kaathao loue, ana tsüsüyu chapfü louzü Mapao likhei nou peiloua bailai.
15Heaka nülouzü puhye panou heakha theo; zhinü louzü panou zhiwo, ana puhsü pouzüa bailai.
16Ramai vei chikha zü louyu maisü hrü sholai; sünaye ngaophou moyu mai sü thai-a bailai.
17Touhayu maiye zhuvea poupaoh peiyu hai Mapao hi poupaoh peiyu raibüa baie, Mapao nou puhye sü peidakhai-a bailai.
18Nahle-a bukinou ae doulousüa bukinou ne nahye tukhalo; nenou sübüa soulou moyu thaio, ne nahye panou shitare donou ne sü puhye soukha peia baie.
19Lekha shishoyu mai nasü puhye panou ngaozü nasü ngaolou theo; nenou puhye phapei louzü haithaia ne sü soupua bailai.
20Paongao peiyu keilo ae paodou-apei polouo, sükulouzü haithai ne sü tsüvei loulai.
21Mai ali vei tsü hisü chodayu hai alao bue, ana Mapao vei leli thaifüa soushu paloua bailai.
22Mai linou souzüyu hai chilee chechea hrüyu nasü baie,#19.22 Mai...baie; moa Du tounüyu hai mainou ngaora-a baiwe. dayu maili jüo touhayu mai-a veipu hie.
23 Mapao ye piyu nanou ahri hi süthai save peie; süna buyu mai sü vaphi tea soyu ngaolouwe; puh sü veayu vedaolai moe.
24Mai kamai-a heaka leyu donou touso koutea lah mü hi pokhe thounü moe.
25Maiye ngaoheiyu maiye dapeio, sütou louzü chaome souyu mai-a souzü nasü douloulai. Tsüsü mailiye souzü peio, sütou louzü puhnou tsüdo ngaopu loulai.
26Puoye souchoroyu ae lah pfüye hulaiyu mai nasü hrao soupeiyu alia souzüh-vei peiyu nah ali baie.
27Anahna, nenou paodou peiyu sü keibare touyu thaio, ne sü tsüdo vei chipao hinou tarei tare.
28Muh lia hayu lah-apei mai linou zü naye konüwe, alia mai shimai navei mü nou ashi touwe.
29Maiye ngaohiyu mai naye donou mah paodu peire donou souda chewure, alia vomai liye dapeire donou soudawure.
Currently Selected:
TSÜCHITAO 19: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
