TSÜCHITAO 20
20
1Zhaoh hai havei nya moe, zhoah sokhai-e maiye züva-a baiwe; südonou mai talia sünaye panou süthaimah peiyu mai sü tsü veimoe.
2Veo vei ngaopi shoyu lekha rarou nasü kipeikhaodu livei raah büe; puhye rasou payu mai nasü lah puhvei hrü hai souhaloua baie.
3Züveiyu hinou tavai talouyu maisü tsükhou louveie; ana vomai louzü züva-a bubailai.
4Heakayu mai nanou tahtayu teile hinou tathoulou moyu puhsü chaki halia chachi loulai moe.
5Mai livei tsüle hisü tsü hai thoushoyu dzübvü hinou dzü buyu raibüe, ana tsüvei mai linou süsü paipa loua bailai.
6Mai alao soumoa nou lah kukuvei veiyu ae chileeyu sü sha-a paowe, ana thao nou louchelou veiyu maiye ngaolou süe?
7Tsüle sheesha touyu ae kaozü vah souyu pou buyu nahmaitao hai daizhou koute rako veisa!
8Vemai linou chikuyu buh hinou buyu phaki puhnou veiyu shiyu teitei ngaokhai tilouwe.
9Thaonou “Avei tsüle-o soushee loure; Ewo mah hinou sheeshare” tea paolou süge?
10Sühdou mahyu alia kacho doumahyu ahai kheinou raibüa Mapao nou ngaorae.
11Nahmaitou koutea puh vah hinou puhnou souyu sü shilouwe; alia puh hai kao-e ae chechewe touyu sü sülouwe.
12Chouyu nyou alia ngaoyu nghithou, sühai kheinou Mapao nou soupeie.
13Zü-zhiyu ye leshawuso, ne touha shulai; ne nghithou hrüpalo, sütou louzü ne tounghi-a bailai.
14“Haire shie, taire shie,” tea na hrüyu nanou paoe; ana puhnou tayu thainou, khaosou khaiwe.
15Sana bue, alia muhtei chuh-a alao bue; ana tsüdo veiyu mai mütai-a muteipu hie.
16Mai ali vei sabanü polo, puhnou shimomai livei müpfü peiyu phaki, alia puhye chaa hinou mukhailo puhnou vakoumai donou müpfü peiyu phaki.
17Tsüle sheemoa ngaolouyu nasü chuo nenou touvei shoyu touso ali büa toua malae, ana nakouwo ne mü hai chuhsa touyu büa bailai.
18Tsüchoda taohai douzüapei nou soushu peiwe; tsüvei-a süthaiapei nou koa reih soupeiwe.
19Maiko paoshi-a laimai nou kheichi pophao peiwe; südonou chaochao soua chipao-a laiyu mai liye koa tasouo.
20Pfüpou maiye chaayu maisü puhye sü meivabvü souhei loua zhiteiyu buh khaiyu büa khai-a bailai.
21Talabou-a ngaolouyu nangi sü neye donou haveih lia soupeilai moe.
22“Enou ashina ye paohkha peilai” tea paoso, Mapao vei vu kholo, sütoulouzü Puhnou neye soukha peilai.
23Tsüle sheemoa sühdou peiyu ae kaomoa kacho doupeiyu maiye sü Mapao nou ngaora-e.
24Mai livei phika sü Mapao nou lüpei-a baie; süthaisü daibüa mai linou puh ludu sü sükulou khailaige?
25Ramai hi posheela peilai tea chaachou soumo jünou rai-a tsücho toulou raio, sükumo louzü ne sü lengai-a bailai.
26Tsüveiyu vemai linou soumah khaitouyu maitaoye sü phoupaloua bailai, ae puhnou zhuveayu ha-a tudei pei-a bailai.
27Mai alivei rako hai Mapao vei meivabvü baie, puhvei lekhe teitei po-a nou phoulou baiwe.
28Chi züyu ae louchelou veiyu sünou veo yesü pokhai peiwe, alia puhvei vebuh sü acheche nou pfülapa peiwe.
29Nahle maivei savayu ae veiyu hai puhmai vei pfüchi-e, ana tsümai livei hüveiyu haiwo puhmai vei peipao-e.
30Zhime dapa peiyu bahkha nou ashi ye polai peiwe; hekhokho peiyu nanou vasou khevai loute soushee peiwe.
Currently Selected:
TSÜCHITAO 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
