TSÜCHITAO 17
17
1Züvei-a buyu ki li hinou khonüh nüa buyu jüolouzü kaonaphi teanou khoto müsha ali touyu nou veipu hie.
2Tsüveiyu qila mai linou hraongu vah soua laiyu puhvei paopu nah peinou tukha soulai; alia puhnou chinamai ali büa kaathao zholoulai.
3Shahu alia sana hai meinou dei-a zhuwe, alia maivei tsüle hai Mapao nou zhuwe.
4Vah ashi souyu maisü maishiyu mai chi keiwe; alia dayu maisü shodo ashi soumai vei chi keiwe.
5Touhayu maiye konüyu maisü puletaoye soupeiyu Ramai ye ngaohei-a baie; mai linou veahoyu vedaoyu phaki lesayu maiye sü tudee vuzülai.
6Tyaomaitao hai paipaoh maivei peirüe, alia nahmai vei kathe sü puletao vei puo maitao-e.
7Tsükhoulou veiyu mainou dachi paocha moe, ae vomai nou koyu chi lia pao chamoe.
8Seihla pei-a buyu nanou sünasü kheikhupa chuh ali büa louchewe, puhnou buliki veyuma veisodu soulouwe.
9Maikhe maiye panou neye jüpa-a leshi nülouzü, puletao nou soumah khaitouyu khesü khaipeio. Mainou soumah khaitouyu khesü licho-a bukou teyu hai samai khamaiye soukho-a baiwe.
10Tsüsü mai hi bakha ali züpeiyu nanou vomai li hi bakha kaihli dapeiyu jünou veipu hie.
11Tobai soumoa souvea souroyu mai shimai hisü zhaipou shiyu kopomai ali büa athai sünou puletao hi velai.
12Vomai linou puhvei kaozümo soua daore jüwo puhye panou vuh toutu shaolouyu vuhkü ye nou daobaio.
13Mai linou haveih soupeiyu thaosü hashi nou khapei louzü, ashi sünou puh ki hinou talaikhai tilai moe.
14Züvei parai hiwo dzü dekhai touyu zaibvü hinou dzü tsütayu büa baie; südonou züva pamo jünou tavai lou-a baio.
15Mai ashimai ye panou talouyu moa acheche maiye paoshi peiyu mai ahai khinou Mapao nou raibüa ngaorae.
16Tsüsüyu lia ha-a bulukhu daidonou vomai li bah hisü tsüvei hrüloure vei muh bukhai laige?
17Samai liye teisa nou leshi-a baiwe, ae thaihou china mai liwo veahoyu phaki babou khare donou bue.
18Tsü hayu mai linou chaachou souwe, ae kinapamai nghoujü nou maivei müpfü peia baiwe.
19Chohla tanüyu mai nasü züveiyu jüpae; kikhu souku payu#17.19 kikhu souku payu; moa toungiwe tea mai hi soungaoyu. mai nasü haka tayu phouwe.
20Kheirei tsüpfüyu mai lisü dusopa laimoe, alia kaozü moyu müli pfüyu mai sü veayu hi delou bailai.
21Tsühayu nah ali hai puo vei leveayu sü baie; alia avomai li vei puo sü lesayu hae.
22Savayu lüthou lisü pou aveih lie, ana levea koutea buyu hio sososoua southayu nasü baie.
23Maishi mai liwo seihla peiyu polou-a zü nasü soumah peia baiwe.
24Tsüsüyu mai linou puh pahsü tsüvei hilo pfüreiwe, ana vomai vei nghithouwo deiphao akhai hi zhua baiwe.
25Voyu nah liwo puh puo le souvea peiwe, alia puhye napeiyu pfüye panou dongai pfüa baiwe.
26Acheche mai hi zhotouyu hai veimoe; dusomai liye süüda nou dayu hai mah-e.
27Lah vei chipao tukha louyu maisü tsüdo bue, alia tsüle kaonayu maisü tsüsüyu mai-e.
28Vomai li koute-a raokhai timoa buyu thaio puhsü tsüveiyu mai pha-e tea chopeia bailai.
Currently Selected:
TSÜCHITAO 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
