TSÜCHITAO 16
16
1Tsücho dayu haio mai zha-e, ana chila peilaio Mapao veie.
2Mai li vei vah haso veishi hai puh nghithou hio louzü khaotou tea baiwe, ana Mapao louzü puhvei tsüle nou zhua baiwe.
3Nevei vah sü Mapao hi thaothoulo, sütou louzü nevei chodayu veishi sü souche loulai.
4 Mapao nou hateitei hai vah bukhai-a soukhai toue, mai ashimai koute-a panou veahore donou soukhai toue.
5Zhaipou shiyu mai hrülaiye Mapao nou ngaora-e, cheche vuzünou puletaoye sü souvea peimoa panou taloulai moe.
6Chi züyu ae louchelou veiyu vanou mah sü khailu peilai. Mapao ye piyu mai sü panou hashi daolai moe.
7Mai linou Mapao vei jüpa souloure touyu thaio, puhnou puhvei ngaobamai koute-a samai soulouwe.
8Kaozü moyu hinou nangi alao ngaolouyu najüwo, cheche hinou titya ngaolouyu nanou veipu hie.
9Mai ali nou tsüchodawe, ana Mapao nou puhvei phika süthaita peiwe.
10Ramai nou zhopeiyu vemai ali hio, puhnou chikuyu phaki mah soumoe.
11Cheche-a sühdouyu ae macha hinou kadouyu alia tsüle sheesha tea huha souyu hai Mapao nou jüpa-e.
12Vemai nou hashi souyu hai ngaorayu alie,#16.12 Vemai...ngaorayu alie; moa Hashi souyu khesü vemai nou meathou louhoe. daiolouzü vebuh hai acheche hinou soushupa khaitoue.
13Checheyu hai vemai vei jüpae, alia puhnou cheche chi paoyu nasü leshie.
14Veo vei rarou hai thaiyu ko pfümai ali büe, ana tsüvei mai linou süsü soukhai loulai.
15Vemai livei pah vayu hisü ahri bue, alia puhnou jüpayu hisü houki teirü pfüve peiyu teihao büe.
16Ratsü ngaolouyu nanou sana ngaolouyu najünou veipu hie, shahu ngaolai jüwo tsüsü nanou dolo.
17Checheyu mai vei ludu-o ashi hinou tarei talouwe, lah ludu zhutou louyu puhsü puhvei hrü hai khailupa loulai.
18Khaophu soupa khai-e hakata baiwe, ae rochi lekhai-e kaotayu nou rai-a baie.
19Tainoutou soua touha-a buyu nanou khaophu soua maivei shaolouyu navei zhiloua kuku-a buyu jünou veipu hie.
20Paodou peiyu chipao keilouyu maisü duso palai, alia Mapao ye lülou cheyu maisü lesayu maie.
21Tsüveiyu naye sükulou süyu mai tea kuwe, alia keiveiyu chipao sünou maiye pa thai-nüyu soupu peiwe.
22Tsüvei maiye donou ratsü hai ahri vei dzülae, ana voyu maiye paodouyu hai hamako baie.
23Hasüyu mai hai raomo jünou tsücho louwe, alia puletao vei chipao hisü maiye panou keinüyu hai thoupu louwe.
24Keiveiyu chipao haiwo laivoudzü büwe — kei veishoe alia pfüphao-a souvei peiwe.
25Mai linou ludu haina hai kaore tea tsücho-a buyuma, sünasü akhai hi kou thailou veiyu ludu soulou veie.
26Vah soumai livei müzhoyu sünou puhye panou vah soupu louwe, daiolouzü puhnou houzüyu haina sü rukha soulou nüe.
27Muh hayu mailinou shodo ashi souwe, alia puhvei chipao hai soushoyu mei ali büe.
28Kaozümo soumai linou zü-veiyu polata peiwe, alia kheichi paoyu mailinou sah-po khaye pora peiwe.
29Zhaipou shiyu mailiwo puh kinapaye lalouwe, alia puhye hashi hi süthou peiwe.
30Nghimai chouyu maisü kaozü moyu tsü chodawe, mütai muchi louyu mai nanou hashiye pa lata-a baiwe.
31Peipaoyu hai aveih sodu soulouyu vei peirüe; hrümai shoyu nasü acheche mai vei buu-e.
32Heamea süyu nanou khouko buyu mai jünou veipu hie. Lahye tukha lousüyu nanou nuhdu veishi khasa-a buyu jünou veipu hie.
33Maikhe mainou Ramai vei leli nasü rako dazhuwe, ana chila peilaiyuo Mapao pha baie.
Currently Selected:
TSÜCHITAO 16: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
