TSÜCHITAO 15
15
1Veitou-a nou chila peiyu linou lekhayu sü soukhai peiwe, ana rarayu chipao linou lekha soupa peiwe.
2Tsüveimai linou chi paoyu phaki, puletao nou tsüdo sü panou veisho-a ngaowe, ana vomai müwo kaozü moyu chipao pao-a baiwe.
3 Mapao vei nghithou sü veishi hi zhuwe; ashi alia aveih teitei nou zhu poa bue.
4Chipao lako veiyu sünou ahri pove peiwe, ana chipao lako ashi nanou maivei tsüle souphe baiwe.
5Voyu maili hai puh puo nou paodou peiyu khesü ngaophou moe, ana tudee peiyu zülouyu mai nasü tsüveie.
6Acheche maivei ki hisü nangi alao bue, ana mai ashimai vei nangi sü veaho vedaoyu phaki souhakhai baiwe.
7Tsüdo aveih haisü tsüveiyu mainou polata peiwe, voyu mainou soumoe.
8Mai ashimai livei posheelayu hai Mapao nou ngaora-e, ana mai veiyu livei veachi sü puhnou jüpae.
9Mai ashimai vei ludu sü Mapao nou ngaorae, ana checheyu phoua laiyu maiye puhnou leshi-e.
10Kaomoyu vah souyu maisü tatei sho-a souvea peilai; deiapei ngaorayu maina sü thai-a bailai.
11Thaimai buh hi koute-a Mapao nou daibue touyu veishi sü ngaokhai touwe; süthaisü kabüa mai linou tsüchoyu khesü Ramai hinou pokulou khailaige?
12Maiye ngaohiyu mai liwo maiye panou souzü peinü moe; puletao hai tsüveiyu mai hinou kabülai touyu sü nouba-e.
13Maikhe mainou vasayu phaki nüwe, ana leveayu phaki zhu veimoe.
14Tsüsüyu mai livei tsüle haio tsüdoye phouwe, ana vomai li-o kaozümo nou tou-a laiwe.
15Veahoyu maili hai teisa nou tero koute-a bubaie, ana savayu maiwo tobai soumo-a khonüh nüwe.
16Touha-a buyuma Mapao ye piyu hai nanou toungi-a veahoyu maina jünou veipu hie.
17Ngaorayu maiye koa touso veihli nou toua buyu jüo leshiyu maiye koa vupou nou toua buyu nou veipu hie.
18Lekha shimai linou radaipa peia züvei baiwe, ana shamea süyu mainou soukaona peiwe.
19Heakayu mai vei ludu sü shuhbe nou paohou loua baiwe, ana maicheyu mai vei ludu louzü ludu ka-e.
20Tsüveiyu nahmai nou puoye sousa peiwe, ana voyu mai liwo puh pfüye ngaophou moe.
21Kaozü moyu hai tsühayu maina donou lesayu alie, ana tsüsüyu mai liwo cheche-a tawe.
22Douzüapei mai hayu thaio choda-a buyu khesü mahta baiwe, ana paodou peiyu mai alao buyu thaio puhmai nou veiloulai.
23Kaotou touyu chila ali hai mai li donou sashoyu lie, alia teile thaotouyu chipaosü daizhou koute veisa!
24Tsüvei mai bo hai ahri hi tapo-a reikhewe, puhsü panou khekou thaimai buh hisü takoulai moe.
25 Mapao nou khaophu souyu maina vei ki sü soushi peilai, ana mimeamai vei deirai hai vupeiwe.
26Mai ashimai vei tsü hai Mapao nou ngaorae, ana lesheeyu mai vei chipao sü Puhnou kei veie.
27Zümo hinou dutou nüyu maina sü puh kikhahi veahoyu southoulou baiwe, ana seihla ngaorayu mai sü hriloulai.
28Acheche mai liwo kabüa chila peilai tea tsüchowe, ana maishi mai livei mü louzü hashi laapa baiwe,
29Mai aveih maivei veachi sü Mapaonou kei peiwe, ana maishi maivei louzü pomoe.
30Nghithou hi ava nanou lethouye sousa peiwe, ae ko veih nou souraoye sou hriva toupeiwe.
31Souzüre donou deipeiyu kei louyu maina sü tsüveie.
32Paodou-apei loubayu mai nasü lahye soushiloua baie, ana tudeiapei keilouyu mai nasü tsüsü ngaopu loulai.
33 Mapao ye piyu hai ratsü vei doupeiyu alie, alia tainou souyu hai tsükhouyu jünou rai-a tawe.
Currently Selected:
TSÜCHITAO 15: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
