PHILIPPIMAI 2
2
Khrista vei Nataiyu ea Du-shoyu
1Südonou Khrista hinou le soudu peiyu, puh leshinou le souva peiyu, Rako hilonou meimeyu, khu-leshi peiyu ea zhuvea peiyu tali bue toulouzü, 2süthaisü tsülikhei, leshi likhei ea roli-leli souloua Avei lesayu nasü souchekhou peiwo. 3Hatalia du tounü-a moa khaophu sounüa vah souso, ana alinou lihi nataipoa kukhe mainou lah neletao jünou veikouhie tea chopeio. 4Alia lah neletao vei lenouna donou likhei baimoa kukhemaivei lenouna-a zhulo. 5Khrista Jisu hi buyu tsü sünasü neletao hi-a bulo:
6Puhwo teisanou Ramai zhai pfüa bukhaia,
nutai nutsü-a Ramaiye dei-a hrülai tea puhnou chomoe.
7Ana puh lah ha teitei thaokhaiwu-a kila alivei
zhai pfüloua emai büa kou hrüloure.
8Alia emai zhai hinou ve ngaoloua puhsü natai-a hrüe ea thaiyu koute paoyu chi züe,
kros vanou thaiyu koute.
9Südonou Ramai nou puhye sü kukayu buh hi pokupa khaipeire ea puh hisü zhih teitei peinou buyu dukayu zhih nasü peiwure.
10Alia sübüa Jisu zhih hinou,
rakivahi, deiphao hi ea deiphao khehi buyu mai hrülaisü kou khou khülai,
11alia Puo Ramaiye paoshoa Jisu Khrista hai Mapaowo süe tea mai hrülai nou du-a paopalai.
Deiphao hinou Ava büa Vayu
12Südonou leshiyu Athaihou jürai maitao, Enou neletaoye koa bubuki neletao nou teisanou paoyu züyu sübüa, chu Enou neletao hinou dou-a buyu phaki-a Achi züpeiyu hai alaosou veikoushoe. Pi-hi-a lah neletao vei khailu peiyu süsü chekhoure donou thaokhaimoa vah soulo, 13daiolouzü Ramaiwo teisanou neletao hronou neletaoye panou züpa-a ea puhvei lelina thaifüa taloure donou vah soua bue.
14Ha teiteisü noulealeayu moa veivayu ha-a soulo, 15sübüa neletaosü ashi ea paoyu zübayu maikha hrohinou mah hayu ea sheeyu Ramai vei licheyu nahmaitao büa buloulai. Neletao hai puletao hrohinou ratei hi teivuhtao büa vapei-a buvu zülai, 16sübüa Khrista vei Teitheki hi Avei kathe souloure donou ahri chipao nasü poteia bulo, daiolouzü Esü raohanou tuyu moa te-a vah souyusü souwulai moe.
17Chechenou Azhehai posheelayu nali büa neletao lüvei sheelabuh hi popei louzü, süsü Eye donou lesabaie ea neletao hrülaiye koa lesabaie. 18Süzhaibüa neletao-a Eye koa lesa vuzülai ea neletao vei asah nasü Eye koa zha ngaozhokhaio.
Timothi ea Epaphroditas
19Neletao ko chouloua Eye le soudu peiloure donou, haisü Mapao Jisu vei lelinae toulouzü Enou Timothiye neletao hi thala-a seive peilai tea rei-a bue. 20Eye koa vea-vayu zha ngaozhoyu hai puh likhei baie ea chekhao-a puh hai neletao veiloure donou lenoushoa bue. 21Mai hrülaihai Jisu Khrista donou moa lah lah vah donou lenoua bubaie. 22Ana Timothi hai daizhozhou kosa, puhnou kazhaibüa Ko Aveina donou Eye koa puo-nah büa vah sousa touyu sü neletao lahnou sükhaia buwe. 23Südonou Eye donou ha teitei hai kabüa palaisa touyu sü süloubüzü Enou puhye neletao hi seivere rei-a bue. 24Alia lah E-a neletao hi thala-a veshulai tea Mapaowo hinou louche-a bue.
25Enou Eye koa vah souzhoyu ea reih züyu ea Enou moshilaiyuki neletao vei ko paomai büa Eye kuvah soupeiyu Eh thaihou jürai Epaphroditasye neletao hi seiveyu hai matsü bua malae tea choloure. 26Puhwo neletao hrülaiye daonüshoa bure, alia puh hai lishie touyu sü neletao nou choulouyu vanou puhsü levea-a bure. 27Chechenou puh hai soue ea thainore. Ana Ramai nou puh hisü zhuvea peire, alia puhye likhei baimoa Eye-a zhuvea peire, molouzü Esü veayu peinou vealaire. 28Südonou neletao nou puhye ngaopu louyu kisü neletao hai lesa loure donou, alia lah Avei veayuhai hatare donou, puhye neletao hi seiveyuhai Eye donou lenou koushoa bue. 29Südonou, Mapaowo hinou sayu pfüphounou koa puhye sü popeikhaio; alia puh büyumai hrülaiye sü tsükhou peikhaio, 30daiolouzü lah neletao koutenou-a Ahi peilou hoyu soukha nasü puhnou peiloure donou puh hrümaisü rakoshi daoyu pimoa vah soue ea Khrista vah donou puhsü thaiyu noure.
Currently Selected:
PHILIPPIMAI 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
