PHILIPPIMAI 3
3
Acheche Hrümai
1Akhai hinou, Athaihou jürai maitao, Mapaowo hinou sasa-a bulo. Enou raiki rüyutao rüpuyu vanou E vamoyu hae, alia sübüa souyu sü neletaoye donou veipue. 2Sei sütaoye zhutoulo, ashi vah souyu sütaoye zhutoulo, vasou vade vuzülai tea paoyu puletaoye sü zhutoulo. 3Acheche hee vadeyu ngaolouyu taosü Eletao baie, puletao moe; daiolouzü Eletaowo Ramaiye puhvei rako vanou puhye thowe ea Khrista Jisu ye koa ali soulouyu hinou sasa-a bue. Eletaowo vakou naanou taliye lü-a hrümoe. 4Sütoukhaia Eye donou sübüyu vakouvei nataoye louchelou veiyu bue. Maitalinou vakouvei naanou taoye louchelou veiyu bue tea cholouzü, Eye donou sübüa cholou veiyu qo alaosou veikoushoa bue. 5Ehai teithe acha tsüpayu kihinou hee rode-e. Pfüna hinou Esü Israel mai alie, Esü Benjamin khü hinou ve, Ebriamai nou nayu Ebriamai alie. Razhai hilonou zhulai toulouzü Esü Phariseemai alie, 6alia lenouyu hilonou paolai toulouzü Esü lüloumai meye souveayu mai alie. Cheche hrü hrüyu hilonou paolai toulouzü, Esü chaa ali-a hazheiyu mai alie. 7Ana Enou zhiloue tea cholouyu na teiteisü chuo Khristaye donou halia komoyu nataobaie tea Enou choloure. 8Chechenou na sütao likhei baimoe, ana muhtei koushoyu A Mapao Khrista Jisu vei tsü süna donou Enou ha teitei hai halia kokhaimoe tea choloure, puhye donou Enou ha teiteisü polaiwure; Enou Khristaye zhiloure donou sütao teiteisü nghouh büa choloure, 9alia sübüa souyu sü puhye koa alikhei souloure donoue. Razhai zülouyu vanou ngaolouyu lah Ahrümai chechena hare; ana chuo Ramai hinou veyu ea lü hinou soushu louyu Khristaye loucheyu vanou peikhai touyu Ahrümai chechena bue. 10Enou züpayu teitei sütaowo louzü Khristaye süyu, puh hrishuyuvei khouko sülouyu, puhvei veahoyu koa zha ngaozhoyu ea puhvei athai hinou koa puh büyu süsüe, 11süolouzü soulou veisa lah E-a athai hinou hrishu loure süsüe.
Rakiva Hilonou Kuyu
12Enou haisü ngaoche loure moa liche chekhou loure tea paomoe; ana süsü Enou lah Avei souloure donou nghojü hilo hupoa kouwe, daiolouzü Khrista Jisu nou Eye sü lah puhvei soupeire. 13Thaihou jürai khemai, Enou süsü lah Avei souloure tea chomoe; sütoukhaia Enou hali soua buyu sünawo louzü Athailova buyutao thaowu-a Anghojülova buyutaoye hupoa kouyu sünasüe. 14Südonou Enou Khrista Jisu hinou rakiva hilonou Ramai nou kuyuvei bu süna donou koyubuhmü hilova hupoa kouwe.
15Rako hilo vanou licheyu Eletao hrülainou haibüa chokhailai. Ana neletao kamainou takua cholouzü, Ramai nou süna-a neletao hi ngaopeilai. 16Sütoukhaia chu koute Eletao nou füa laiyu zhai sütao thaifüa Eletao nou nghojü hilo takoulou laikhe.
17Athaihou jürai khemai, Azhai douyumai soulouwo. Ehnou neletao hi cheche zhai soungao khaitouyu sütao thaifüa laiyu puletao hisü le peitou loukhaio. 18Raikinou haisü lüh taoli Enou neletao hi paowure, alia chu-a Enou haisü nghidzü noupu paopuwe, süolouzü Khrista kros vei ngaobamai büa hrüyu mai alaosou bue. 19Puletao vei akhai nasü ha-kayu baie, puletao ra nasü puletao poubaie. Puletao nou ahrao laiyu hinou kathe souwe, alia puletaosü deiphao hainavei natao likhei vanou cho-a bue. 20Sütoukhaia Eletaowo rakiva maitao baie, alia Eletaowo Ehye khailu-apeio Mapao Jisu Khrista nou raki vanou vekou laiyu sü zhishoa bue. 21Puhnou Eletao vei lülou hoyu thailouvei pfüphao nasü soudawulai ea puhnou ha teiteiye panou puh khehi hrülou süyu khouko sünasü seia pfüphao sütaosü lah puhvei vaveishoyu pfüphao sübüa souwulai.
Currently Selected:
PHILIPPIMAI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
