PHILIPPIMAI 1
1
1Khrista Jisu kilai Paul ea Timothi nou—
Philippi hi buyu lüloumaimevei süthai-apeimaitao ea vahlümaitao-a loua Khrista Jisu ye koa ali soulouyu sheeyumaitao hrülaihi rüwe:
2Ramai Eletao Puo ea Mapao Jisu Khrista nou neletaoye zhuvea ea kaonayu peiyu sü souloutheo.
Kalo Paoyu Veachi
3Enou neletaoye lichoyusasü neletaoye donou Enou Aramai hi kalo paowe; 4alia Enou neletao hrülai donou veachi paosasü, Enou sashoa veachi paowe 5daiolouzü shurai hinou chu koutesü neletao nou Ko Avei paodouyu kuvah hi Eye soukha peie. 6Alia neletao hrohi vah avei soushu peiyu Ramai puhnou süsü Khrista Jisu vei teitheki koute soucheloumo sasü koa soukoute peilai touyu sü Enou sütoupoa bue. 7Neletao hai teisanou Alekhe hinou bue! Alia sübüa neletaoye Alekhe hinou choa buyu sü Eye donou souzüshoe. Daiolouzü chu Enou hukhahi bubuki-a, Ko Aveinaye donou dua vah souloure donou madosoua hrübuki hi-a ea kukhemai hi süna vanou paodoupeia bubuki hi-a Ramai nou Ahi puhvei zhuvea peikhai touyu hisü neletao hrülainou koa zha ngaozho loure. 8Enou neletao hrülaiye lah Khrista Jisu puhvei leshana hinou leshibaie tea paoyuhai cheche-a paowe touyu sü Ramai nou Avei zhopaoh souwe.
9Alia Enou veachi paoa buyuwo louzü neletao vei leshiyuhai tsü chechena ea liche-a chikuyu naye koa dushupu lailaiyu sünasüe, 10sübüa neletao nou veiveilai nasü dolou sülai. Süthaisü neletao nou Khrista Teithe kisü sheemoyu ea cha buyu teitei hinou mado souloulai. 11Neletao hrümaisü Ramai kathe paoloure ea puhye paosho loure Jisu Khrista likhei hinou vebaiyu acheche vei rashithou sünanou phoupei loulai.
Hri-a buyu hai Khrista vei baie
12Athaihou jürai khemai, Enou neletaoye panou sülou nüwe, süolouzü Ahi pa-a buyu sütaonou chekhao-a Ko Aveina paodou puloure donou soukhasho peiwure. 13Süvanou, Ehai Khrista vei kilai aliyu donou hukhahi loubaie touyuhai reihmai fühaohi reihkhaomai taonou ea haihi buyu kukhe maitao hrülainou-a sükhaiwe. 14Alia Enou hukhahi louyu vanou thaihou jürai maitaoliye panou Mapaoye louche puloure, alia sübüa puletaosü Ramai chipao paodouyu hisü pikhai moa teisa nou khuvei pusho loure.
15Chechenou puletao kamaisü ngaoba-ngaoraiyu vanou Khrista ko paodouwe, ana kukhemaiwo le sheetoua paodouwe. 16Mai haitaowo leshi hinou paodouwe, daiolouzü Ramai nou Ahi Ko Aveinaye khotou loure vah peikhaitoue touyu sü puletao nou süwe. 17Ana raimaitaowo le sheetoua Khrista vanou paodoumoa, souphe-soukhoyu rako hinou paodoubaie; sübüa souyu hinou Enou hukhahi bubuki puletao nou Apei hi souveapu peilousüe tea chowe.
18Süsü halia moe! Süvanou Ewo le sabaie; ha zhaido tali hinou Khrista vanou paodou louyu, süsü khokho soubai-a, cheche-a paodou-a Ewo lesa-a bubailai, 19daiolouzü neletao vei veachipao ea Jisu Khrista vei Rako vanou soukha veyu vanou Ehai mado souloulai touyu sü Enou süwe. 20Enou züpashoa ea rei-a buwe süolouzü Eye panou hakia sou ahraowu laimoe, ana teisanou, alia koulihsoua chuo, Enou khuvei sholai, sübüa Ahrümai teiteinou Ehai hri-a, thai-a, Apfüphao hinou Khristaye khuhaoyu sü pongaolai. 21Eye donou hriyu hai Khrista baie, alia thaiyu hai louzü zhipubaie. 22Sütoukhaia Enou kezhe hinou hripua bue toulouzü, süsü Eye donou shithou shiloure te-a vah souyu sünasüe. Sübülouzü kana dolaisa touyuhai Enou paolouhoe. 23Südonou Ehai tsü ahai kole hinou ro saova-a buloure. Azüpanawo louzü hrü haina hai thaowu-a Khristaye koa ho buyu sünasüe, daiolouzü sünasü veikou shohie. 24Ana neletaoye donou Enou hri-a buyu nanou veikou shohie. 25Alia Ehai hripu shulaihie touyu sü louche-a neletao vei vah veipure ea lü hinou lesa-a buloure donou Ehai neletao hrülaiye koa hri-a bupushu laihie touyu sü Enou süwe, 26sübüa Enou neletao hi tave puyu vanou, neletao nou Khrista Jisu hinou Avanou alaosou paosho louresü buloulai.
Khrista vei Zhaido
27Chuo neletao hrümaihai Khrista vei Ko Aveinanou moshilaiyu zhaido süna thaifüa hrülo, sübüa Enou neletaoye tave zhulou süa, zhulou ho-a neletao hai aroh alikhei hinou koa latoupoa Ko Aveinavei lü süna donou tsü-leli soupoa reih züyu sünavei kosü Enou chouloulai. 28Neletao vei ngaobamaiye piwuso; teisanou khuveilo, alia sükuyu nanou puletao hisü neletao nou koloua puletaosü ha-kata bailai touyuvei shee nasü sheetoua soungaowe, daiolouzü neletaoye panou kolouyu hai Ramai hinou vebaie. 29Daiolouzü Khristaye donou neletao hisü puhye lü loucheyu likhei baimoa puhye donou veaho loure zhou aveina-a peikhaitoue. 30Chuo neletao nou Eye koa reih hisü zha ngaozhoa bure. Reih hainasü raiki neletao nou Enou züa buyu ngaoyu sünasüe, alia neletao nou chouyu büa, sünasü chukoute Enou züa buyu nasüe.
Currently Selected:
PHILIPPIMAI 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
