JOB 42
42
1Süthaisü Job nou Mapao hi chila peie.
Job
2 Mapao, ne sü hali hala soulou süe;
nenou sounü teitei sü soulousüe touyu Enou süe.
3E halia sümoyu mai ali soua daizhou koute khuvei-a nevei tsüdo aveih nasü paoshiwe tea nenou paoe.
Enou süve telou hoyu paitya vanou E chi paowure,
Enou süloure tatei shoa khupa souyu paitya donou chi paowure.
4Nenou ahi chi pao-a buyu phaki Eye panou ngasou bua keilo,
anou nenou paoyu vei chila peire donou telo tea nenou ahi paoe.
5Raichokio maikhe mainou ahi paopeiyu chitao süa baie,
ana chuo louzü anghithou vuzünou neye sü ngaoloure.
6Südonou chuo Enou paopayu chipaotao sü choloua E hrao shore,
ae chuo vounai alia konai hinou kou da-a nou E le daloure.
Akhai Chi
7 Mapao nou Job hi chi paore paopei cheyu thai, puhnou Eliphaz hi paoe, “E ne pei hi ae nevei samai ahai pei hi rarouwe, daiolouzü neletao avanou avei kilaio Job büa acheche-a chi paomoe. 8Südonou chode anai ae zhaotu anai poloua Job hi pfüve Job ye panou neletaoye donou naasou-a mei dei-a posheela peikhaio. Job nou neletaoye donou veachi paopeilai ae Enou puhvei veachi sü kei-nou pei-a neletao nou ngaozüa buyu hraongu nasü panou ngaolai moe. Job büa neletao hai Eye donou acheche chi paomoe.”
9Eliphaz, Bildad, alia Zophar puletao hai Mapao nou paoyu thaifüa soupeie, ae Mapao nou Job vei veachi sü keinou peie.
10Job nou puhvei samai asütao donou veachi paopeiyu thai, Mapao nou puhye sü panou kini nishoyu mai ali soupeia raichoki buyu kinitao jünou deida peipue. 11Job vei thaihou jürai mai hrülai, puhvei tulou maitao, alia raichoki puhvei samai khamaitao nou puh ki tave-a puhye koa nüh nüzhoe. Puletao nou Job vei veayu vanou zhuvea chi pao-a le sapa loure chi paopei-a pousha chichi alia sana bakha khesü pove peie.
12 Mapao nou Job ye raichoki ha peiyu jünou kou-a puhvei ha sü peie. Chuo Job vei zhaotu hai thekiadai, racho therou, cho pei thehai, ae rheisüh theli bure. 13Chuo puh vei nahpoutu anai, nahnaotu asü tea bue. 14Puhnou nahnaotu tsükhana zhih sü Jemimah, ahai chenapai zhih sü Keziah, ae asü chenapai zhih nou Keren Happuch tea sapeie.#42.14 Hebrew maila hi Job vei nahnaotu maitao zhih hai artha-a ae lakho-a veishoe. jemimah touyu artha nou “khao”; keziah touyu nou “cassia”, haina hai veishoyu poupa ali paowe ae poukai nüvei poa souwe; alia keren happuch touyu nou loumainah nou hüveire donou poa maiyu pou thouyu sübvü paowe. 15Deiphao hi naotu kukhe mai ali-a Job vei nahnaotu maitao büa hüvei moe. Job nou nahpoutu maitaoye koa kikaa nahnaotu maitao-a puhvei kikaa hai sü zhipeie.
16Job nou po kaihlia raidai mai-a nou puhvei tyao ae sholea koute ngao-a hrüe. 17Süthaisü puh hai tsü khaokhao-a thaire.
Currently Selected:
JOB 42: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
