JOB 41
41
1Ne khasühu alinou poa Leviathan khaonaye sülou süwu?
Mokhaia rai alinou puhvei mü-lee sü phulou süwu?
2Ne puhvei nghou hi rai thaithou lousüwu?
Mokhaia puhvei khou hinou hurai polou khilou süwu?
3Puhye phapeio tea ne hi kholaiwu?
Puhye zhuvea leshi peio tea ne hi paolaiwu?
4Puhnou neye koa vo soulaiwu?
Teisa nou nevei kuvah sou-a bailai tea ne hi puhnou chaachou soua paolaiwu?
5Ki hinou chiyu raohou ali büa puhye rai khikhai lousüwu,
mokhaia kilai naotu paiye panou sousava peiloure donou tea puhye nükhai lousüvu?
6Kha phouyu mainou puhye nüloua zholou süwu?
Huha soumai nou puhye datha loua vazho lousüwu?
7Ne puhnou tuchüyu buh hi khaphya nou phyalousüwu,
mokhaia khaphya hu nou puhvei pei kasha lousüvu?
8Vuli puhye dao-a ne puhye duyu thaio;
nenou puhye duyu nasü hakilia ngaikhai laimoe!
9Mai talia Leviathan khaona naye ngaolouyu maisü khupaloua kaota-a bailai.
10Puhvei lekha soupa peiyu thaisü, puh hai zhaipou shishoe;
mai talinoua puh nghoujü takou lalou pi-e.
11Thaonou puhye duloua hriyu bue?
Deiphao maili koute-a süsü soulou hoe.#41.11 Phoure 11 nahai Hebrew hi sheesha timoe.
12Leviathan vei phi vanou E ne hi paongaolai,
ae puh hai daizhou koute due alia khouwe touyu vanou paongao peilai.
13Mai lia puhvei hee hai laolou hoe,
mokhaia puhnou pfüa buyu puhvei reihna nasü khüthou louhoe.
14Thaonou puhvei mü souhepa lousüe,
ngaopi sho-a buyu puhvei hutao sü thaonou soungapa lousüe?
15Puhvei phaosü rüh nou shoshosoua soukhaitoue,
süsü dakhathou mutou khaitoua chuh büa khouwe.
16Alinou ali vei phao hi khouchi sho-a nou soumu khaitoue,
süko hisü teikhai ssü koute-a loulou hoe.
17Sütao teitei hai chisho-a nou soumu khaitouyu hai halinoua daokhopa louhoe.
18Puhnou shaoyu phaki mei keipha phawe,
alia puhvei nghithou hai teinghi nou phuyu büa reipha phawe.
19Puhvei mü hinou meikei sü reidzü küpayu büa küpawe,
20Puhvei nghou hinou meikhao sü khaopawe,
li ali khe hinou pouhou deipeiyu phaki meikhao payu büa pawe.
21Puhvei ssü haipa haithouyu hai mei houkei louwe,
meikei sü puhvei mü hinou taopawe.
22Puhvei ngurao hai khouchi shoe,
puhye ve dao-a ngaoyu mai hrülai sü ngaoposhu pi-shiwe.
23Puhvei hee hia khouchi moyu buhtou ali-a hae;
puhvei hee sü khouposhu hu büe.
24Puhvei chuh lethou hai halia piyu hae,
thou reiyu chuh ali büa khouchi shoa bue.
25Puhnou kushuyu phaki, khoukayu mai#41.25 khoukayu mai; moa rahtao. koute-a pi-shiwe,
puh hinou kou puletao hai hazholia moyu soua baiwe.
26Puhye zhi peilou süyu khoche ali-a hae;
puhye zhi peilou süyu nghou, moa voulou ali-a hae.
27Puhye donou hu sü rouvao büa baie,
ae baosahu sü ratayu ssü ali büa baie.
28Puhye huta loure loushu ali-a hae;
chuh nou poloua deiyuma rouvao potou alinou khyayu büa baie.
29Puh hisü hu süüpo ali hai rouvao to ali büa baiwe,
ae mainou puhye heung nou phyayu sü puhnou konüa baiwe.
30Puhvei pouvu hisü khouchi shoyu lipe zhai büyu khakao bue,
kao sütao nou dei naiti sü cho tata phou büa sheapa louwe.
31Puhnou dzü hi talou hea peikhaie dzü sü soupa-a baiwe,
theadzü khoyu li koyu büa zai dzü sü kopa-a baiwe.
32Puhnou tayu ludu sasü chatu poa tawe,
ae zai dzü hi puhnou lou tapei khaie,
zaidzü sü panou laroro pa-a baiwe.
33Deiphao hi hrikhaona ali-a puhye raiyu hae,
puh sü halia pi moyu khaona alie.
34Khaophu soushoyu hrikhaona koute-a puhnou ngaophou moe,
soukhaona teitei pei hi veo sü puhnou-e.
Currently Selected:
JOB 41: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
