JOB 39
39
1Deichi hi kho-lütao dukinou toutu touwe ne süho sümoe?
Shu nou toutu touyu ne ngaoho ngaomoe?
2Puletao nou khouh kizhou koute toutu hai pou hinou pfüwe?
Puletao nou toutuyu teile sü ne süho sümoe?
3Daisouyu teile hinou kü nou toutu toukou puletaoye deiphao hi khaipeiwe?
4Toutu taonou rekou nou dupaloua khouchi louwe;
sütea tayu thai dakhai vepu moa baiwe.
5Thaonou rheisüh ye panou lahdo soua phapeiwe?
Thaonou puh vei raiphu phipa peiwe?
6Mai hrümoyu deisa hi puhye panou bure donou Enou khaipeie,
ae tai buyu deikho hi Enou puhye panou touso phoutouyu buh soupeie.
7Mai pai maila khaikho chou-a buyu nuhdu hinou dousho-a panou ho hrüe,
mai talinoua puletaoye sheposhu maiko zhai louloua sa-a vah soulou hoe.
8Deichitao hinou puletao hai pou phou touwe,
poudai paitya phou-a puletao nou touwe.
9Rekou buyu chode ali nou nevei vah soupei laiwu?
Nevei chove hi puhnou aetea khei hai bupei laiwu?
10Puletao aliye nenou rai khiloua sa-a tatalou süwu?
Mokhaia puhnou chophou pfüa nevei dou shapei laiwu?
11Puhvei khouko ye louche-a nevei vah soure taosü panou soupeire donou puh hi thaothou peilou süe?
12Ne puhye sa-a nevei chathai hinou thou pojükhai touyu sü sa-a pfüve peilou süe tea chovu?
13Ostrik raohou nou puhvei shouh hai theashoa phawe,
ana houngukaa büa puletao hai zhaolou hoe.#39.13 Phoure 13 nahai Hebrew hi sheesha moe.
14Ostrik nou deiphi hi puhvei jüh jükhai-a vonai ye panou soulü peia baiwe.
15Mai nou moyuma rekhaona nou tave puhvei jüh taiphe shulai touyu vanou puh hai halia doyu hae.
16Puhvei jüh sü lah puhvei moyu büa hrüa baiwe;
puhnou veasho-a nou jüh jükhaitoue teanou tsüchoyu-a hae.
17Taibüa puhye panou voyu hai Enou soupeie,
Enou puh hi tsü southou peimoe.
18Ana puhnou tuyu hiolouzü puhnou rhei ye ngaophou moa konüwe.
19Job, rhei nou khouko bushoyu sü nenou soupeiwu,
ae puhvei phaotsümai nasü nenou southou peiwu?
20Rhei ye panou khazü büa chota louyu alia puhnou nghou phükhai-e mai koute-a piyu sü nenou soupeiwu?
21Puletao nou deikho hi baonou deipu-a puletao khouko teitei loua reihbuh hisü tulouwe.
22Puletao hai pibo sümoe,
alia khoche pia puletao hai dakhai tawumoe.
23Puletao nou pfüta-a buyu maitao vei baseitao sü teinghi khuhinou reiphapha poa tawe.
24Shabe nghou peiyu kho choulou khaie ngasou buthoulou ho-a sasho-a nghoujülao tukouwe.
25Shabe nghoupatsü puhnou nghou phüwe,
reih buh hi vetemo jünou reih züyu kai hai rai-a sülouwe,
alia aduso mainou kharochi shayu pai teitei-a sülou baiwe.
26Houkhi nou zhaohyu sü nenou doupeiwu?
Puhvei shouh pheipaloua zhaoh poa shoutayu sü nenou paopeiwu?
27Deichi peitao hinou tapa leche nou phe ra-a buyu sü nenou kharochi peiwu?
28Puhnou aku kulai chuhlya hinou phe souloua buwe,
ae kushoyu chuhdu kinou buwe.
29Buh taihinou phi-a hatalia southaloua touloure donou buwe.
30Athai pfüphao pehao sü leche nou sühao-a buwe alia toutu taonou souzhe sü sowe.
Currently Selected:
JOB 39: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
