JOB 38
38
Ramai nou Job hi Chila Peiyu
1Süthaisü Ramai nou teikhai teirü hrohinou Job ye chila peie.
2Chi thoulia loumoa nou chi pao-a avei akhai hayu ratsü naye le tsüa buyu ne thaoge?
3Poutumai ali büa latsü toulo,
Enou ne hi chuo chi noulai, avei chila peikhaio.
4Enou deiphao soupeiyu phaki ne buho bumoe?
Nenou süyu taosü ahi paongao khaio.
5Thaonou haidei du-a nou soulai tea khaloue?
Thaonou toutsü hinou va nasü vapeie?
Haitao vei chila teitei ne peilou sümoe?
6Deiphaoye tsüla peiyu dekatao sü daio nou soukhai touge?
Deiphao vei kainghou hi chuh thouyu nasü thaonou shupeie?
7Deiphao soupeiyu teithe hai vutao nou sashoa lou souzhoe,
alia rakiva maitao-a sashoa lou soue.
8Zai dzü nou dei pfüpho pa-a dzüdu payu phaki,
zaidzü sü panou dzü küpapu more donou thaonou kikhu sü khupeie?
9Zai naye panou teihao nou züposhu zhitei-a buloure donou Enou soupeie.
10Zaidu vei deiraih sü Enou soupeie,
süjü panou lapa more donou Enou kharei khangu peie.
11Hai hi koute bailai, haijü panou lapa laimoe,
ae chisho-a puhvei zaidzü houyu sü hai hi koute bailai tea Enou paopeie.
12Job, nevei hrümai hi teithe lia teithe pakhaio tea kharochi peiho peimo hie?
13Ne teithe rarapayu nahi deiye nüloua nou mai ashi maitaoye puletao nou tuchüa buyu buh hinou vakou laipa peio tea kharochi peiho peimo hie?
14Teinghi ava nou phupeiyu phaki deichitao ae deikho khesü sah kheikhai touyu büa vapha tea ngaopeie,
konai hi paoshee dakhai touyu büa sheesha tea ngaopeie.
15Mai ashi maitao nou avaye sü panou vapei nümoe,
daiolouzü avana donou puletao hai hashi soulou shia baiwe.
16Ne zai khevai talou dzünghou payu buh nasü ngaoho ngaomo hie?
Ne zai thoushoyu vei akhai dei hi lou taho tamo hie?
17Zhitei tea buyu athai maivei deiphao khuyu rokhubomü nasü ne hi mailinoua ngaopeiho ngaopeimo hie?
18Deiphao hai kazhou koute duwe touyu ne süho sümo hie?
Haitao hai ne süwe toulouzü ahi paongao khaio.
19Ava nanou buh daiki nou buwe?
Alia azhi nanou daiki nou buyu buh ne süho sümoe?
20Nenou puhaiye sa-a lahkuku nou buyu buh hi save khaipeilou sümoe?
Puhai nou buyu buh hi vere ludu nasü ne süho sümoge?
21Newo louzü süsü süvu zübulai, daiolouzü ne hai tsü shore!
Teidei soupeiyu teile kinou ne sü bure!
22Enou ra-rei pokhai touyu kide nasü ne vulia tave ngaoho ngaomo hie?
23Enou sütao sü veahoyu teile hi ae soureih soure teile hia pore donou khaikhaitoue.
24Teinghi payu buh hi ne veho vemo hie,
mokhaia teinghi palo nou hüveyu teikhai buh hi veho vemo hie?
25Teirüdzü panou kütare donou thaonou kaopo popeie?
Ae teisüa ra-rei panou koure donou thaonou ludu vapeie?
26Mai hrümoyu buh hi teirü koure donou thaonou soupeie?
27Kirürüa reisho-a buyu dei hi thaonou dzü züpeia
panou poudai khesü lapa peiwe?
28Teirü moyuma vidzü vei puo buho hae?
29Vüke alia rarei ye thaonou napeige?
30Vü nou dzü sü chuh büa soupeiwe,
alia vüra nou zai pei hi panou vü dalouwe.
31Hüveih shoa buyu Khopfüloumai vutaoye ne phuhrü khailou süwu?
Alia tyavu (Orion) vutao hai buh pora peilou süvu?
32Ne teivutao vei teile dade peilou süvu,
ae teivutao vei ludu ngaopei lousüvu?
33Ratei hi tayu zhaitao ne süwu,
ae zhai sütao nou poa deiphao hi talou süwu?
34Neye teirükou chapeio tea ne teihao hi kharochi peilou süwu?
35Teipei khaio tea nenou kharochi peilouzü nevei kuvah soure donou E hai hi bue tea velaiwu?
36Nail rei dzü dulaire touyu thaonou hrateita (ibis raohou)#38.36 ibis raohou: Daoh Ejipt teidei hi maikhe mainou haibüa louchewe, süolouzü Raohou haina nou Nail Rei dzü dulaire touyu hai rai-a paosü peiwe. hi paopeiwe?
Mokhaia teirü velaire touyusü houjü hi thaonou rai-a paopeiwe?
37Thaonou tsüdo vei-a teihao ye phoulousüe,
ae thaonou teihao ye panou teirü koure donou daopho peiwe?
38Naihü taoye konaike soupeiyu nasü thaoge?
39Nenou souveo vei touso phoupeiwu?
ae souveo vei toututao ye
40lya qulu hinou tuchüa buyu phaki,
mokhaia lah ve hinou züa khoyu phaki nenou puletao vei pou souphou peiwu?
41Raohou nou touso ha-a phoutayu phaki,
raohou toutu nou ra-a ahi touso khoyu phaki,
puletaoye thaonou touso soupeiwe?
Currently Selected:
JOB 38: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
