JOB 37
37
1Teikhai teirü ashi veyu phaki ale sü ngututuwe.
2Puh mü hinou payu puhvei pai sü kei khaio,
tei süyu büa rapayu puhvei pai sü kei khaio.
3Puhnou teireiyu sü seive peia panou tei thapo lilao nou thapo lilo koute sü reipha vewe.
4Süthaisü puhnou rayu puhvei pai kho;
khouko bushoa teisüyu kho hai chou vewe,
ae thaokhai moa teirei-a bue.
5Ramai vei kharochi thaifüa khupa tyatyalih vepawe,
vepa-a buyu sütao sü Etao nou süsha louhoe.
6Puhnou kharochi peiyu thaifüa vü-ra kou peiwe,
ae tobai soumoa teirüyu sü seive peie.
7Puhnou daizhou koute soulousüe touyu sü panou süloure donou maikhe maivei vah khesü panou soumoa chaowe.
8Soukhaonatao-a panou lahkuku vei buh hi ve butawe.
9Teikhai teirü ashi sü khekou nou rüvewe,
alia kaoshoyu teikhai sü reikou nou hüvewe.
10Ramai vei ssü nou dzüye soukao poshu veke dapeiwe.
11Teihao hrohinou pa teipei pawe.#37.11 Phoure 11 nahai Hebrew hi sheesha moe.
12Hatalia Ramai vei jüpa thaifüa tawe,
hali hala hai Ramai vei kharochi thaifüa vah soukhai-a baie.
13Ramai nou deiphao hi teirü kou dzüzü peiwe;
puhnou maikhe maiye tukhare donou-a teirü sü seive peiwe,
mokhaia deiphao maiye leshiyu donou teirü sü seive peiwe.
14Job, kati chaokho loua tsü chokhaio;
Ramai nou khupa vah soukhai touyu khesü licho khaio.
15Ramai nou kabüa teihao hinou tei reipha phalo tea kharochi peiyu sü ne süwu?
16Teihao nou kakua tei kounou phao-a taloue,
ae khupa souyu Ramai vei haso khesü ne süwu?
17Moe, ne sülou hoe, khekou nou teikhai hükhe shopeiyu phaki tei sou-a nou buyu likhei bailai.
18Ramai nou ratei hai souposhu khoushoyu hu paiva vayu büa soupei khaitouyu hisü,
ne-a talou puhye soukha peilou süvu?
19Ramai hi daichi paolai touyu sü Etao hia doupeio;
Etao vei tsüle sü sakhai-a baie; Etao nou chi paore halia hae.
20Ewo Ramai hi chi paore donou kholai moe;
Ramai ye panou Eye souhawure donou kaozhou pei-a dailaige?
21Ratei hi buyu teinghi sü vaposhu reipha phaloua zhulou shie,
alia ratei sü teikhai nou hüposhu leirei toupei khaitoue.
22Sana büa reivava tea reikou nou ngao-e,
ae Ramai vei kathe ae khouko sünou khupasou-a Etao hi vere.
23Ramai vei khouko hai duleyu donou Etao hai nghiki takou loushie,
puhnou deiphao mai hisü mah-zü thaifüa cheche hinou soupeie.
24Deiphao mainou Ramai ye tsükhouyu hai khupayu vah moe,
tsü veiwe tea lah cho-a buyu maiye sü Ramai nou ngaophou moe.
Currently Selected:
JOB 37: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
