JOB 36
36
1Elihu nou chi paopue,
2Ne shamea-a nou achipao sü keinoupu khaio,
E Ramai thaosoua chi paore buhie.
3Avei hasü hai buh douyu hinou ngaoloue;
Eye soupeiyu Ramai hai cheche-e touyu vanou paongao peilai.
4Enou ne hi paoyu taosü kaomoyu ali-a hae,
süchekhoyu mai ali ne nghoujünou la-a bue tea sülo.
5Ramai hai daizhou koute khouko bue!
Puhnou maita liye ngaophou moyu sü soumoe;
puhnou sümoyu ali-a hae.
6Puhnou cheche moyu maiye panou hri-a buchamoe,
ana lelou hoyu maiye puletao vei zü thaifüa soupeiwe.
7Puhnou acheche maiye vupa peie,
puletaoye panou veo mai ali büa tukha-a hrüyu sü aetou peie,
ae puletaoye teisa panou tsükhouyu sü peie.
8Ana maikhe mainou lah puletao nou soupfüyu thaifüa puletaoye hurai nou phukhai toua vea-a buyu phaki,
9Ramai nou puletao vei khaophu souyu ae mahmo khesü ngaopeie.
10Puletaoye panou kharochi khesü züloua hashi soupfüyu nasü thaoloure donou Ramai nou soupeie.
11Puletao nou paochi züa Ramai vei kuvah soulouzü puletaoye panou kaozhou vei-a ae kaona-a hrüloulai.
12Ana puletao nou paochi zümoyu thaiwo khoche hinou süngao khaimoa thai-a bailai.
13Ramai ye sümoyu mai hai raroupu loua puletao nou vea-a buyuma soukha peio tea kholai moe.
14Puletao hai nahle-a bukinou puletao vei hrümamai sü hraongu ngao-a akhai soua bailai.
15Ana sounou hinou Eh maiye Ramai nou doupeiwe,
alia veahoyu panou puletao vei nghithou sü souhe peiwe.
16Ramai nou neye veahoyu hinou popa peia panou sava-a hrüloue,
alia neye touso veihveili peie.
17Chuo nenou ngaozü thaifüa tukha nasü ngao-a bure,
chikure ae acheche sünou neye nüloure.
18Kini ye panou neye lalu more donou ae seihla ye panou neye süthai poa tamore donou leikeilo.
19Nevei kini moyuma nevei khouko nou neye panou veamoa bulou süvu?
20Tyahrü hrülaiye panou hakare khei teizhi teile nasü veyu jüpa-a khoso.
21Ne hashi hilo pah pfürei tamore donou leikeilo;
nenou veayu dao-a buyu hai neye panou hashi hinou paloure donou baie.
22Ramai vei khouko hai daizhou koute du-e touyu licholo,
Puhnou dou-apei mai hrülai peinou dukayu nasüe.
23Mai taralinoua Ramai ye haina souo tea paolou hoe,
alia Ramai nou hashi souwe teanou paolou hoe.
24Ramai nou soupfüyu vah haso khesü teisa nou paosholo;
ne-a puhye paosholo.
25Mai hrülai nou Ramai nou daidai souwe touyu sü ngaowe,
ana hosho-a nou zhingao-a baie#36.25 ana hosho-a nou zhingao-a baie; moyuma ana mailinoua sükhe veishi sü sükulou hoe.
26Etao nou puhvei aduso nasü süche louhoe,
mokhaia puhvei teile hai chosha louhoe.
27Dei hinou dzü poloua panou tei hinou teirüpo ali linou rükouyu hai Ramai noue.
28Teihao hinou teirü koupeiyu sü puhnou baie,
teirü koupeiyu hai mai hrülaiye donoue.
29Ratei hinou teihao nou kabüa tawe moyuma kabüa tei süwe touyu
alia Ramai hai daiki nou bue touyu mai ali-a sümoe.
30Tei hinou teirei peia panou ava sü vatawe,
ana thou shoyu zai khevai louzü zhika-a bubaie.
31Haibüa Puhnou maikhe maiye vai peiwe alia touso alao lao peilouwe.
32Tei peiyu naye puh bah poloua puhnou pa venüyu buh hi velouwe.
33Teisüyu nanou teikhai teirü ashi velaire touyu paosü peiwe,
sünasü kikhaorü koute-a sülouwe.
Currently Selected:
JOB 36: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
