JOB 34
34
1Süthaisü Elihu nou paoe,
2Tsüdo veih shoyu maitaore, achi keipeio,
kai shoyu maitaore, Enou paoyu sü noupeio.
3Touso na ali hai toulai nou touveih toushi süwe,
ana tsüdo haiolouzü noubei nou keire nou veih-shi sülouwe.
4Etao lah acheche nasü sheelou laishe,
aveih nasü koa doulou laikhe.
5Job louzü lah puh hai mah moe tea khawe,
ae Ramai nou puhye kaozü nasü peiba-e tea paowe.
6Puhnou haibüa nouwe, “E avei mah ha-a nou kabüa E da-a mahre tea paokhailai?
Eye shisho-a zhi peiwure, ana Ewo mah ha-e.”
7Job büyu mai ali-a neletao ngaoho moe?
Puhnou Ramai ye tsükhouyu sü soungao khaimoe.
8Mai ashi maiye koa tayu ae mahmo souyu maiye koa tayu hai puhnou jüpa-e.
9Ramai vei leli hinou talai tea teyu hai haveih ali-a hae tea puhnou paoe.
10Tsü pfüyu maitaore, avei chi keikhaio,
Ramai nou kaomoyu vah sü soulou veiwu?
11Mainou soupfüyu thaifüa Ramai nou buu peiwe,
ae maikhe mainou soupfüyu thaifüa soupeiwe.
12Khoukhoulai Ramai louzü hashi ali-a souwu moe,
puhnou mai tali hia cheche moa souyu hae.
13Ramai hai puhvei khouko sü mai kukheli hinou ngaoloua baiwu?
Mai kukhe ali nou puhye panou deiphao khore donou vahbu thou peiwu?
14Ramai nou puhvei ssü hai podakhai louyu thaio,
15hria buyu hrülai sü thai khai-a bailai,
alia konai hi dakhai loua bailai.
16Ne tsü veiwe toulouzü chuo avei chi keilo.
17Acheche Ramai ye nenou mahwe tea paoshi laiwu?
Puh hai kaozü naye ngaorawe tea ne cholaivu?
18Ramai nou veo mai ae nuh teidei khoyu maitao nou vah ashi soutayu thai ae kaomo tayu thai mah paodu peiwe.
19Puhnou veo mai hie tea phaoboyu hae,
toungi maiye phaoboyu hae,
daiolouzü mai hrülaiye soupeie.
20Mai ali hai khei ali hinou thaita louveie.
Ramai nou Etaoye dakhao peiyu thaisü Etao hai hakata-a bailai;
khouko bushoyu mai koute-a puhnou lapasou southa lousüe.
21Mainou tayu phika teitei sü puhnou zhua bue.
22Ramai nghingao hinou mahmo souyu maiye pokulou süyu teizhi hae.
23Ramai nou Etaoye panou tare alia chikure donou teithe teile dadeyu komoe.
24Puhnou süthai-apei mai aliye pophawua kukhe mai aliye thao thoure donou mah zü phouyu komoe.
25Daiolouzü puletao nou souyu teitei sü Ramai nou sü-ngaokhai touwe,
sümaitaoye sü puhnou khei ali hinou soukhao baiwe.
26Puhnou mai hrülaiye panou ngaolou süyu hinou mahmo souyu maiye sü tukha peiwe,
27daiolouzü puletao nou Puh thaifü bare,
ae puhvei chikha khesü ngaophou peimore.
28Puletao nou toure hamaiye soukrayu pai sü Ramai hi chou khere,
alia puletao nou soukha peio tea khoyu pai sü puhnou kei peie.
29Ramai nou halia soukhai toulai moe touyu thaio mai linoua puhye paoshi laimoe.
Puhnou puhvei pah pfüku louyu thaio,
Etaoye soukha peire mai lia ha-a bailai.
30Ramai ye sümoyu maitaoye panou puletaoye khasa-a hrülai moe tea buyuma
tyahrütao nou souloure khouko ali-a ha-a bailai.
31Job, nevei mahtao sü Ramai hi mahwure tea paopalo,
mahmo soupulai more tea le lalo.
32Nevei mahmo taosü ne hi ngaopeio tea Ramai hi khoho kho moe,
ae haithai hashi soupu laimore touyu ne aetou homoe?
33Ramai nou soupfüyu nasü nenou moe tea ba lukhu,
nenou jüpayu nasü puhnou soupei shulai tea ne vuzhiwu?
lela loure nasü E moe, nenou lai;
südonou ne daitea chowe touyu nasü paokhaio.
34Tsü pfüyu mai hrülai nou haisü aetoua bailai,
ae tsüdo aveih mai hrülai nou haibüa paolai,
35Job nou chi paoyu hai sümoa nou pao-a baie,
ae puhnou paoyu chi taosü thou loumo chi baie.
36Job nou paoyu chitao sü soutaosou tsücho khaio,
puh hai mai ashi mainou chi paoyu büa pao-a baie.
37Puh vei mah pei hinou Ramai ye hraiyu thoupua baie;
alia Etao mai hrülai nghoujünou puh sü Ramai ye konüwe.
Currently Selected:
JOB 34: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
