JOB 32
32
Elihu vei Chipao
(32.1—37.24)
1Job nou lah puhvei mah hae tea latei louyu donou puhvei samai asütao nou chila peire donou tepu more. 2Ana nghiki nou la-a buyu Elihu sü rarou sholoua shamealou hore, daiolouzü Job hai lah puhye paozüsha touloua Ramai ye paomah peire. (Elihu hai Barakel nahpoutu-e). 3Mai asütao nou Job vei chila peilou hokhaie, Ramai nou mahyu büa ngao-a baire, südonou puhnou Job vei samai asütao pei hia rarou shore. 4Puletao hrohi Elihu nou nakhayu donou mai kukhe taonou chi paoche mosa puh sü kho-a bue. 5Mai asü nou Job vei chila peilou hoyu puhnou ngaolou khaie rarouloua chi paoshu tare.
Elihu
6E sü nahle mai hie, newo tsümaie,
südonou lah ale khenou cho-a butao sü ne hi paopi-a bue.
7Nele büa tsümai nou tsüdo aveih sü süwe,
südonou nele tsümai nou paozü hie tea Enou cho-e.
8Ana khouko buwo Ramai rako nou Emai hi tave tsüdo sü peiwe.
9Mai ali hai tsühi-e touyu vanou tsüdo veipu hie toumoe,
mokhaia tsüyu donou chechewe touyu ha-e.
10Südonou chuo zhuvea-a Enou cho-a bunasü ne hi paongaolai, kei-nou peikhaio.
11Neletao nou paoyu phaki E-a ngasou raomoa nou kei peie,
neletao nou hasüyu paila nou chi paoyu phaki kho-a bupeie.
12Enou soutaosoua neletao vei chi phayu sü kei nouyu phaki,
neletao mai ali koute-a Job ye paodou peilou sümore.
13Neletao nou ratsü ngaoloure touyu shee sü daie?
Neletao nou Job ye chila peilou hoyu thaifüa Ramai ye panou puhvei chila sü pei theo.
14Job nou ahi chi paomoe, ana neletao hi paowe,
ana neletao nou chila peiyu büa Ewo louzü paolai moe.
15Job, puletao hai ne hi chi paore hazeire,
ae nevei chila sü peilou hore.
16Puletao hai raomozei tea bubaire, chila lia peipu loure ha-a nou ngasou bure,
E-a puletaoye kho-a ngasou paikhai toumoa bulaiwu?
17Moe, chuo Ewo louzü lah avei chila peilai,
Enou licho-a buyu nasü paolai.
18E chi paomoa puletaoye kho-a bulou hore,
daisounou touyuo E paore chi alao bue.
Alekhe buyu rako sünou Eye chi paore donou süa bure.
19E hai chi paore teile ngaolou more touyu thaio,
zhaoh southou khaitouyu souheebvü büa E sü paophopa laire.
20E amü ngepaloua chila peilai, sütea vaphouyu ngaolou molouzü shire.
21E mai aliye souku laimoe, alia maitali-a seijüyu soulai moe.
22E maiye sei-a jülou sümoe,
Enou maiye seijüyu thaio, Ramai nou Eye thalasoua tukha bailai.
Currently Selected:
JOB 32: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
