JOB 31
31
1E loumainah aliye hashi sounü
hinou anghithou zhukhai laimoe tea chaachou souwure.
2Akukulai Ramai hinou Emai nou dai ngaore zha bue?
Hali-hala soulousüo Ramai hinou ngaore kaa dai buge?
3Mai ashi mainou ngaore sü hakayu alia mahmo souyu mainou kanghiyu ngaolai mowu?
4Enou soupfüyu teitei Ramai nou sükhaiwe,
avei phika teitei puhnou zhuwe.
5E chou-a nou paowe, süolouzü E hashi lia soumoe,
alia maili hia dazhu-a laluyu vah soumoe.
6Ramai nou Eye sühchokhao ali hi pothou dou-a zhu louzü E hai mahmo ali-a hae touyu süloulai.
7Avei phika hai ludu macha hi tamoa kamah kamo-a bulouzü,
avei tsüle hai nghithou jüpa hilao süthai ta-a bulouzü,
avei bah hai shee moa nou buyu thaiwo,
8Enou southou khaitouyu avei chamou teitei sü soushi-souha theo,
mokhaia Enou daothouyu chamou sü mai kukhe maiye panou toulou theo.
9E nou akinapa mai vei chapfüye jüpa-a puhnou vakou tapayu tutsü-a da-a buyu thaio,
10avei chapfüye panou mai kukhemai ali vei li khoyu souta theo,
alia mai kukhe mai aliye ko-a züyu souta theo.
11Haibübüyu vah ashi souyu maiye sü panou athai nou tukha peitheo.
12Meizhe hinou mei taoyu büa avei buyu na teitei sü deihawu theo.
13Avei kilaimai alinou apei hi vamoa chi paoyu phaki,
Enou puletao vei chi sü soutaosou keitou pei-a phapeiyu kaoe.
14Enou puletaoye koa kaolu hinou sa-a hrütou peimo louzü E kakua Ramai ve daolai?
Ramai nou apei hi chiku veyu phaki E daichi paolai?
15Eye soupeiyu Ramai nanou avei kilai na-a soupei-a baie.
16Enou toure hamaiye soukha peinü moa tarei takhai toumoe,
mimeapfüye panou veayu hi loumoe,
17mokhaia vearou nahmaiye panou toumo-somoa lah Enou touso loumoe.
18E ahrümai sasü puletaoye donou haveih soupeie.#31.18Hebrew hi sheesha timoe.
19Toure hazhule-a sabanü hülou hoyu mai aliye ve daoyu phaki,
20lah avei nghitu zhaotu hinou popa louyu soumai nou daoyu sabanü nou puletaoye peie,
sübüa puletao nou thaimoa hribusa Eye paosho-a kalo paoe.
21Chiku ki hinou ve chikuyu phaki,
Eye soulou hoe tea vearou-a lai mai pei hi Enou dazhu-a vah souyu buwu?
22Sütouyu thaio avei baokao panou chatheo,
avei baokao ahai kheinou avei pfüphao hinou deta theo.
23Ramai nou chikure alia puhnou souveare nasü E-a ngaopi,
südonou E hakilia hashi süpaitya soulou hoe.
24Enou kiniye loucheyu hae,
25mokhaia Enou hangiwe tea süvanou khaophu souyu hae.
26Enou teinghi ye puhvei ava donou tea puhye thomoe,
mokhaia khouhye puhvei hüveiyu donou tea puhye tho moe.
27Enou taipaitya ye tho züe tea chomoe,
alia puletaoye tsükhou-a avei bah nou khurü moe.
28Mah taipaitya souyu hai Ramai ye sümoyu mai nou soua baie,
südonou mah taipaitya souyu maiye sü athai nanou tukha züe.
29Eye zhuba ngaobayu mainou veahoyu phaki Enou asayu soukhai moe,
mokhai-a puletao pei hi kanghiyu veyu phaki Enou savayu sou moe.
30Puletaoye panou thai theo tea veachi pao-a E mah soukhai moe.
31Avei vah souyu maitao nou süwe,
süolouzü E teisa nou shetu maiye sheshe peie.
32Enou veihao sou maiye aki hi kusave panou chaolouwe,
hakilia puletaoye panou rekou hinou pa zümoe.
33Mai kukhe maiwo puletao vei mahmo pokure donou tewe,
ana Enou vulia avei mah pokuyu hae.
34Mainou chare-paore piyu hae,
mainou chare pi-a kijü papiyu E soumoe.
35Enou paoyu chitao hai mailinoua kei-nou peilai mowu?
Enou chaachou sou-a paowe, süolouzü Enou paoyu taosü chechekhai toue.
Soulousü khouko buwo Ramai puhnou avei chila peiyu southeo.
Apei hi mah dukhaiyu maitao nou avei mah taosü larü rüpalou-a Eye panou ngaore donou anghoujü khaipeiyu thaio,
36E khuveih sho-a sütaosü avei phao hinou daopfülai,
alia veo mai peirü ali bütou tea apei hi rüpfülai.
37Enou soupfüyu pfüphou sü Ramai hi paongaolai alia E Ramai hi apei pfülashulai.
38Enou dao-a buyu avei dou alia laotao hai kaomo zümoa nou maivei shaolou-a baiwu?
39Dou moa lao taihinou paopayu chamou moa shina mara taosü Eye panou ngaore donou Enou lah touloua dei taina tayu mainaye panou khü-züa butheo,
40dei taihisü routhou bumoa panou poube ae raishu nou paopa-a hrütheo.
Job vei chipao hai hainou akhai soure.
Currently Selected:
JOB 31: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
