JOB 30
30
1Ana chuo ajünou nahleyu
thaihou maitao nou Eye sü ngaophou moa konüa baire.
Puletao vei puo maitao hai avei seitao sa-a nghitu-zhaotu khoyu vah koute-a sa-a vah soulou shiyu mai baie.
2Puletao hai po-a vah ali-a soulou shiyu mai baie.
3Puletao sü toure halale-a hou-reiyu vanou sümaa-poumaa kirürüyu paitya koute-a poa toue,
kheikou sü mai hrümoyu buh rekou nou buwe.
4Radeiki hinou hrüyu poube alia süübe koute pailaloua toue,
touveiyu ali-a hayu phai maa koute-a pailalou-a toue.
5Puletaoye mainou ngaoyu phaki maivei vaomai aliye sha-a hulaiyu büa puletaoye hulaiwu baiwe.
6Puletao sü ki koute ha-a nou leaphi khonou alia lea qulu khonou hrüwe.
7Rekou nou rekhaona büa sha-a rawe, pouhro nghihro kinou ve jüa buwe.
8Puletaoye sü voyu nahmaitao, ko khaimoyu maitao-e!
Puletao sü nuh hinou hutayu mai baie.
9Chuo taibüyu mainou tave Eye jünü-a konüre,
Esü hazholia more, mainou konüna sou-a baire.
10Puletao nou Eye ngaora-a anghiki koute-a takou nümore,
puletao nou apah hi taidzü süsho peie.
11Ramai nou avei khouko souhazei toupeiwure,
chuo puletao nou ahi puletao vei lekha-rarou nasü shameayu hare.
12Puletao mai hrülai nou athai ngou-a Eye panou tu-a baire,
Eye sü akhai khailai sou-a souhawulai tea te-a bure.
13Puletao nou Eye nuchaolou-a Eye souhawu bailai tea tudawe,
puletaoye nuchao peire mai ali-a hare.#30.13 Haibüyu phae nuchao peire; Hebrew soukha peire.
14Puletao nou avei duyu buh chaqulu hinou loulou-a apei hi hupoa koure,
15Esü ngaopi shore, avei khouko sü teikhai nou hülaiyu thouba büre,
ae avei kini khesü teihao büa hatare.
16Chuo Esü thailaire, avei sounou sü khaiyu hare.
17Kheimathe avei raotaosü hrei-a soure,
sübüa souyu sü chaokhai moa sou-a baire.
18Ramai nou Eye ngu hinou leilou-a avei sabanü sü paihaowure.
19Puhnou Eye sü konai hi laithou peiwure,
Esü konai jünou veipuyu hare.
20Oh Ramai, Enou neye sü rasou la-e ana nenou khepei more;
ae Enou veachi paoyu sü nenou keinou pei more.
21Nenou Eye sü souvea shopeie,
Ne khouko teitei nou loua Eye sü souvea peie.
22Teikhaiye panou Eye hüpo-a tare,
shishoyu teikhai hrohinou Eye sü panou veasho-a shamea bure.
23Nenou Eye sa-a athai hilao tawe touyu E süloure,
buh tainasü mai hrülaiye donou tudayu bue.
24Haliro souloure khouko ha-a nou buyu;
zhuvea peio tea veasho-a nou kho-a buyu maina pei hi ne daisounou huwe?#30.24 Phoure 24 haina hai Hebrew hinou sheesha timoe.
25Vea-a laimai donou E-a kramowu?
Toure hamai donou E-a dopfüa veapei mowu?
26E asayu ae ava nasü jüpa-a nou reih-a bue,
ana veayu ae azhi nou avei zha sou-a baire.
27Le veayu alia sounou nanou Eye sü paide paisasare,
veayu sü teithe teithe pumaimai-a baire.
28Ewo teinghi ava zhu ngaomoa azhi hinou ta-a bure,
Eye soukha peio tea maisou hinou khowe.
29Enou shapayu apai-ra sü nüsei alia tuturu nou rayu büre.
30Avei vasou sü teiva tare alia Enou rakiyu hai meinou rouyu soure.
31Raichokiwo sashoyu lou souyu choue,
chuo sou-a lüyu ae krayu pai chou-a baire.
Currently Selected:
JOB 30: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
