JOB 29
29
Job nou Puh vei Zü vanou Akhai sou-a Paoyu Chi
1Job nou chi paopu shukhaire.
Job
2Tala tayu avei teile hi Ramai nou Eye khopei vupeiyu büa teile tainasü ngaodakhai loure donou E jüpasho-a bue.
3Tai teile kisü teisa Ramai nou Eye ko-a tapeie,
Enou teimai teizhi hi ta-a buki-a puhnou ahi ava sü peie.
4Teile süki hai E hani sho-a bue ae Ramai ye samai sou-a puhnou akikha maiye vupei-e.
5Süteile kisü Ramai nou kozho pei-a alia anah maitao nou Eye sühao-a buyu teile-e.
6Avei chotao alia nghitutao nou naodzü alao peie,
ae avei oliv betao sü chuhrao pei hi koute-a veishoa rashithou shipeie.
7Nuh hi tsümaitao vejü-a meimeyu hisü E-a puletao hrohinou avei buh ngao-a buloue.
8Nahle maitao nou Eye ngaoyu phaki puletao hai Eye pi-a tuvai ta-a baie,
ae tsümaitao nou Eye ngaoyu phaki tsükhou-a puletao hai tashu la ngaoe.
9Süthai-apeimai koute-a E velou khaie chi paoyu so-a baie.
10Matsü shoyu mai koute chilia paomoa zei tea baiwe.
11Eye ngaoyu mai mokhai-a avei ko choulouyu mai hrülai nou Enou havei souyu kohtao sü phakuwe.
12Toure hamai nou khoyu phaki Enou puletaoye peie,
hakilia vere tare buh hayu rounahtou taoye sü Enou soukha peie.
13Vea kayu maitao nou Eye paoshoe,
Enou mimeapfü taoye panou kaozhou vei-a hrüloure donou soupeie.
14E teisa nou cheche-a vah aveih sou-a baie.
15E nghicha mai vei nghithoue,
alia sholai mai vei phi soupeie.
16Enou toureha mai vei puo soupeie,
ae veihao soulai mai vei samai khamai soupeie.
17Enou mai ashimai vei khouko sü souha peie,
alia puletao nou souvea pei-a buyu maitaoye sü Enou vupa peie.
18E avei hrümai so-a hrüshulai,
alia lah aki hinou vaphi-a thai baishulai tea tsüchoe.
19Süübe ali hai maa tsülou dzüye nghi-a alia botao hai vidzü nou kou chapeia buyu büa Esü hrüe.
20Mai hrülai nou Eye sü paoshoe,
alia avei khouko sü khaitayu soumoe.
21Enou puletaoye doupeiyu phaki maili koute-a pai paimoa soutaosou lelousho-a keiwe.
22Enou chi paocheyu thai mai kusü linou halia paothoupure ha-a baiwe,
avei chipao sü teirüdzü büa puletao lekhevai tsülou peie.
23Tah tamai nou teirüdzü vuh khoyu büa maikhe mainou achipao sü kei-nou nüsho-a khowe.
24Puletao jüphi-a vamoyu phaki Enou avei pah valou-a puletao vei le souva peie.
Avei pah vasü puletaoye donou muh teishoe.
25Enou puletao vei hrümai ludu nasü doupeie,
vemai alinou reihmai ye süthaisa-a reih hi tabuyu büa Enou puletaoye süthaisa-a tapeie.
Puletao le pepo-a buyu phaki-a Enou puletao vei le sü sousa souva peie.
Currently Selected:
JOB 29: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
