JOB 27
27
Job
1Job nou chila peie:
2Hri-a buyu Ramai, ahi mah-zü thaifüa soupei moyu,
alia avei hrümai hi panou veayu hi louyu donou E puh zhih hinou chaachou souwe.
3-4Ramai nou Eye panou ssü hai-a bubusa sü avei mü-lee nou chi shi lashi ae dayu chi paokhai laimoe.
5Neletao nou paoyu chi hai chechewe tea E hakilia paolai moe,
athai koute E mah hae tea la koute-a bailai.
6E hai cheche-a baie touyu hai thaokhai laimoe,
atsü ale sheesha-a baie.
7Eye hrai-a duyu maiye sü panou mai ashimai ali büa souvea peitheo.
8Ramai ye sümoyu maiye donou puletao vei teile che-a Ramai nou polouyu phaki,
puletao vei areih sü dai bue?
9Puletao hi veayu veyu phaki,
puletao nou khoyu veachi sü Ramai nou keipei laivu?
10Ramai nou peire asah nasü puletao nou jüpalai,
sübüa tobai soumoa Ramai hi veachi paoyu pha-e.
11Ramai hai puh vei khouko daizhou due touyu Enou doupeilai,
alia Khoukhoulai Ramai nou choda khaitouyu nasü Enou paongao peilai.
12Ana haibüyu teitei sü lah neletao nou süwe alia ngaowe.
Südonou neletao daisounou thou loumoyu chi paowe?
Zophar nou Paoyu Chipao
13Hali-hala soulousüo Ramai nou mai ashimai ae zhaipou shiyu maiye sü haibüa tukha peiwe.
14Puletao nahpoutu alaolao buwulai,
ana puletaoye sü reih hinou southa bailai.
Puletao hinou naveyu nahmaitao sü pouphou ngaotou louhoe.
15Thaihao moa buyu maitao-a sounou sou-a thailai,
sübüa mimeapfü soutayu puletao koute nou-a puletaoye donou dongai pfüpei laimoe.
16Mai ashimai vei pousha sana hai chosha louho-a bumala-e,
alia moloushi sabanü jünou koulia bua mala-e;
17ana mai aveih mai kamaia nou sabanü sütaosü banouloua bailai,
alia achechemai nou puletao vei pousha sanatao sü poloua bailai.
18Mai ashi mainou ki souposhu kheirara nou rakhai touyu ra büa buyuma#27.18 Larübvü ali hi kheirara...ra; Hebrew rükhao moa raohou phe. mokhaia dou khoyu qilamai repao büa soukhaitoua bu-a lae.
19Puletao hai hanisho-a zü-zhi tae,
ana zhi-a kaishuyu phaki puletao vei kinitao sü hazei-a bailai.
20Sükhai moa buyu hinou dzüdu veyu büa ngaopi nou puletao hisü velai,
khei nou teikhai shishoyu velou-a teikhai nou hüpo-a takhai-a bailai.
21Teinghi palo nou hüveyu teikhai nou puletao vei ki sü hükhaowu bailai.
22Puletao nou tuta loure donou telai ana leshiyu ali-a ha-a nou puletaoye hüpoa ta-a bailai.
23Teikhai nou bah pha-a puletaoye konü-a lukhu puletaoye sü hüpoa ta-a bailai.
Currently Selected:
JOB 27: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
