JOB 23
23
Job
1Süthasü Job nou chila peie:
2Chu-a E Ramai pei hi vamoa chi paowe.
E haibüa paoyu hai thaolou hoe.
3Ramai nou buyu buh sü E sünü shore,
Puh buh hi tave loure ludu sünü shore.
4Enou puh hi tavelou-a vamoyu pfüphou hai shoshonou paongao nüe.
5Puhnou ahi daichi paolaisa,
kabüa avei chila peilaisa touyu sünü lure.
6Ramai hai puhvei khouko teitei lou-a Eye hraikhai laiwu?
Moe, sütoulai moe, puhnou achi keipei vuzülai.
7E ale sheesha tea baie, Ramai ye koa veishi chi phalou süe,
alia E hai le sheewe mah hae tea puhnou paoshee peilai.
8Enou teinghi palo phou tae, ana Ramai ye phouhae;
teinghi loulo-a phouta-e ana puhye ngaolou moe.
9Ramai hai reilo ae khekou nou vah sou-a bue,
ana E puhye ngaomoe.
10Ramaiwo louzü avei phika teitei sükhai touwe,
Puh Eye veiho shisa tea zhulouzü,
E sheesha tea buyu puhnou ngaolai.
11E puhvei ludu hinou ta-a baie,
bakha zhoulo-a mokhaia bakha nalo-a tarei tamoe.
12E teisa nou puh vei chikha thaipfüa soupfüa baie,
E lah ajüpa hinou moa puh jüpa thaipfüa ta-a baie.
13Puh sü teisa nou tyakuyu hae,
mai linoua puhye dulouhoe,
mokhai-a puhnou sounü pfünü nasü mai linoua ngilou hoe.
14Eye donou puhnou daitea souda-a busa, süsü vete vuzülai,
souda sünasü puh vei choshalou hoyu souda hrohinou ali baie.
15E sü puh nghoujünou pishi-a bue.
16Hali-hala soulousüo Ramai nou avei khuveih khudu nasü souhawure.
17Eye panou ngaopiyu sü teimai teizhi nou moe;
ana Ramai nou baie.
Teimai teizhi nou Eye panou ha ngaomore,
ana ngaopiyu sü Ramai vanou baie.
Currently Selected:
JOB 23: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
