JOB 22
22
Chi Phayu Asü Chena
(22.1—27.23)
Eliphaz
1Süthaisü Teman puona Eliphaz nou chila peie:
2Hasü sülai maina koute Ramai nghoujünou koyu dai bue?
3Nenou acheche vah souwe touyu vanou Ramai ye donou dai koyu bue?
Nenou haveih souyu nanou Ramai ye dai soukhayu bue?
4Ramai nou ne pei hi chiku-a neye souveayu hai nenou cheche-a hrüyu vanou moe.
5Nenou souyu mahmo duleyu donou baie,
alia nevei mahmo sü akhai hayu donoue.
6Ne paoh pfüyu nevei thaihou jürai maitao hi nenou paoh khove-a khapeilou hokhaie,
puletao sabanü koute-a nenou shaolou-a panou bai-a buwe.
7Nenou rei-a laimaiye dzü panou külou moe,
alia houzü-a laimaiye vaipei bae.
8Nevei khouko alia nevei aduso nanou deiphao teitei hai nedo soulouwe.
9Nenou meamaipfüye soukha moyu themoa vearou nahmai vei-a shaolou-a souvea peie.
10Südonou chuo ne pehao teitei hisü kaobvü khaitoulou-a ne sü pishiyu khaikho baire.
11Neye donou maitei lou-a ne ha ngaolou hore,
alia veayu nou dzüdu sou-a ne hi vere.
12Teikou vutao hai kusho-a buyuma akukulai hi buyu Ramai nou puletao koute-a na-a ngao-a baiwe.
13Nenou chowe, Ramai nou dai ngaolai?
Puhye sü teihao nou süloure, kabüa Etaoye sülou ngaolou khailaige?
14Puhnou raki vedei hinou tasühao-a buyuma teihao nou sülou-a ngaolou hoe tea ne chowe.
15Mai ashimai nou tayu ludu hinou ta-a bailaire tea ne le lawudou?
16Puletao vei teile vetemo jünou dzüdu nou puletaoye sü naopoa ta-a bailai.
17Sümaitao sü Ramai ye laiwuyu mai alia Ramai nou puletao hi halia soulou hoe tea choyu maitaoe.
18Ana puletao soungi papeiyu sü Ramai nou baie.
Mai ashi maitao nou lichoyu hai Ewo sülou hoe.
19Mai ashi maitao nou veayu ngaoloua mai aveih mai ae acheche maitao nou nüwe.
20Mai ashimai vei buyu pfüphou souhawu baiwe,
alia shotaotou-a meinou deiwu baiwe.
21Job, chuo Ramai ye chaveilo,
Ramai hai neye hraiyu mai alie tea choyu nasü thaowuwo.
Nenou sütouyu thaisü Ramai nou neye ha peilai.
22Puhnou doupeiyu sü aetoulo,
Puh vei chipaotao sü nevei lethou hi khailo.
23Ne natai lou-a Ramai hi dakhai velo.
Ne kihikha hinou ashi souyu pfüphou sü soupuso.
24Nevei sana sü shilaiwo,
veih kayu sana khesü theyu rei hi laithouo.
25Ramai ye nou nevei sana soulo,
alia Ramai ye panou nevei pojü khaitouyu shahu soulo.
26Süthaisü nenou Ramai ye teisa nou louche-a nevei savayu pfüphou hai Ramai hinou ngao-a bailai touyu süloulai.
27Nevei veachi sü Ramai nou keinou peilai,
alia nenou Ramai nghoujünou chaachou souyu nasü souphe laimoe.
28Nenou soupfüyu teitei hi pah veilouyu ngaolai,
ae nevei ludu sü vapha toulai.
29Ramai nou khaophu souyu maiye souna koulai,
alia tainou souyu maiye sü vupeilai.
30Ne hai checheyu thaiwo Ramai nou neye vupa peilai,#22.30 Larübvü ali hi checheyu thaiwo; Hebrew chechemoyu thaio.
nenou soupfüyu hai zü-a buyu thaiwo Ramai nou neye khailu peilai.#22.30 Phoure 30 nahai Hebrew hi sheesha timoe.
Currently Selected:
JOB 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
