JOB 24
24
1Daisounou Ramai vei kuvah
soulai maiye acheche hinou chikure donou teithe teile ali dade khaipei moge?
2Deiphao mainou dei ngaopu loure donou raichuh lalaiwe.
Puletao nou mai vei zhaotu vaoposhu lah zhaotu hrohie thoulouwe.
3Pfüpuo ha-a vearou mai vei rheisüh sü puletao nou vaolouwe,
alia meamaipfü vei chode sü nülou-a puletao paoh khapeimo koute khaipeiwe.
4Puletao nou toure hamaiye panou lah vei zü koute ngaolou bae,
puletao nou toure hamaiye holo hailo huta peiwe.
5Puletao sü tsü hayu rheisüh büa rekou nou taho touso phoutawe,
puletao nahmaiye panou toure donou touso sü phoutae,
ana halia ngaolou more.
6Puletao hai mainou southou khaitouyu dou hinou chachi-a baie,
alia mai ashimai vei darkha kipei hinou darkha shithou pojü louwe.
7Puletao hai kheiki bazüre züsa koute-a ali-a hae,
ae puletaoye soulü loure donou halia hae.
8Puletao hai teirü veyu phaki teirü nou phaicha koko-a lyaphi khonou bai-a baiwe.
9Mai ashimai nou pfüpuo hayu vearou nahmaiye saloua panou qila souloue,
alia toure hamai nou puletao paoh khapei louho khaie,
nahmaiye nou nülou-a baiwe.
10Toure hamai sü sah lia bamoa bai-a ta-a baiwe;
cha chiyu phaki koute-a toure ha-a baiwe.
11Puletao nou theadzü soure donou oliv dzü süwe,
zhaoh soure donou darkha dzü süwe ana puletao sü rei-züa baiwe.
12Nuhdutao hinou zhizhu khaitoua thaiyu nonoa bumai nou sha-a rawe,
ana Ramai nou puletao vei veachi sü noupei moe.
13Maitaoli nou avaye hrai-a bue,
puletao nou ava ludu nasü sümoe ae sühi buchamoe.
14Maiye dathayu mai hai shona nou kushulou-a
vealai maiye southare donou tashuwe,
alia kheiki sü mai vei vaotawe.
15Mai chapfü nahmai sapamai sü tei zhilouyu kho-a bubaiwe,
puletao zhu sü maiye panou shilou more donou puletao vei pah holouwe.
16Mai vei vaomai sü kheiki nou mai ki dakhaoe,
ana heakou hai kijü teiva hi pamoa tutsü-a buwe.
17Heakou louzü puletao nou avaye ngaopiwe
ana teizhi hilouzü puletao donou piyu hae.
(Zophar)#24.18 Zophar vei zhih hai larübvü haihi hae, ana chipao haitao hai puhnou paoyu phae tea puh zhih nou peikhai toue.
18Zophar nou paoe,
Mai ashi maiye sü dzü nou dupa maopfü-a ta-a baiwe,
alia puh vei füdei sü Ramai vei chaa ngao-a baiwe,
puletao nou vah soure donou tea ludou hi holou more.
19Vüra nou tei lüpa khaie hata-a baiwe,
sübüa mahmo souyu mai sü ahri mai teidei hinou hata-a baiwe.
20Puletaoye sü lah pfü koute nou ngaiwu baiwe,
puletaoye sü khaongao nou toulou-a kaotayu süübe ali büa souha baiwe.
21Puletao hi sübüa pawe, daidonou touyuo puletao nou mimeapfüye souveapeie,
alia nahmai hayu pfümai hisü leshiyu hae.
22Ramai vei khouko likhei nou khouko bumaiye sü souha peie,
Ramai nou sübüa vah soupa khaie mai ashi maitao sü thaitawe.
23Sübüyu maiye Ramai nou eihtea panou zhou vei-a hri-a buloue,
ana puletao nou soupfüyu teitei sü Ramai nghithou nou ngaomoyu hae.
24Pha teile jütea mai ashimai nou hangi payuma puh sü poubetou ali büa ki-veta-a baiwe,
roube pei valouyu büa vade baiwe.
25Haibü laimoe tea maita linoua paolou süwu?
Enou paoyu achi kaomoe touyu maita linoua popa ngaolou süvu?
Currently Selected:
JOB 24: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
