JOB 21
21
Job
1Job nou chila peie:
2Enou paore chi sü kei-nou peikhaio touyu hai likhei khowe.
3Eye panou chi daotu paokhaio,
Enou paore paocheyu thainou neletao nou Eye konü-a konütheo.
4Enou veire moa savare sü deiphaomai moe,
Enou chi paomoa ngasou buthoulou hoyu hai avei zü bue.
5Eye zhukhaio, avei zhaidou hai ngaolou-a neletao vei le dai-a ngasou buthoulou hoyu phamowu?
6Ahi vepa-a buyutao hai ngaolou-a maikasoue alia ngaopi-a ngumosha louhore.
7Mai ashimaiye panou thai-a thaimoa panou hrü che-a hrülou alia hangi louyu hai daidonoue?
8Puletao hai nahmai tyaomai hrülou-a dusopayu koute panou ngao-a hrülouwe.
9Ramai nou puletao ki hisü souka sounghiyu panou vepei moe,
puletao hai pi-a hrüyu sü hae.
10Ongai, puletao vei kikhaorü hai tyoutu-a kapalouwe,
veayu ali-a ha-a tou touloua baiwe.
11Puletao vei tyaomai nahmaitao hai zhaotu büa ko-a laiwe,
12shabe nghou-a lou sou-a buwe.
13Puletao hai kaona hinou hrü che-a hrülouwe,
alia thaiyu phakia veayu ha-a thailou baiwe.
14Maishi maitao nou Ramai hi puletaoye panou lah jüpa, lahdo sou-a baio;
Eh nou ne jüpa dai-e tea süyu donou koyu hae tea paowe.
15Ramai kuvah souyu vanou veiyu ali-a hae tea puletao nou chowe.
Puh hinou veachi paore ali-a hae tea baiwe.
16Puletao khouko vanou veilou-a baie tea puletao nou khawe,
ana puletao nou choyutao sü Ewo aetou moe.
17Mai ashimai vei meivabvü sü duki sounghi peie?
Puletao hai hakayu daowu?
Ramai nou mai ashimaiye puhvei lekha rarou hinou souvea peiwu?
18Puletaoye thouba büa teikhai nou hütawu?
Mokhaia naihü büa teikhai teirü ashi nou hüpo-a tawu?
19Puo nou mahmo souyu donou puh vei nahmaitaoye Ramai nou souveawe tea neletao paowe.
Haihai macha moe, daidonou touyuo Ramai nou mahmo souyu naye sü tukhayu dosoe.
Puletao nou mahmo souyu vanou Ramai nou puletaoye tudei pei-a baie.
20Mahmo souyu mainou lah mahmo thaipfüa veayu sü panou ngaotheo,
Ramai vei lekha rarou nasü puletaoye panou ngaotheo.
21Mai ali nou thaiyu thai puhvei nahmaitao nou vasa-a buho bumosa tea tsüchoyu sü bulaivu?
22Aku kulai hinou chiku-a buyu Ramai ye thaonou tsüdo paodou peilou süge?
23Mai taolizü thaimo koute pfüphao vei-a hrülouwe;
24thaiyu phakia vasho-a thai-a baiwe,
puletao hri-a buyu phakia vasho-a hrülouwe.
25Mai taoliwo savayu ali-a ngaomoe,
puletao sü veasho-a hrüe alia veasho-a thai-a baiwe.
26Ana mai hrülai sü thaikhai toulai alia daovukhai toulai,
shikhaongao nou puletaoye sü toukhai loulai.
27Eye panou mah souloure donou neletao nou tsücho-a buyu tsüle sü Enou süwe.
28Aduso puona, vah ashi souyu mai navei ki sü chuo daiki bure tea neletao nou nouwe.
29Neletao nou veihao soulai maiye koa chi phayu phaki,
puletao nou kabüa paoe touyu neletao sümowu?
30 Mapao vei lekha rarou hinou tarei louyu mai sü hashi soulaiyu mainou-e tea paoe.
31Mai ashi maiye thaonou maishie tea paolousüe?
Mokhaia puletao nou mahmo souyu donou tea paokha peilou süvu?
32Veisho-a soukhai touyu khü hi kaopo veyu phaki,
33mai thethe thethe nou tave nüvu peie.
Dei koute noua taibüyu thaiphaoye sü soutaosou-a popeie.
34Ana neletaowo ale souva sousa peire donou tea tave kokhai moyu chi paitya pao-a buwe.
Neletao nou paoyu chitao sü dahrü hrüyu chikhai tea baie.
Currently Selected:
JOB 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
