JOB 20
20
Zophar
1Süthaisü Naamath puona Zophar nou chila peie:
2Job ne chi sü maiye sounguyu chi baie,
südonou chuo E nevei chila peire donou kholouho sou-a bure.
3Nenou paoposhu Eye haongu soupeie,
ana chuo Enou kabüa chila peilai touyu Enou süwe.
4Ramai nou teideiphao soupei arai raikha nou zhou teithe koute,
5mai ashimai ali hai savayu ngaowu moe touyu ne-a süa bue.
6Puhnou dusopa ratei tsü-a buyuma,
puh pei nou khe teihao sao-a buyuma,
7teikhai nou naihü hütayu büa hütawu bailai,
puhye sükho shikhoyu maitao nou puhye sü daiki vetare sa tea khupa sou-a bailai.
8Zhiho mekou nou ngaoyu ae kheikou zho ali
ngaokhaitou-a hatayu büa puh sü hata bailai,
sütea puhye ngaopu khaimoa bailai.
9Puhnou hrüa buyu hinou ngaomozeih tea ha-a bailai.
10Puhnou toure hamai hinou shoalouyu kinitao sü puh vei nahmaitao nou toulai,
11Puh pfüzho veisho-a nahlepea-a buyuma puh sü thalasou nai data-a bailai.
12Puletao nou ashi nasü touveih sho-a touso-a bue,
ae hashi nasü puletao vei lee khevai kukhai toua bua lae,
13touveih ae soveih nasü panou vakou derai payu pa-a puletao vei mü hinou kupfü-a bu-a lae,
14ana sübübüyu touso sü puletao vei poukhe lou khashoyu ae maiye kaitheare poushi da-a bailai.
15Mai ashimai nou maivei vaolou-a touthou sothou khaitouyu taosü rüpa bailai,
sübüa puhnou mai vei vaolou-a buyuma puhvei poukhe hinoua Ramai nou podakhai palou-a bailai.
16Mai ashimai nou zhaothou khaitouyu nasü kaithare poushi bübaie.
Nghou tushi bütou tea tainanou puhye kaithea bailai.
17Laivoudzü alia chonaodzü nou küyu rei nasü puletao nou ngaolou hoe.
18Puletao nou kujükhai touyu thao-a ta-a bailai,
Puletao vei kinitao sü puletao nou tousoyu ngaolai moe.
19Daisounou touyuo puletao nou toure hamaiye ngaophou moa souvea peie,
mai kukhe mainou soukhai touyu ki koute-a puletao nou shaoloue.
20Puletao nou lunüyu akhai hae.
21Ana puletao nou touso louyu thai-a lipayu ali-a buchamoe,
südonou puletao nou hangiyu sü phateile sho-a bulai moe.
22Puletao hai daizhou koute veilou ngaloue,
süzhou koute puletao hisü veahoyu nou ve-a bailai.
23Puletao nou tounü sonü teitei panou tousoyu sü souo,
Ramai nou puhvei lekha rarou nanou puletaoye tukha soulai.
24Puletao nou huh vei khoche pi-a tuta-a buyuma puletao hai tukou baosahu loushu nou kathawu bailai.
25Loushu nou puletao vei vasou kashapoa pa zhimü ngaolai alia süsü ngaolou-a puletao sü pi-a hilai.
26Puletao nou kujükhai touyu teitei sü souhawulai,
mai bah nou soushu moyu meinou puletao ae puletao vei kikhamai ye deitheawulai.
27Raki hinou puletao vei mahmo khesü popa ngaopeilai,
alia puletao hai mah chechere touyu sü dei nou paolai.
28Ramai vei lekha rarou nou dzüdu büa puletao vei kini teitei sü souhawulai.
29Mai ashimai nou ngaore zhasü Ramai nou haibüa tuda khaiwure.
Currently Selected:
JOB 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
