JOB 19
19
Job
1Süthaisü Job nou chila peie:
2Teile kazhou koute neletao nou Eye heiyu chipao pao-a souchoro-a souvea peilai?
3Eye hraongu soupeiyu thainou hraongu soupei khaikhai-e,
hraongu bo lia sükhai toumoa neletao nou Eye paoshi laihivu?
4Hakinou Enou mah cheche-a buyuma avei mahmo donou neletaoye daiyu dai-e buge?
5Ajünou neletao nou veipu hie tea neletao nou chowe,
alia Enou veayu hai avei mah donoue tea chowe.
6Hai hai Ramai nou baie touyu neletao chukoute süloumo hiwu?
Eye nüloure donou Puhnou rüh southou-a baie.
7Eye haibüa souveayu kaomoe tea E Ramai hi chi paowe,
ana apai süna mai linoua keipei more,
mai linoua acheche hinou apai hai keipei more.
8Ramai nou ludu teitei khukhaiwu-a E takou loure bo ali-a hare.
Puhnou avei ludusü azhihi poku khaiwure.
9Puhnou avei chingi teitei sü souhawure alia avei zhih aveih nasü soushi peiwure.
10Puhnou Eye bo tyatyalih hinou khousasa peiwure,
Puhnou avei areih na-a beimaa nou pailawure,
sütea Eye panou ki-vü ta-a thaire hi khapeiwure.
11Ramai nou apei hi rarou sholoure,
Eye sü puh vei ngaoba shoyu mai ali büa poloure.
12Puhnou reihmai seive panou apei hi reih huloure,
avei sahpao pehao teitei sü kaopo pohaolou-a daloure.
13Puhnou avei thaihou-jürai maitao koute-a panou Eye ngaiwure.
Eye sükho-ngaokhoyu mai hinou Eye sü panou shetumai soutare.
14Avei tyarai alia samai khamai touyu mai ali-a hazeire.
15Avei shemai sou-a aki hi ve hou-a chaoyumai nou Eye ngaiwure.
Avei kilai naotu khemai koute-a ahisü shevai-shesü mai ali büa baire.
16Enou kilai maiye kuyu phaki, puletao nou chaba-a baire,
Eye soukha peire donou kue ana chabare.
17Avei khapfü koute nou avei ssü kai hüthoulou hore,
lah athaihou jürai mai koute-a aheiki koubare.
18Nahmaitao nou Eye ngaolou-a ngaophou khaimoa konü-a baire.
19Avei samai veih veilai maitao-a Eye ngaora-a baire.
Enou leshi kayu maitao nou Eye hrai-a baire.
20Avei hee sü rao hi zo-a baire,
E hrishulai touyu louche more.
21Neletao sü avei samai khaitoue, Eye zhuvea peikhaio!
Ramai bah vuzünou Eye khoukhaowure.
22Neletao daidonou Ramai nou Eye souveayu büa souveawe?
Neletao nou Eye souveayu khamo hivu?
23Mai kamaia nou achipaotao hai choulou-a thaikhai-a
lichore donou rükhai peiyu E jüpae.
24Mokhaia dao alinou vealou-a chuh ali hi achipao tao rükhai peiyu jüpae,
teisa hamoa buloure ali hi rükhai peiyu E jüpae.
25Ana raki hinou mai kamai-a bue touyu Enou süwe,
Puhnou akhai khailai hi tave Eye vupa peilai.
26Avasou hai shikhao nou toube-a buyuma E thaitamo jünou Ramai ye ngaolai hie.#19.26 Phoure 26 nahai Hebrew hi sheesha timoe.
27Anghithou vuzünou E puhye ngaolai,
mai kukhe moa E vuzünou ngaolai.
Neletao nou haibüa paoyu donou ale sü chathaiwe,
28“Etao nou puhye kabüa souvea peilou laige?”
Neletao nou Eye hali moa hali vanou tea huwe.
29Ana chuo khocheye ngaopilo,
Ramai vei lekha rarou khoche sü mahmo pei hi povelai,
süvanou neletao-a mai hrülai pei hi chikure mai ali bue touyu süloulai.
Currently Selected:
JOB 19: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
