JOB 17
17
1Avei akhai soure teile sü nghiteire,
E ssü hailou hore,
Eye donou khü deinou ha kukhe ali-a bupu more.
2Maiye konüyu mainou Eye sü sühao-a buloure,
ae E sü puletao nou konüa buyu sü zhi-a bubaire.
3A Ramai, E ale sheesha tea baie, Eye popeilo.
Enou paoyu achipao hai machae tea paokha peire mai kukhe ali-a hare.
4Nenou puletao vei tsü choloure nasü khuwure,
puletaoye panou ajünou veilouyu nasü soupeiso.
5Samai khamaiye thoudzü jüpayu donou laiyu mai bue,
südonou puletao vei tyou-dzü hai veayu daowe touyu tsüchi ali bue.
6Haibüa paoyu chipao sü apeiva vere tea paoka-a bure.
Haibüa puletao nou tave apah hi taidzü süsho peiwe.
7E le veayule vanou anghithou ngaorara-a baire,
alia aphi abah sü kirü rü-a khungu büa baire.
8Le shee-e touyu mai sü khupa soure,
alia puletao hrülai nou Eye sü Ramai lümoyu mai tea paomah peire.
9Tsükhou, khuhao züe tea choyu maitao sü puletao nou kao-a baie tea choloukhai khai-a baire.
10Ana puletao mai hrülai nou anghoujü nou ve la-a chi kuyu thaio,
puletao mai ali koutea tsüdo veiwe tea ngaolou hoe.
11Avei hrümai sü chekoure,
avei choda teitei sü vete more,
avei areih pfüphou sü hazhi ture.
12Avei samaitao nou paoe,
azhi sü avae alia ava nasü nghiteire,
ana Esü chukoute azhi hi bua baie touyu Enou süwe.
13Enou reih-a bunasü athaimai teidei likhei baie,
sühi E kaokou zü-a azhi hinou zhitalai.
14Enou khüye sü apuo tea kulai,
alia avasou touyu shikhaongao taosü apfü ae atupfü maitao tea kulai.
15Avei areih dai bue?
Thaonou avei areih nasü ngao-a buwe?
16Enou thaimai vei teidei hi hotayu phaki,
avei areih nasü Eye koa talai moe.
Currently Selected:
JOB 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
