JOB 16
16
Job
1Süthaisü Job nou chila peie:
2Chi sübüyu khesü Enou raichoki nou süwe,
neletao nou ale soukaona peilai tea chi sütao paoyu keiloua ale veapua baire.
3Neletao thaokhai toumoa chi paokou telai hivu?
Neletaoye dainou süpei-a chi paokhai paokhai-a buwe?
4E-a neletao büa chi paolou süe,
neletao nou E büa buyu thaio.
E-a pei züa chi tyatyali ne pei hi paolou süe.
5Süpeiyu chi paoposhu neye soukhou soutsü peilou süe,
Enou neye paoposhu kaona peilou süe.
6Ana E chi paoyu vanou avei sounou veilouyu ha-e,
Enou chi paomoa ngasou bukhai-a kaonayu ngaolai touyu moe.
7Ramai nou Eye souvea showure,
alia akikha maiye souhawure.
8Nenou Eye nüloure; E sü neye hraiyu mai ali soure.
E sü rao ae hee khaikho baire,
hai avei mahmo donoue tea maikhe mainou poloure.#16.8 Phoure 7-8 nahai Hebrew hi sheesha timoe.
9Ramai nou puhvei lekha rarou hisünou Eye sü paidesasa loua khaipeie,
puhnou ngira-a Eye ngaora loure.
10Maikhe mainou mü ngepoa Eye konüre,
konüa Eye bahnou phapei-a bure alia Eye hrailoure.
11Ramai nou Eye nüposhu mai ashimai hi peiwure,
alia mai ashimai bah hi thaothou peiwure.
12E raikiwo vaphi tea bue,
ana Ramai nou Eye taihinou sülou-a souvea sasa peie,
haongu soupeie alia Eye sü puh vei nghitou souloure.
13Puh vei louka pomai nou Eye sü haoloure,
zhuveayu touyu ali-a ha-a puhnou Eye sü louthou nou kasasa peie.
14Eye sü reihmai ali nou zhaipou shishoyu büa zhipeiyu thai-a puhnou zhipei khai khaire.
15Esü veasho-a soukou sah nou banoure,
pah shiyu mai ali sou-a nai hrohinou da-a hrüe.
16Esü krakra loua apah homarare,
avei nghithou malou-a ngaorara-a baire.
17Ana avei bah nou hashi ali-a soumoe,
ale sheesha tea veachi pao-a baie.
18Oh, deiphao, apei hi soumah soumo khai touyu maitao mah sü poku peiwuso,
Enou acheche hinou veachi paoyu panou chao-sowuso.
19Rakiva hinou khamai nou Eye donou lapeire mai bue.
20Avei samai khamai nou Eye konüwe,
avei nghithou nou nghidzü kükou Ramai hi peiwe.
21Mai alinou puh vei samai donou chi paokha peiyu büa Eye donou kamai-a panou Ramai hi chi paokha peire jüpae.
22Chuo avei teile sü talapoa takoure,
alia Enou dakhai vepulai moyu ludu nasü ta-a bure.
Currently Selected:
JOB 16: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
