JOB 15
15
Chiphayu Ahai Chena
(15.1—21.34)
Eliphaz
1Süthaisü Teman puona Eliphaz nou chila peie:
2Tsü veiyu mailinou thou loumoyu chipao paolaiwu?
Mokhai-a ko lia loumoyu chipao nou lahnou lahye vupa loure paokhai laiwu?
3Kokhai moyu moa muh lia hayu chipao nou chi sü shava khailaiwu?
4Ramai ye pia tsükhouyu tsüle hai ne hi ali-a hae,
ae Ramai ye lichoyu sü ne hinou hatare.
5Ne maiveih moe touyu sü nevei chipao vanou süloure.
Ne kaisho-a nevei mahmotao poku loure donou tewe.
6Enou neye mahwe tea paoyu komoe,
lah nenou paopayu chipaotao nou ne hai mah-e touyu süwe.
7Ne hai lah nenou deiphao hi nave rairai khanae tea chowu?
Ramai nou deichitao soupeiyu phaki ne-a sühinou buwu?
8Ramai nou haibüa soulai tea choyu pai ne süwu?
Deiphao mai hi tsüdo aveih sü ne hie likhei bubai tea chovu?
9Eh nou sümo ngaomoyu ali-a nenou süngaoyu sü hae.
10Tsüdo sü peipao hu chayu tsümai hinou,
ne puo navemo jünou hrüyu tsümai hinou douloue.
11Ramai nou neye paona peiyu daisounou chukoute polouba-a buwe?
Kaona shoyu chi lako aveih nou Enou ne hi paopeiwe.
12Ana newo lekha rarou nou koa Eh ye phe-a bue.
13Ne Ramai pei hi rarou-a puhye paoshiwe.
14Deiphao mai talina cheche vuzünou sheelou süwu?
Mai talina Ramai nghoujünou cheche lousüwu?
15Ramai nou rakivamai koute-a louche moe,
Puh nghoujü nou puletao koute-a shee moe.
16Dzü keyu büa mainou ashiye kewe,
mai hai shee moe, alia mai hai muh ha-e.
17Job, kei noulo, Enou paolai,
Enou daidai süngaoyu taosü ne hi paolai.
18Puopaoh mai hinou doulouyu hasü maitao nou halia kukhai moa acheche nasü Eye doupeie.
19Puletao nou hrüyu teidei hisü shetumai ali-a hae.
Ramai vei chikha thaifüa hrüyu jünou mai taralinoua
puletaoye süthai mah peire mai lia hae.
20Maiye souveayu mai ashimai sü puletao hria bubusa veahoyu ae shameayu sü zhai baie.
21Teisa nou puletao noubei sü pihiyu pai khaikho choulai,
vei-e, halia moe tea buyu hinou mai vei shaotou shaosoyu mai nou huve-a bailai.
22Azhi hinou tupa loure zhou lia puhnou ngaolai moe,
daisounou toulouzü sümoyu buh ali hinou khoche poa puhye daotheare donou da-a buloure,
23ae puh vei thaiphao sü rashopeiki nou toure donou kho-a bure.
Haibüa teile ashi vere sü puhnou süwe;
24khouko bushoyu veo mai ali nou reih huloure bütoua rako ashi nanou kho-a bue touyu lah puhnou süwe.
25 Mapao ye bahtou nou raoyu mai,
ae Ramai ye phi nou tainayu maisü haibülai:
26Mai sünasü khaophu soua puhvei rü pfüloua Ramai pei hi reih huloue,
27daiolouzü puhvei pah sü theadzü nou hopfüa bue,
ae puhvei sabanü khesü theadzü nakhai toue.
28Puhnou reih hulou nuhdu khesü poloue,
ki paomaitao tutayu thai sümaitao ki sü thaoloure,
ana reih soua shaolouyu nuhdu ae ki khesü souha-a bailai.
29Taibüyu maisü phashoa hangi-a bulai moe;
puhvei buyu teitei sü hatakhai-a bailai.
Puhvei khungu koute-a ha-a bailai.
30Puh sü azhi hinou hakilia tupalou hoe,
puhsü mainou meideiwua thaitayu süübotao
ae teikhai nou hüpoa tayu sünghou bütoua bailai.
31Puhnou vo-a hashi naye louche louzü,
süna vei buu soua puhnou hashi ngao-a bailai.
32Süübo ali nou kitayu thai lapapu moyu büa puhsü puhvei teile chemo jünou ki-vüta-a bailai.
33Puhsü darkha shithou meimo jünou raitayu büa ae oliv pah raitayu büa raita-a bailai.
34Mai ashimai hai tyaosholea ngaolai moe,
ae seihla nou poa ki soukhai touyu khesü mei nou deiha-a bailai.
35Do ashi choloua vah ashi souyu mai sü haibülai,
ae puletao lethou hisü do ashinou teisa phou-a bubaiwe.
Currently Selected:
JOB 15: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
