JEREMIAH 51
51
Babilon Pei hi Chikupure
1 Mapao nou paoe, “Enou Babilon ae sühinou hrüa buyu maitaoye soushi peire teikhai#51.1 soushi peire teikhai; moa soushi souha peire rako. sü seive peilai. 2Thouba sü teikhai nou hepoa tayu büa Enou vakou maiye seive Babilon sü souhawulai. Süzhou teithe sü puletaoye kainghou veishi hinou reih huvelai ae puletao vei teidei sü soushiwua panou pata bailai. 3Voulou poyu maiye panou puletao vei voulouthou sü kapayu teile peiso, moyuma puletaoye panou reihna pfüyu teile peiso. Nahle maiye shokhai peiso! Reihmai hrülaiye nou southakhai touo! 4Puletao hai puletao vei nuhdu ludu hinou zhizhuloua thai-a bailai. 5Israel ae Judah maitao nou Israel maivei Amasheeo, Khoukhoulai Ramai Mapao apei hi mah souyuma, Enou puletaoye sü thaopei moe. 6Babilon hinou tutalo! Neletao hriloure donou tupalo! Babilon maivei mah donou neletaoye panou koa southaso. Puletao nou ngaozü thaifüa Enou puletao pei hisü khüngu phoulaire. 7Babilon hai abah hinou sana pai ali büa bue, deiphao mai hrülaiye panou sozhi loure. Tyahrütao nou zhaoh sozhi loure ae puletao sü votare. 8Babilon sü lichokhai moa buyu hinou kaodu tare ae hakatare! Puhye donou dopfüa krapeio! Honapai vei zhimü souvei loure donou pou phoupeio, sükulouzü puhye souvei loua malae. 9Sühinou hrüa buyu shetumaitao nou paoe, ‘Etao nou Babilon maiye soukha peire donou te-e, ana nalea baire. Chuo honapaiye thaokhaiwua lahvei ki hi dakhai ta-a bailaishe. Ramai nou puhvei khouko veishi nou Babilon sü tudee peire ae honapaiye sü souhakhai touwure.’ ”
10 Mapao nou paoe, “Avei maitao nou haibüa sha-e, ‘Etao nou kao-e touyu hai Mapao nou soungao peiwure. Etao Ramai Mapao nou soupei khaitouyu khesü Etao Jerusalem hi taho paopei laishe.’ ”
11 Mapao nou Media maivei vemaitao tsüle sü souhropeiwure, daiolouzü puhnou Babilon sü souhare donou tsüchodawure. Puhnou puhvei Rathoki soushiyu vanou haibüa khüngu sü phoulai.
Soureih soutayu hi peikhowo nou haibüa kharochi peie, “Neletao vei vouloushu pei sü hritsülo! Rü pfülo! 12Babilon vei kivo dakhore donou shee soungao peio. Reihkhao maitao khaipulo! Reihmaitao panou da-a kholo!”
Mapao nou Babilon maitao hi soulai tea paokhai touyu khesü soupeiwure. 13Rei alao küa buyu ae toungi sho-a buyu teidei, nevei teile sü chere, nevei hrirai sü soudewure. 14Khoukhoulai Mapao nou lah puhvei hrümai nou poa chaachou souwure, süolouzü puhnou khazü me dushoyu ali büa mai alao nou save Babilon sü soureih soulai, ae puletao panou veilouyu reihvo sü soulai.
Ramai ye Paoshoyu Lou
15 Mapao nou teidei sü puhvei khouko nou soupeie;
puhvei ratsü nou deiphao sü soupeie ae ratei sü paito peie.
16Puhnou kharochi peikhaie, ratei hi dzü sü rapa-e;
puhnou deiphao akhai hinou teihao sü pove peie,
ae puhvei na pokhaiyu kide hinou teikhai sü seive peie.
17Hai khesü ngaoloua maikhe mai hai vo-a baie ae tsü ha-a baiwe;
bashara souyu maitaoye sü hraongu soupeiwure,
daiolouzü puletao nou souyu rahtao sü cheche moe ae hrirai hae.
18Puletao hai mu hae ae hako baie;
Mapao nou veyu phaki puletaoye sü souhawulai.
19Jakob vei Ramai louzü sütao raimoe;
puhnou ha teitei soupeie,
ae Israel maiye puhvei mai soure donou dopaloue.
Khoukhoulai Mapao touyu sü puhvei zhih-e.
Mapao vei Hubao
20 Mapao nou paoe,
“Babilon, ne sü avei hubao-e, avei reih basei-e.
Enou neye tyahrütao ae vedeitao poa daphe dapho peie,
21Enou neye panou rheitao ae rhei pfüyu maitaoye soupho rarou peie,
rheiluki ae rheiluki pfüyu maitao soupho raroulai peie,
22naotu poutu maiye southa peie,
tsümai ae nahle maiye southa peie,
khemainah ae loumaina ye southa peie,
23zhaokho maitao ae puletao vei zhaotu khesü datha peie,
tata maitao ae puletao vei sa-a tatayu rhei khesü southa peie,
teidei khomaitao ae peicho maitaoye sousasa peie.”
Babilon Maiye Tudeeyu
24 Mapao nou paoe, “Neletao vei nghingao hinou Enou Babilon ae Babilon hinou hrüa buyu maitao hi puletao nou Jerusalem hi vah ashi soukhai touyu paoh khapeiyu sü ngaolai. 25Oh Babilon hi maitaore, neletao hai deiphao veishi soushi peiyu deichi ali büre, ana Mapao Enou neletaoye haita laire. Enou neletaoye soushi peire donou abah sü thaipalai, ae neletaoye sounakou khaipeilai, alia neletaoye meidei poshu vonai vipeilai. 26Soushi khaitouyu neletao vei teidei hinou chuh ali-a panou poloua ki sü soupulai moe. Neletao hai teisa panou radeiki ali büa bua bailai. Haisü Mapao Enou paowe.
27“Soureih soure vei shee soungao peio! Tyahrütao ye panou choure donou shabe nghoupeio! Babilon hi soureih huloure donou tyahrütao ye panou soudalo! Puletao pei hi soureih soure donou Ararat, Minni ae Ashkenaz vedeitao hi paopeio. Rhei khesü khazü me dushoyu ali büa pove jülo. 28Tyahrütao ye panou Babilon pei hi soureih soure donou soudalo. Media hi vemaitao, puletao vei peikho maitao ae süthai-apei maitao alia puletaoye koa zhoyu soureih maitaoye panou souda-a bulo. 29Mapao nou Babilon sü panou mai hrümoa soushi khaiwulai tea tsüchoda khaitouyu nasü soupfüyu donou deiphao sü ngaopi-a nou ngulüre. 30Babilon vei reihmaitao sü soureih soumoa puletao vei ki hinou bure. Puletao hai khuha tare, ae naotumai ali büa bure. Nuhdu vei rokhubomü sü daphe dakhowure, ae ki khesü meideiwure. 31Babilon vei veo hisü puhvei nuhdu hai kainghou veishi hinou daphe dapho loure tea kopomaitao nou tobai soumoa tuve pao-a nou bure. 32Ngaoba mainou rei tachoyu ludu sü poloure ae reihkhaobu khesü meidei laiwure. Babilon maivei reihmaitao sü choha zeitoua ngaopi-a nou bure. 33Thasho-a nou ngaoba mainou puletaoye sü soudeloua thaibu hinou thoutaiyu büa taide peilaire. Haisü Khoukhoulai Mapao, Israel maivei Ramai Enou paowe.”
34Babilon hi veo nou Jerusalem sü soude laipeie ae puhnou touloure.
Puhnou nuhdu nasü dzübvü ali büa sousakhai peie;
khaosou ali büa puhnou zhaoloure.
Puhnou jüpayu veishi poloure ae nakukhe taosü poshilai peie.
35Zion hi maitaoye panou haibüa paokhaio,
“Babilon mainou Etaoye taidayu ae southayu mah khesü panou puletao vei pei vetheo.”
Jerusalem maiye panou haibüa paolo,
“Etao nou veahoyu hai sü panou Babilon mai hi vetheo!”
Mapao nou Israel Maiye Soukha Peire
36Südonou Mapao nou Jerusalem mai hi paoe, “Enou neye soukha peilai ae nevei khüngu sü phoupeilai. Enou Babilon maivei dzünghou dzüla khesü southe peilai alia puletao vei rei khesü panou theta-a bailai. 37Babilon teidei sü soushi khaiwulai ae rekhaona panou hrüyu buh soulai. Haisü panou ngaopi shoyu buh ali soupeilai; mailia panou hrülai moe, alia süna ngaoyu mai hrülai nou ngaopi sholai. 38Babilon mainou souveo büa ralai, ae khaotoutu büa ralai. 39Puletao hai dutounü moge? Enou puletaoye donou khonüh ali souda peilai, ae puletaoye panou touzhi sozhi loua asah soulai. Süthaisü puletaoye panou zhitalai, ae puletaoye panou kaishupu khaitoulai moe. 40Enou puletaoye zhaotu ae nghitu büa dathayu buh hi saho datha peilai. Haisü Mapao Enou paowe.”
Babilon Mainou Veahore
41 Mapao nou Babilon vanou haibüa paoe, “Kabüa deiphao mai hrülai nou paosho-a buyu nuhdu nasü mainou poloua baidesa! Babilon sü daidosou tyahrütao nou ngaopi shoyu buh ali soubairesa! 42Zai dzü nou nghoupa Babilon sü holoure. 43Puhvei nuhdu khesü radeiki ali büa dzü liro ha-a ngaopi shoyu buh ali soutare, ae mailia hrümore ae mailinoua veihao soua tamore. 44Enou Babilon maivei Bel rahye sü tudee peilai, ae puhnou maivei vaolouyu na khesü poloulai. Tyahrütao nou puhye sü thopulai moe.
“Babilon vei kivo sü pepo tare. 45Israel maitaore, sühinou tuvai talo! Hriloure donou avei lekha rarou hinou turei palo. 46Neletao nou cheche moyu ko khesü chouloua chathai taso moyuma ngaopiso. Po patsü sü cheche moyu ko — teidei hi taidayu ae vemai ali nou veo ali pei hi soureih soushe touyu ko khesü choulai. 47Südonou Enou Babilon maivei basharatao pei hi tudee laiyu teile sü velaire. Teidei veishi nou pa hraongu ngaolai, ae mai hrülaiye sü southakhai touwulai. 48Reilova nou buyu maitao nou tave Babilon ye souha peiyu phaki deiphao hi buyu ae rateiva nou buyu na veishi nou asah soua shalai. 49Babilon mainou deiphao mai hrülaiye southayu vanou, ae chuo puhnou Israel mai taoliye southayu donou puh sü kaodu talai. Haisü Mapao Enou paowe.”
Babilon hinou Hrüyu Israel Maitao hi Ramai vei Chipao
50 Mapao nou Babilon hinou buyu puhvei maitao hi paoe, “Neletao hai athai hinou tureipa loure! Chuo talo, chaokhaiso! Neletao hai lahvei teidei hinou dousho-a buyuma, neletao vei Mapao Eye licholo, ae Jerusalem sü licholo. 51Neletao nou haibüa paoe, ‘Etao hai chaa ngaore ae hraongu ngaore; Etao sü souloure khouko hazei toure, daiolouzü vakou maitao nou sheeyu buh Rathoki sü poloure.’ 52Südonou Enou Babilon maivei bashara taoye tudeere teile sü velaire tea paowe, ae zhizhu khaitouyu maitao nou teidei veishi hinou lüpoa nou bulai. 53Babilon mainou deichi kushoyu hi taopaloua reihkhaobu souloua buyuma, Enou puletaoye souha peire maiye sü seive peilai. Haisü Mapao Enou paowe.”
Babilon ye Soushipu Peiyu
54 Mapao nou paoe,
“Babilon maitao nou krayu pai sü keikhaio,
puletao vei teidei soushi khaiyu donou dopfüa buyu pai sü keikhaio.
55Enou Babilon sü souhawulai ae panou pai kho lia choumoa zei tea pokhaiwulai.
Soureih maitao nou zaidzü nghouyu büa velai,
ae shura soua reih huloulai.
56Puletao nou Babilon ye souhare donou velai;
puhvei soureih maitao sü nüloure,
puletao vei voulou khesü soucha peiwure.
E hai vah ashi souyu maitaoye tudee peiyu Ramai nasüe,
ae Enou Babilon mainou ngaozü thaifüa soupeilai.
57Enou puhvei peikho maitaoye panou zhaoh sozhi loulai—
tsüveiyu maitao, süthai-apei maitao ae reihmaitao.
Puletao nou zhitalai ae kaishupu khaitoulai moe.
Haisü veo, Enou paowe,
E sü Khoukhoulai Mapao süe.
58Khousho-a soukhai touyu Babilon vei kivo khesü deiphi hi dakho kouwulai,
ae kusho-a soukhai touyu reihkhaobu khesü meidei laiwulai.
Maikhe mainou terou poa soukhai touyu vah khesü hamako bailai;
sütao sü meikei vita-a bailai.
Haisü Khoukhoulai Mapao Enou paowe.”
Jeremiah vei Ko sü Babilon hi Seitayu
59Mahseiah tyao, Neriah nahpoutu Seraiah nou Veo Zedekiah vei natao peikhowo sü soue. Zedekiah nou vekou louyu po adai kousü, puhnou Babilon hi Seraiah ye koa ta-e, ae Enou puh hi rachi daotu hai paopeio tea paodou peie. 60Babilon pei hi hashi vepare teitei sü Enou larübvü hi rüthou khaipeie. 61Enou Seraiah hi paoe, “Nenou Babilon hi velouzü, rükhai touyu haitao teitei hai maikhe maiye panou chouloure donou phoungao peio, 62ae haibüa paopeio, ‘Oh Mapaowo, nenou teidei hai nasü soushiwulai, sübüa hrikhaona aliro panou bulai moe, mai moyuma kikhaorü ali-a hrülai moe, ae haisü radeiki ali büa panou teisa bua bailai tea paopei khaitoue.’ 63Seraiah, nenou larübvü nasü maikhe mai hi phoungao peiche louzü, larübvü nasü chuh ali koa khipa loua Euphratis rei hi laithouo, 64ae haibüa paopeio, ‘Babilon sü haibüa nou vepalai — puhsü leita-a bailai, phaopa pulai moe, daiolouzü Mapao nou Babilon hisü hakayu hai pove peilai.’ ”
Jeremiah vei chipao sü hai hinou akhai soure.
Currently Selected:
JEREMIAH 51: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
