JEREMIAH 52
52
Jerusalem Kaodutayu
(2 Vem 24.18—25.7)
1Zedekiah nou po kaili payu phaki Judah hi vekou loue, ae puhnou Jerusalem hinou po kiali hai veo soue. Puh pfü zhih sü Hamutal toue, ae honapai hai Jeremiah nah naotupai-e, Libnah nuhdu hinou hrüe. 2Puhnou Veo Jehoakim bütoua Mapao vei nghingao hinou mahmo khesü soure. 3Mapao nou Jerusalem ae Judah maitao pei hi rarou sholoua puhnou puletaoye sü puhvei nghingao hinou souhawure.
Zedekiah nou Babilon hi Veo Nebukhadnezzar vei khakhe hi buba-a khaitya pare, 4südonou Nebukhadnezzar nou puhvei reihmaitao saloua Zedekiah nou vekou louyu po akü vei khouh kirou vei teithe kirou zhou Jerusalem hisü reih huloure. Puletao nou nuhdu vei pehao veishi hinou fühao souloua kholoure, 5sübüa Zedekiah nou veo souyu po kiali koute hai nuhdu sü sühao-a buloure. 6Po süna vei khouh adai, khoukha akü zhou hai tokaa sholoua maikhe mai hai halia toure hare. 7Babilon mainou nuhdu sühao poa buyu teile hinou nuhdu vei kivo sü dakho loua reihmai hrülai sü khei nou tupa loure. Puletao nou veo vei kipei, kivo ahai khozho khaitoua buyu rokhubomü hinou tupaloua Jordan vei Deikho hilova tupoa tare. 8Ana Babilon maivei reihmaitao nou thaihupoa kou Jeriko deikho nghiyu hinou Veo Zedekiah sü nüloure, ae puhvei reihmai hrülai sü puh hinou tutare. 9Süthaisü puhmai nou Zedekiah ye nüpoa Veo Nebukhadnezzar hi sapoa vere, süphaki puh hai Hamath maivei teidei Riblah nuhdu hinou bue, ae sühinou Nebukhadnezzar nou puh pei hi chiku peie. 10Babilon hi veo nou Zedekiah vei nghoujü hinou puh nahpoutu maitao ae Judah hi peikho maitaoye southa peie. 11Süthaisü puhnou Zedekiah nghithou sü reilapa peiwure, ae puhye hurai nou phuloua Babilon hi sa-a tare. Zedekiah nou Babilon maivei hukhaki hinou thaimo koute bue.
Rathoki Soushi Peiyu
(2 Vem 25.8-17)
12Babilon hi Nebukhadnezzar nou vekou louyu po kiakü vei khouh angou vei khoukha kirou zhou, Babilon veo vei paodou-apeio ae puhvei reihmai peikhowo Nebuzaradan nou Jerusalem hi louloure. 13Puhnou Rathoki, veo vei ki, ae Jerusalem hi peikho maitao vei ki khesü meidei laiwure; 14ae puhvei reihmaitao nou nuhdu vei kivo sü dakho laiwure. 15Süthaisü Nebuzaradan nou touha kayu maitao, nuhdu hi shokhai toua buyu maitao, vah soulou süyu maitao, ae Babilon veo hi tuveyu maitaoye nüpoa Babilon hi tare. 16Ana puhnou Judah hi touha kayu maitao, halia hayu maitaoye panou darkha kipei ae dou hi vah soure donou shokhai peie.
17Babilon maitao nou Rathoki hi southou khaitouyu baosahu vei dekatao ae cholukitao, alia baosahu nou soukhai touyu dzükhao sü dakho sasaloua Babilon hi potare. 18Puletao nou likhaotao, poukai nüvei poa meideiyu bvütao, reikhaotao, ae baosahu nou Rathoki hi poa vah soure donou soukhai touyu na veishi sü poa takhai toure. 19Puletao nou sana ae shahu nou soukhai touyu na teitei: khaosao taitya, meithou pore khaotao, posheelayu phaki souzhe thoure bvütao, poukai nüvei thouyu khaotao, posheelabu hinou vonai vethouyu bvütao, meivabvü khaibutao, ae poa zhaoh nghoupeiyu bvütao teitei poa takhai toure. 20Veo Solomon nou Rathoki hi poa vah soure donou baosahu nou soupeikhai touyu natao — deka ahai, chokarütao, dushoyu dzükhao, ae süna khe hinou buyu chode kiahai — sütao hai sühleyu donou doulou more. 21-22Deka ahai sü raibütou toue: ali nou mitar 8 kue ae mitar 5.3 haohrü toue. Haisü khevai hai chawe, ae sünavei shouyu nou milimitar 75 bue. Deka süna ahai pei hisü baosahu nou mitar 2.2 kua nou soupa khaitoue, ae süpehao veishi hisü vajüshithou zhairai daothou khaitoue, sütao-a baosahu nou soukhai toue. 23Deka sühai vei peitao hisü vajüshithou kaihli daothou peikhai toue, ae deiphi hinou zhuyu phaki vajüshithou raiküarou hai zhingaowe.
Judah hi Maitaoye Babilon hi Nüpoa Tayu
(2 Vem 25.18-21,27-30)
24Süpei hinou, reihmai peikhowo Nebuzaradan nou Napao Peicha Seraiah, puh khe hinou buyu napao Zephaniah, ae rathoki hinou peikhoyu mai asü noupu hukhamai soua nüpoa tare. 25Nuhdu hinou buyu reihmai peikhowo, veo vei paodou-apei mai anai, reihmai peikhowo vei soukha-apeio, puhnou reihmaitao vei larü sü rüpeiwe, ae matsüyu kukhe mai rairou noupu hukhamai soua nüpoa tare. 26Nebuzaradan nou puletaoye sü nüpoa Babilon hi veo nou buyu Riblah nuhdu hisü save-e. 27Babilon hi veo nou puletaoye sü Hamath maivei teidei, Riblah nuhdu hinou southawure.
Sübüa Judah sü vakou maivei teidei hi nüpoa tare. 28Nebukhadnezzar nou vekou louyu po anai kou, puhnou hukhamai soua nüpoa tayu hai mai 3,023; 29puhnou vekou louyu po kiacha kousü Jerusalem hinou mai 832 nüpoa ta-e; 30ae po kaisü kousü, Nebuzaradan nou mai 745 hai hukhamai soua nüpoa ta-e. Sütao teitei hai mai 4600.
31Evilmerodak nou Babilon hi pa vekou louyu phaki, puhnou Judah hi veo Jehoiakin ye zhuvea peia puhye hukhaki hinou popa peie. Haisü Jehoiakin ye hukhamai soua nüpoa tayu po shianai vei khouh kiahai vei teithe kaingou zhou-e. 32Evilmerodak nou puhye zhuvea leshi peie ae Babilon hi puhye koa hukhamai soua nüpoa veyu vemai kukhe jünou kupua nou tsükhou peie. 33Südonou Jehoiakin nou puhvei hukhamai vei sabanü sü phawua veo vei tovaibu hinou puh thaimo koute hai veo ye koa touso zho-e. 34Babilon hi veo nou puh thaimo koute hai, teithetsü puhnou molouzü shiyu na khesü puh hi peie.
Currently Selected:
JEREMIAH 52: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
